Mwaha 82: Mardokeyo Ni Estheri
NROWE ntthikele ottuli iyaakha vakhaani Eezira ohinatthi orowa oYerusalemu. Mardokeyo ni Estheri arii anaIsarayeli ootthuneya vanceene moomweneni wa oPersia. Estheri ti pwiyamwene, mmusi awe Mardokeyo ta nenli wa mwene mu olamulelo. Nrowee niwehee moota ela yiiranen’ya aya.
Axitiithi awe Estheri yaahikhwa owo oryeene mwaana ooyevexa, siiso-nto Mardokeyo aahaana omuhuwa. Asuwero, mwene ooPersia, ookhalana empa ya mwene mmuttetthe wa Susa, nto Mardokeyo ti mmosaa a arumeyi awe. Saana, nihiku nimosaa Vasthi mwaara a mwene khonimwiiwelela owo, siiso mwene onimuthanla mwaarawe a niinano wira okhalee pwiyamwene awe. Nyuwo munnimusuwela muthiyana yoowo onimuthanla awe? Aayo, ti mwali owo ooreera Estheri.
Nyuwo munnimoona mulopwana ola oowiixinnuuha yoowo atthu awo ommuuramela aya? Ola ti Hamani. Owo ti mutthu ootthuneya vanceene oPersia. Hamani oniphavela wira Mardokeyo, yoowo muniwerya anyu onweha okilaathale ene va, wira omuuramele-tho. Masi Mardokeyo khoniphavela opaka ela. Owo khonuupuwela wira ti vooloka omuuramela mutthu ootakhala ntoko owo. Ela ennimwiiriha Hamani okhala oonanariwa vanceene. Nto ela ti etthu enipaka awe.
Hamani onimuleela mwene mowootha voohimya sa anaIsarayeli. ‘Awo arii atthu ootakhala yaawo ahiniiwelela malamulo anyu,’ owo onnihimya. ‘Awo ahaana wiiviwa.’ Asuwero khonisuwela wira Estheri mwaarawe ti muIsarayeli. Siiso owo onninwiriyana Hamani, nto onniiriha opakiwa nlamulo noowi nihiku nikina anaIsarayeli otheene anrowa wiiviwa.
Vaavo Mardokeyo vaniiwa awe sa nlamulo nna, owo orii ooriipiwa murima vanceene. Owo onirumiha muhupi wa Estheri wira: ‘Nyuwo muhaana omuleela mwene, ni munvekele wira onoopole.’ Ela ti yoovaanyihana ni nlamulo na oPersia orowa woonana ni mwene vahikhanle wira muroolattuliwa. Masi Estheri onirowa ohilattuliwe. Mwene onikuxa ekopo awe ya eweero khimukwata, mwa yeeyo onooniherya wira khonrowa wiiviwa. Estheri ommulattulela yoolya yuulupale mwene ni Hamani. Vale mwene onimukoha Estheri yooreera eniphavela awe. Estheri onihimya wira owo onrowa omuhimeerya akhala wira mwene ni Hamani anrowa orwa va yoolya ekina nihiku noottharelana.
Va yoolyani vale Estheri onimuleela mwene wira: ‘Nloko naka ni miyo ninrowa wiiviwa.’ Mwene oonanariwa. ‘Tanii ohinoova opaka etthu eyo?’ owo onnikoha.
‘Mutthu owo, munyokhani, mutakhali ola Hamani!’ Estheri onnihimya.
Vano mwene oonanariwa tthiri. Owo onilamula wira Hamani ohaana wiiviwa. Nuumala vo, mwene onimpaka Mardokeyo okhala a nenli mu owerya; masi mwene paahi torina owerya wuulupale. Vattuli vaya Mardokeyo oniiriha wira nlamulo nsyaa nipakiwe ninweemererye anaIsarayeli owana ekhotto mwaha wa ikumi saya mu nihiku naarowa aya wiiviwa. Okhala wira Mardokeyo vano mutthu ootthuneya, atthu anceene annaakhaliherya anaIsarayeli, ni awo annoopoliwa mu anyokhani aya.
Eliivuru ya Biibiliya ya Estheri.
Makoho
- Mardokeyo ni Estheri tanii?
- Nthowa xeeni Mwene Asuwero vanimphavela awe mwaarawe musyaa, ni onimuthanla aani?
- Hamani tanii, ni exeeni enimwiiriha okhala oonanariwa vanceene?
- Nlamulo xeeni nimpakiwa, nto Estheri onipaka exeeni nuumala waakhela muhupi onikhuma wa Mardokeyo?
- Exeeni enimwiiraneela Hamani, nto exeeni enimwiiraneela Mardokeyo?
- Anoopoliwa sai anaIsarayeli wa anyokhani aya?
Makoho oowuncererya
- Mmusome Estheri 2:12-18.
Estheri oonihenrye sai otthuneya waya wunnuuherya ‘murima woomaala ni wa murettele’? (Esth 2:15; 1 Ped 3:1-5)
- Mmusome Estheri 4:1-17.
Ntoko siisaale Estheri saavahiwa awe okathi wooreerela mu ovara muteko mookhaliherya okokhorela wekeekhai, okathi xeeni wooreerela orina ahu olelo mu wooniherya wiivahererya wahu ni ororomeleya wa Yehova? (Esth 4:13, 14; Mat 5:14-16; 24:14)
- Mmusome Estheri 7:1-6.
Moota xeeni atthu anceene a Muluku olelo anileva aya okumi mu ottharatthariwa, ntoko siiralya awe Estheri? (Esth 7:4; Mat 10:16-22; 1 Ped 2:12)
