Mwaha 75: Amiravo Axexee Obabilonia
MWENE Nabukhodonosori onaakuxa anaIsarayeli otheene owiixuttihiwa saana aaroohaka oBabilonia. Vattuli vaya mwene onnaathanla eriyari ya awo amiravo ooreerexa ni oosuwela saana. Axexee a yaawosa amiravo ala anaweha anyu va. Mmosaa ti Daniyeli, nto akina awo araruu aBabilonia aniwiitthanasa Xadraki, Mesaki ni Abedi-Nego.
Nabukhodonosori onuupuwela owiiniha nikuruta amiravo ala wira arumeeleke mu empa awe ya omwene. Nuumala iyaakha tthaaru sa nikuruta onrowa waathanla paahi oosuwela saana wira amukhaliheryeke ophuka milattu. Mwene oniphavela wira amiravo awo akhalee aikuruu ni a okumi wooreera okathi wowiinihiwa nikuruta. Siiso owo onilamula wira arumeyi awe ahaana waavaha otheene aya yoolya emosaru yoonuna ni eviinyu yeeyo enivahiwa awe owo ni emusi awe.
Munweheke mmiravo owo Daniyeli. Nyuwo munnisuwela ele owo enihimya awe wa Axipenazi murumeyi muulupale a Nabukhodonosori? Daniyeli onimuleela wira khomphavela olya itthu soonuna sinikhuma vameesa va mwene. Masi Axipenazi orii ooxanka. ‘Mwene tothanlale ele enrowa anyu olyaaka ni owurya,’ owo onnihimya. ‘Nto vakhala wira nyuwosa khimunrowa wooneyaka ni okumi wooloka ntoko amiravo akina, owo onrowa okiiva.’
Siiso Daniyeli onirowa wa mulipa oolipelela yoowo Axipenazi omuhenle awe wira onweheryeke owo ni apatthani awe araruu. ‘Xontte muneehererye mpakha mahiku 10,’ owo onnihimya. ‘Munivaheke mathaapa paahi wira nlyeeke ni maasi wira niwuryeke. Nuumala vo munilikanihe ni amiravo akina yaawo anilya yoolya ya mwene, ni nwehee tanii anooneya mooloka.’
Mulipa oolipelela owo onnakhulela wiira ela. Nto vaavo mahiku 10 vanimala aya, Daniyeli ni apatthani awe araruu annooneya ni okumi woolokexa waavikana amiravo otheene. Siiso mulipa oolipelela onnaahiya awo avikanihaka olya itthu sinimela mmapuro mwa seiye mwene sinivaha awe.
Wanikisa wa iyaakha tthaaru amiravo otheene aniroohiwa wa Nabukhodonosori. Nuumala olavulana otheene aya, mwene onnoona wi Daniyeli ni apatthani awe toosuwela saana. Siiso owo onaakuxa awo wira amukhaliheryeke mu empa ya mwene. Nto okathi wotheene vaavo mwene vanikoha awe wa Daniyeli, Xadraki, Mesaki ni Abedi-Nego aahiiso waavaha awo miyaha sooxankiha, awo annisuwela ikwaha 10 onvikana namukuttho ori otheene aahiiso alopwana aankhili.
Daniyeli 1:1-21.
Makoho
- Amiravo awo axexee valataratoni va tanii, ni nthowa xeeni ary’aya oBabilonia?
- Nabukhodonosori onuupuwela owiiriha exeeni amiravo ale axexee, nto onaaruma exeeni arumeyi awe?
- Yooveka xeeni Daniyeli enipaka awe voohimya sa yoolya ni yoowurya wa owo mmensawe ni wa apatthani awe araruu?
- Nuumala olya mathaapa mahiku muloko, onooneya sai Daniyeli ni apatthani awe araruu moowaalikanyiha amiravo akina?
- Daniyeli ni apatthani awe araruu aphiiye sai mu empa ya mwene, ni mmukhalelo xeeni ary’aya oolokexa waavikana anamukuttho ni alopwana aankhili?
Makoho oowuncererya
- Mmusome Daniyeli 1:1-21.
Wiimananiha wa muthinto xeeni onitthuneya, akhala wira ninlipelela okhoottela soweeha ni ovikana sootteettheya? (Dan 1:8; Maph 39:7, 10; aGal 6:9)
Mu iphiro xeeni waaniheryasa amiravo olelo anikhala aya ooweeherereya aahiiso ookhanyerereya wiinanarina ni yoolya yeeyo akina enoona aya okhala “yoosiva”? (Dan 1:8; Mir 20:1; 2 aKor 6:17-7:1)
Moota xeeni yoohimmwa ya Biibiliya voohimya sa amiravo axexee aHeberi ennikhaliherya aya voohimya sa ophavela okhalana osoma wa elapo? (Dan 1:20; Yes 54:13; 1 aKor 3:18-20)
