Aryeene wiipotthani oBabilonia, anaIsarayeli yaahikhalana soweeha sinceene sa nroromelo naya. Xadraki, Mesaki ni Abedi-Nego yaahiriheliwa munlittini na mooro wooviha, masi Muluku aahaakumiherya otaa awosa aryeene akumi. Valokenle ene, nuumala Babilonia oxinttiwa ni aMedia ni aPersia, Daniyeli aahiriheliwa munlittini na akharamu, Masi Muluku nave-tho aahimuxeererya owalaka iyano sa akharamu.

Wanikisa waya, mwene ooPersia Kiro aahataphula anaIsarayeli. Awo yaahitthikela elapo aya sivinreene iyaakha 70 soomalela nuumala okuxiwa aroihiwaka oBabilonia ntoko oovariwa. Emosaa ya itthu soopacerya seiyo awo saapanka aya vaavo vaatthikenlya aya oYerusalemu yaari opaceriha oteka empa ya Yehova. Masi, niinanoru anyokhani yaahemexa muteko aya. Siiso saari iyaakha sowiiraka 22 nuumala otthikela oYerusalemu vaavo awo wanikisa waya vaamalinha aya empa ya Muluku.

Moottharelana, nniixutta sa mukwaha wa Eezira wootthikela oYerusalemu orowa oreeriha empa ya Muluku. Ela yaari vattuli va iyaakha soophiyeryaka 47 nuumala omalihiwa otekiwa empa ya Muluku. Nto, iyaakha 13 vattuli va mukwaha a Eezira, Nehemiya aahikhaliherya oteka-tho ixirii sa Yerusalemu oonyaanyeya. Mpantta wa NEETHANU onihela muhina iyaakha 152 sa soowiiraneya mpakha okathi ola.