Nihiku na neeraru nuumala okhwa wawe, Yesu aahihihimuxiwa. Nihiku nenno aahooneya wa atthareli awe mu ikwaha thanuu soovirikana. Yesu aahivikaniha wooneya wa awosa mmahiku 40. Nuumala vo, nlelo awiixutti awe akina ariki munweha, Yesu aahiwela wirimu. Mahiku mulokoo vattuli vaya Muluku aahiyiiherya munepa wootteela wa atthareli a Yesu yaalipelela muYerusalemu.

Vattuli vaya, anyokhani a Muluku yaahiwiiriha arummwa ovonyeriwa mukhatteya, masi nlaikha naahaataphula. Mwiixutti Siteefano aahivonyakasiwa maluku ni anamavaanyiha mpakha okhwa. Masi hiyo ninniixutta moota Yesu saamuthanlalya awe mmosaa aanamavaanyiha wira okhalee murumeyi awe a vameekh’aya, nto owo aahikhala murummwa Paulo. Nuumala vo, iyaakha tthaaru ni nuusu vattuli va Yesu okhwa, Muluku aahimurumiha murummwa Pedru wira amulaleerye Kornelio oohikhala muYuda ni atthu a vatthokoni vawe.

Vattuli va iyaakha 13, Paulo aahipacerya mukwaha awe woopacerya wa olaleerya. Mmukwaha awe wa nenli Timooteyo aahiitakaaha ni Paulo. Hiyo ninniixutta moota Paulo ni apatthani awe a mukwaha, yaakhalanne aya okathi munceene woohakalaliha amurumeelaka Muluku. Wanikisa waya, Paulo aahikelihiwa mukhatteya oRoma. Iyaakha piili vattuli vaya onnitaphuliwa, masi nuumala vo aahikelihiwa-tho mukhatteya ni wiiviwa. Sowiiraneya sa MPANTTA 7 siiranen’ye mu okathi wa iyaakha 32.