Nlaikha Gabriyeli naahirummwa wa mwali a mukhalelo wooloka iihaniwa Maria. Nna naahimuleela wira aarowa okhalana mwaana yoowo onrowa olamulela ntoko mwene moohimala. Mwaana owo, Yesu, aayariwe munikholwani, weiwo amakampusi yaamuxukunrya aya. Vattuli vaya, etheneeri yaahaahoola alopwana okhuma Onikhuma Nsuwa mpakha wa mwaana owo mwaamukhaani. Hiyo ninrowa wiixutta sa yoole iirinhe wira awehe etheneeri, ni moota Yesu soopoliwa awe mu soomananiha sa omwiiva.

Moottharelana, nnimphwanya Yesu, vaavo vaarina awe iyaakha 12, olavulaka mu empa ya Muluku ni awiixuttiha. Iyaakha mulokoo ni thanuu na tthaaru vattuli vaya Yesu aahibatiziwa, nto nuumala vo aahipacerya olaleerya Omwene ni muteko wa wiixuttiha yoowo Muluku aamurummya awe wira ovare mulaponi. Wira okhaliheriwe mmuteko ola, Yesu aahaathanla alopwana 12 ni aahaapaka awosa okhala arummwa awe.

Nave-tho Yesu aahipaka mitikiniho sinceene. Owo aahilyiha ikonto-ikonto sene sa atthu ni ihopa ni iphaawu vakhaani paahi. Owo aahaavoniha yaawereiwa ni hataa-tho waahihimuxa ookhwa. Wanikisa waya, ninrowa wiixutta sa itthu sinceene seiyo saamwiiranenle Yesu okathi wa nihiku nookiserya na okumi awe, ni moota saiviwa awe. Yesu aahilaleerya iyaakha soophiyeryaka tthaaru ni nuusu, siiso MPANTTA 6 onihela muhina okathi onivikana vakhaani iyaakha 34.