Mwaha 74: Mulopwana Mmosaa Ohinoova
MWAAWEKE atthu awo ammunyohola mmiravo ola. Munnimusuwela tanii ola? Ola Yeremiya. Ola mprofeta mmosaa ootthuneya vanceene a Muluku.
Niinanoru nuumala Mwene Yosiya opacerya waapwetexa amuluku a ethiru mulaponi, Yehova onimuleela Yeremiya wira okhalee mprofeta Awe. Hataa vari siiso, Yeremiya onuupuwela wira owo ootepexa oyeva wira okhalee mprofeta. Masi Yehova onimuleela wira Owo onirowa omukhaliherya.
Yeremiya onaaleela anaIsarayeli wira ahiyee ovara itthu sootakhala. ‘Amuluku yaawo atthu a maloko anaakokhorela aya ta ethiru,’ owo onnihimya. Masi anaIsarayeli anceene yaathanla waakokhorela amuluku a ethiru ohiya omukokhorela Muluku a ekeekhai Yehova. Vaavo Yeremiya vanaaleela awe atthu wira Muluku onrowa waahukhumu mwaha wa sootakhala saya, awo yaammutheya paahi.
Iyaakha sinnivira. Yosiya onnookhwa, nto nuumala miyeeri miraruu mwanawe Yoyakimi onnikhala mwene. Yeremiya onnivikaniha waaleela atthu wira: ‘Yerusalemu onirowa ohononiwa akhala wira khimunrowa ottharuwa iphiro sanyu sootakhala.’ Anamukuttho aninvara Yeremiya ni khiyakhuwela ariki: ‘Nyuwo moohaana wiiviwa mwaha woohimya itthu iya.’ Nuumala vo awo anaaleela mapewe a Isarayeli wira: ‘Yeremiya oohaana okhwa, okhala wira oolavula moovaanyiha muttetthe ahu.’
Exeeni vano Yeremiya enirowa awe opaka? Owo khonoova! Owo onaaleela otheene ayasa wira: ‘Yehova ookiruma miyo wira kooleeleni itthu iya. Akhala wira khimunrowa ottharuwa iphiro sanyu sootakhala, Yehova onirowa omuhonona Yerusalemu. Masi suwelexani ela: Akhala wira munookiiva, nyuwo munrowa omwiiva mutthu yoowo ohivanre etthu yootthekeya.’
Mapewe anneemererya wira Yeremiya okhalee mukumi, masi anaIsarayeli khanttharuwa iphiro saya sootakhala. Vattuli vaya Nabukhodonosori, mwene oBabilonia, onnoorwa owana ni Yerusalemu. Wanikisa waya Nabukhodonosori onaapaka anaIsarayeli okhala arumeyi awe. Owo aahaakuxa ikonto sinceene aaroihaka oBabilonia. Mupuwele paahi moota saarowa anyu okhala okuxiwa ni atthu ahinaasuwela anyu yooroihakani elapo ehinsuwela anyu.
Yeremiya 1:1-8; 10:1-5; 26:1-16; 2 Mamwene 24:1-17.
Makoho
- Mmiravo owo valataratoni va tanii?
- Onoona sai Yeremiya voohimya sa okhala mprofeta, masi Yehova onimuhimeerya exeeni?
- Muhupi xeeni Yeremiya onivikaniha awe aahimeeryaka atthu?
- Moota xeeni anamukuttho aneererya aya omuhiiha Yeremiya, masi moota xeeni sinooniherya awe wira khonoova?
- Eniiraneya exeeni vaavo anaIsarayeli vahinrukunuxa aya mikhalelo saya sootakhala?
Makoho oowuncererya
- Mmusome Yeremiya 1:1-8.
Ntoko sinooniherya aya ntakiheryo na Yeremiya, etthu xeeni enimphwaneleliha mutthu mmuteko wa Yehova? (2 aKor 3:5, 6)
Yoolipiha xeeni enivaha aya ntakiheryo na Yeremiya wa amiravo eeKristau olelo? (Mus 12:1; 1 Tim 4:12)
- Mmusome Yeremiya 10:1-5.
Nlikanyiheryo xeeni nakuruu, Yeremiya ninrumeela awe wira ooniherye okhala waya ethiru waaroromela amuluku a ethiru? (Yer 10:5; Yes 46:7; Hab 2:18)
- Mmusome Yeremiya 26:1-16.
Vaavo vaniiwanyeiha aya muhupi woolopola olelo, moota xeeni oohalela oowoottihiwa aniiwelela aya saana yooruma ya Yehova wa Yeremiya ya ‘ohivukula masuu’? (Yer 26:2; Otum 4:2; Mit 20:27)
Ntakiheryo xeeni noolokexa nivanha awe Yeremiya wa Anamoona a Yehova olelo mu olaleya yoolopola ya Yehova wa maloko? (Yer 26:8, 12, 14, 15; 2 Tim 4:1-5)
- Mmusome 2 Mamwene 24:1-17.
Sookhumelela xeeni sooriipiha murima sa ohiroromeleya wa aYuda wa Yehova? (2 Mam 24:2-4, 14)
