Mwaha 98: Vamwaako Wa Olivera
OLA Yesu vaMwaako wa Olivera. Alopwana axexee orina awe ti arummwa awe. Awo ti anna Andreya ni Pedru, ni-tho anna Yakobo ni Yohani. Ele eniwerya anyu woona vale empa ya Muluku muYerusalemu.
Aavira mahiku manli okhuma vaavale Yesu vaaronwa awe oYerusalemu onwenle ene mwaabuuru. Nna nihiku na Namanli. Mmeeloni mwaya voosiisu Yesu aari mpaani mwa Muluku. Vale alipa a mukuttho yaaheererya onvara Yesu wira amwiive. Masi awo yaahoova opaka ela okhala wira atthu yaanisiveliwa ni Yesu.
‘Inowa nyuwo ni anamwane a inowa!’ Yesu aahiwiitthana siiso ahooleli ale a itiini. Nuumala vo Yesu aahihimya wira Muluku onrowa waahukhumu mwaha wa itthu sotheene sootakhala seiyo sivanrya aya. Vattuli vaya Yesu aahiwela vaMwaako wa Olivera, nuumala vo, arummwa ala axexee yaahipacerya opaka makoho. Nyuwo munnisuwela yeeyo enimukoha aya Yesu?
Arummwa anikoha voohimya sa itthu sa muhoolo. Awo annisuwela wira Yesu onrowa omaliha otakhala wotheene mulaponi. Masi aniphavela wira asuwele silinii vanrowa aya wiiraneya ela. Silinii vanrwa awe-tho Yesu wira olamulele ntoko Mwene?
Yesu onnisuwela wira atthareli awe mulaponi khanrowa okhala oowerya omoona vaavo vanrwa awe-tho. Nthowa noowi onrowa okhalaka wirimu, nto awo khanrowa okhala oowerya omoona iwe. Siiso Yesu onaaleela arummwa awe itthu sikina seiyo sinrowa wiiraneya mulaponi vaavo vanilamulela awe ntoko Mwene wirimu. Tisivi imosaa sa itthu iya?
Yesu onihimya wira vanrowa okhala ikhotto suulupale, atthu anceene anrowa owereiwaka ni ovoliwa etala, otakhala onrowa otepa vanceene, ni sinrowa okhala itetere suulupale. Yesu nave-tho onihimya wira ihapari sooreera sa omwene wa Muluku sinrowa olaleeriwa mapuro otheene mulaponi. Niireke wi hiyo ninnoona itthu iya siiraneyaka okathi ahu ola? Aayo! Nto siiso hiyo nnoowerya osuwelexa wira Yesu orii vano olamulelaka wirimu. Moohipisa owo onrowa omaliha otakhala wotheene mulaponi.
Mateyo 21:46; 23:1-39; 24:1-14; Marko 13:3-10.
Makoho
- Mwa alopwana awo ari valataratoni va, Yesu puuvi, nto awo arina awe tanii?
- Alipa a mukuttho yeerenrye omwiiriha exeeni Yesu mu empa ya Muluku, nto Yesu aaleelale exeeni?
- Arummwa animukoha exeeni Yesu
- Nthowa xeeni Yesu vanaaleela awe arummwa awe itthu sikina seiyo sinrowa wiiraneya mulaponi vaavo vanilamulela awe ntoko Mwene wirimu?
- Exeeni Yesu enihimya awe wira enrowa wiiraneya ohinatthi opixa wanikisa wa otakhala wotheene mulaponi?
Makoho oowuncererya
- Mmusome Mateyo 23:1-39.
Nnaamwi Soolempwa sooniheryaka wira ti vookhalela ovariheliwa muteko masina a nttittimiho, masuu a Yesu mMateyo 23:8-11 anooniherya exeeni voohimya sa ovarihela muteko masina oonyoholela mmulokoni mwa eKristau? (Mit 26:25; aRom 13:7; 1 Ped 2:13, 14)
Exeeni aFarisi yaarumenlya aya wira yeererye waakhoottiherya atthu okhala maKristau, ni moota xeeni ahooleli a itiini anirumeela aya ephiro emosaru okathi ola? (Mat 23:13; Luk 11:52; Yoh 9:22; 12:42; 1 aTes 2:16)
- Mmusome Mateyo 24:1-14.
Moota xeeni ottittimiheriwa aya mu Mateyo 24:13 otthuneya waya ovilela?
Anitaphulela exeeni masu oowi “wanikisa” mu Mateyo 24:13? (Mat 16:27; aRom 14:10-12; 2 aKor 5:10)
- Mmusome Marko 13:3-10.
Masu xeeni mu Marko 13:10 anooniherya waakuveya waya olaleerya ihapari sooreera, nto masu ala a Yesu yaatthuneya onivaraka sai? (aRom 13:11, 12; 1 aKor 7:29-31; 2 Tim 4:2)
You May Also Like
YESU TI EPHIRO, EKEEKHAI NI EKUMI
Arummwa Yaahinvekela Yesu Ethoonyeryo
Wanipacerya, eprofesia ya Yesu yaahiiraneya eseekulu yoopacerya. Niireke yaamukhalana wiiraneya wuulupale muhoolo mwaya?
