Mwaha 90: Ni Muthiyana Veehimeni
YESU aaheemela wira omumule veehimeni oSamariya. Awiixutti awe yaaronwe omuttettheni othuma yoolya. Muthiyana yoowo Yesu onilavulan’awe orwiiye orika maasi. Yesu onimuhimeerya wira: ‘Mukivahe maasi kiwurye.’
Ela ennimutikiniha vanceene muthiyana owo. Nyuwo munnisuwela nthowa naya? Okhala wira Yesu muYuda, nto muthiyana owo muSamariya. Nto anamunceene a aYuda khanaatthuna aSamariya. Awo khaniphavela hataa olavulana! Masi Yesu onnaaphenta atthu a mithinto sotheene. Siiso owo onihimya wira: ‘Vaakhanleke wi nyuwo munnimusuwela tanii onoovekelani maasi, nyuwo mwaamunvekela owo ni owo aamoovahani maasi anivaha okumi.’
‘Pwiya,’ onnihimya muthiyana owo, ‘ehime ela ti yoowiixa, nto nyuwo khamurina yoorikana maasi. Nyuwo munrowa ophwanya wuuwi maasi ala anivaha okumi?’
‘Akhala wira nyuwo munrowa owurya maasi anikhuma veehimeni va, nyuwo munrowa ovoliwa ntthona vasyaa-tho,’ onnitthokiherya Yesu. ‘Masi maasi kinrowa aka ovaha anoowerya omwiiriha mutthu okhala moohimala.’
‘Pwiya,’ onnihimya muthiyana owo, ‘mukivahe maasi yaawo! Nto nkinrowa ovoliwa ntthona vasyaa-tho. Ni nkintthuneya orwa-tho va wira kirike maasi.’
Muthiyana owo onuupuwela wira Yesu onilavula sa maasi ene tthiri. Masi owo onilavula sa ekeekhai voohimya sa Muluku ni omwene awe. Ekeekhai ela enilikana ni maasi anivaha okumi. Ela enoowerya onvaha mutthu okumi woohimala.
Vano Yesu onimuleela muthiyana wira: ‘Murowee ni mwamwiitthane iyanyu ni murwaase.’
‘Miyo nkirina iyaka,’ owo onnaakhula
‘Nyuwo muhaakhula saana,’ onnihimya Yesu. ‘Masi nyuwo mwaahikhalana axiiyanyu athanuu, ni mulopwana onikhalana anyu niinano va khahiyo iyanyu.’
Muthiyana orii ootikinihiwa, okhala wira itthu iya sotheene ti sa ekeekhai. Yesu aasuwenle sai itthu iya? Aayo, okhala wira Yesu ti Oolaiheriwa oorummwa ni Muluku, nto Muluku onninvaha osuwela nno. Okathi ene yoola awiixutti a Yesu annitthika, nto awo annitikinihiwa mwaha woowi owo onilavula ni muthiyana muSamariya.
Exeeni nniixutta ahu mu sotheene iya? Ela enooniherya wira Yesu onnaareerela murima atthu a maloko otheene. Nto hiyo ninreerela okhala siiso-tho. Hiyo khinintthuneya wuupuwelaka wira atthu akina arii ootakhala paahi mwaha woowi awo ta nloko nikina. Yesu oniphavela wira atthu otheene asuwele ekeekhai eniroiha wookumini woohimala. Nto hiyo-tho nanreerela ophavela waakhaliherya atthu wiixutta ekeekhai.
Yohani 4:5-43; 17:3.
Makoho
- 1. Nthowa xeeni Yesu eemenlya awe veehimeni ya oSamariya, ni exeeni enimuhimeerya awe muthiyana ole vale?
- Nthowa xeeni muthiyana owo ory’awe ootikinihiwa, Yesu onimuleela exeeni, ni nthowa xeeni?
- Muthiyana ola onuupuwela wira Yesu onihimya maasi a muthinto xeeni, masi mwekeekhai maasi awo anitaphulela exeeni?
- Nthowa xeeni muthiyana owo onitikhina awe wira Yesu onnisuwela sa owo, ni Yesu aasuwenle sai ela?
- Itthu xeeni sinwerya ahu wiixutta mu soohimmwa sa muthiyana veehimeni?
Makoho oowuncererya
- Mmusome Yohani 4:5-43.
Nttharaka ntakiheryo na Yesu, muupuwelelo xeeni waatthuneya ahu wooniherya wa atthu a nloko nikina aahiiso ihuweliwo sikina? (Yoh 4:9; 1 aKor 9:22; 1 Tim 2:3, 4; Tito 2:11)
Mireerelo xeeni soomunepani siniphwanya awe mutthu yoole onikhala mwiixutti a Yesu? (Yoh 4:14; Yes 58:1.
Moota xeeni ninwerya ahu wooniherya osiveliwa ntoko muthiyana muSamariya, yoowo aari oophavelexa waaleela akina ele yiixuntta awe? (Yoh 4:7-8, 28; Mat 6:33; Luk 10:40-42)1; 2 aKor 4:16)
You May Also Like
YESU TI EPHIRO, EKEEKHAI NI EKUMI
Yesu Aahimwiixuttiha Muthiyana muSamariya
Yesu aahimuleela muthiyana ole etthu ahaaleelale awe atthu akina.
