MUNWEHEKE mwammiravo owo onilavula ni atthu oowunnuwela. Awo arii awiixuttihi a empa ya Muluku oYerusalemu. Nto mwammiravo owo ti Yesu. Owo ohinnuwa vanceene. Vano orina iyaakha 12.

Awiixuttihi arii ootikinihiwa vanceene okhala wira Yesu onnisuwela sinceene sa Muluku ni itthu silempwale mBiibiliya. Masi xeeni Yosefe ni Maria vahikhanly’aya-tho va? Arii wuuwi? Nrowee noone.

Khuta mwaakha Yosefe oniruuha emusi awe oYerusalemu mwaha wa wuupuwelela wavameekh’aya oniitthaniwa Paasikha. Ola mukwaha woorakama okhuma oNazarethi orowa oYerusalemu. Khuuvo orina ekaaro, ni khakhanle akomboi. Awo khiyaarina mmahiku ale. Anamunceene a atthu yaamweetta, nto annimaliha mahiku mararuu wira aphiye oYerusalemu.

Okathi ola Yosefe ookhalana emusi yuulupale. Siiso aakhala anna akina ooyeveela ni arokora a Yesu wira aakhapeleleke. Saana, mwaakha ola Yosefe ni Maria yaakhumme ni anaaya mmukwaha woorakama wootthikela owaani oNazarethi. Awo anuupuwela wira Yesu orii ni atthu akina mmukwahani. Masi vaavo awo vaneemela aya wanikisa wa nihiku, awo khanimphwanya Yesu. Awo animuhaayasa eriyari ya amusi aya ni apatthani, masi owo kaakhanle n’awo! Siiso awo anitthikela oYerusalemu wira amuhaayase iwe.

Wanikisa waya animphwanya Yesu va ni awiixuttihi. Owo onimwaawiriyana ni opaka makoho. Nto atthu otheene arii ootikinihiwa mmoota Yesu siry’awe oosuwela. Masi Maria onihimya so: ‘Mwanaka, muniirelenle-ni siisa? Paapa anyu ni miyo nrii ooxankiheya neereryaka woophwanyani.’

‘Xeeni mwaakiphavela anyu?’ Yesu onnaakhula. ‘Khimwaasuwela wira kaahaana okhala mpaani mwa Atiithi aka?’

Aayo, Yesu onnisiveliwa okhala vale vaniwerya awe wiixutta sa Muluku. Ola khahiyo moota yoowo hiyo naakela ahu woonelaka-tho? Otthikenle ene owaani oNazarethi, Yesu anrowa omithukumanoni wira okokhorela khuta esumana. Okhala wira okathi wotheene aanivaha ephoole, owo aahiixutta itthu sinceene sa Biibiliya. Nikhalee ntoko Yesu ni ntthare ntakiheryo nawe.

Luka 2:41-52; Mateyo 13:53-56.