EXEENI eniiraneya va? Atthu ala animoolya vaniirani nuulupale. Mwene ooBabilonia ohaalattula atthu ootthuneya ekonto emosaa. Awo anivarihela muteko ikoopho sa eweero ni sa eparatha ni mihasa sikuxiwe mu empa ya Yehova oYerusalemu. Masi, mootutuxerya, ikatha sa ntata na mutthu sahikhumelela musuluu ni inapacerya olepa vaxirini. Ori otheene orii oowoova.

Balthazari, musulwa awe Nabukhodonosori, vano tokhanle mwene. Owo onirumiha wira aruuhiwe atthu awe amiruku. ‘Ori otheene yoowo oniwerya osoma yoolempwa ela ni okileela yootaphulela aya,’ onnihimya mwene, ‘onrowa ovahiwa sootthuvela sinceene ni onrowa opakiwa okhala mutthu oolamulela ootthuneya a neeraru moomweneni.’ Masi khuuvo mutthu amiruku oniwerya osoma yoolempwa vaxirini, nnakhala ohimya yootaphulela aya.

Maama awe mwene onniiwa onyakula, nto onnikela mu esaala yuulupale ya yoolya. ‘Xontte muhikhale owoovexa,’ owo onnihimya wa mwene. ‘Ookhala mulopwana mmosaa moomweneni mwanyu onaasuwela amuluku ootteela. Vaavo atatinyu aNabukhodonosori vaary’aya mwene awo yaahimpaka okhala mukhulupale a atthu aya otheene oosuwela. Nsina nawe ti Daniyeli. Mmwiitthane, nto owo onrowa wooleelani sintaphulela aya sotheene iya.’

Siiso niinanoru Daniyeli onniruuhiwa. Nuumala okhootta okuxa yootthuvela eri yotheene, Daniyeli onnipacerya ohimya nthowa naya Yehova mukwaha mukina vaamukuminha awe taata awe Balthazari, Nabukhodonosori okhala mwene. ‘Owo aari oowiixinnuuha vanceene,’ onnihimya Daniyeli. ‘Nto Yehova aahimuhukhumu.’

‘Masi nyuwo,’ onnihimya Daniyeli wa Balthazari, ‘moosuwela sotheene simwiranenle, ni nyuwo nlelo murii oowiixinnuuha siisaale saary’awe Nabukhodonosori. Nyuwo mooruuha ikoopho ni mihasa sa empa ya Yehova ni owurerya iyo. Nyuwo muhaavuwiha amuluku oopakiwa ni mirii ni miyala, ni khimmuttittiminhe Mpattuxa ahu Muulupale. Nna ti nthowa naya Muluku oruminha awe ntata olepa masuu ala.

‘Elempwale tiila,’ onnihimya Daniyeli: ‘MENE, MENE, TEKEL ni PARSIN.’

‘MENE enitaphulela wira Muluku ohaalikela mahiku a omwene anyu ni opixa wanikisa. TEKEL enitaphulela wira moophimmwa vabalansani ni mupwanyiwa okhala oohiloka. PARSIN enitaphulela wira omwene anyu oovahiwa aMedia ni aPersia.’

Daniyeli nlelo oriki olavula, aMedia ni aPersia annipacerya omutuphela Babilonia. Awo annikuxa muttetthe ni omwiiva Balthazari. Soolempwa ni ntata vaxirini sinnaakhwanela ohiyu yoole! Masi exeeni enirowa owiiraneela anaIsarayeli vano? Ninrowa woona niinano va, masi wanipacerya nrowee niwehee enimwiiraneela Daniyeli.

Daniyeli 5:1-31.