MULOPWANA ola okhoromme va ti Siteefano. Owo ti mwiixutti oororomeleya a Yesu. Masi nkawehani ele enimwiiraneela vano! Alopwana ala aninvonyakasa ni maluku maalupale. Nthowa xeeni vanimunyokha aya vanceenexa Siteefano mpakha opaka etthu yootakhala ntoko ela? Nrowee niwehee.

Muluku onnimukhaliherya Siteefano opaka miriira sootikiniha. Alopwana ala khamphavela ela, siiso-nto anninyakulihana n’uwo mwaha wa owiixuttiha wawe atthu ekeekhai. Masi Muluku onninvaha Siteefano miruku suulupale, ni Siteefano onnooniherya wi alopwana ala aniixuttiha itthu soowoka. Ela enniwiiriha awosa onanariwa mowuncerereya. Siiso anninvara owo, ni anneetthana atthu wira ahimye itthu soomootherya.

Muulupale aalipa a mukuttho onnimukoha Siteefano wira: ‘Itthu iya ekeekhai?’ Siteefano onnaakhula orweela mwa olavula mwaha ooreera vanceene onikhuma mBiibiliya. Wanikisa waya ela, owo onnaaleela moota alopwana ootakhala saanyonkhe aya maprofeta a Yehova khalai. Nuumala vo onihimya so: ‘Nyuwo tthiri munlikana ni alopwana yaale. Nyuwo moomwiiva Yesu murumeyi a Muluku, ni khimwiwelenle malamulo a Muluku.’

Ela enniwiiriha ahooleli ala a itiini okhala oonanariwa vanceene! Awo annilumanyiha maino aya mwaha wa owali. Masi nuumala vo Siteefano onittukhulela muruu awe musuluu, ni khiyahimya so: ‘Nkawehani! Kinimoona Yesu eemenle ene moono woolopwana wa Muluku wirimu.’ Mwa yeela, alopwana ala annittiyela maaru ni matata aya ni annimutuphela Siteefano. Awo anninvara ni ompurulela otaa wa epooma.

Va, awo annirula malaya aya ni anamunnya mmiravo Saulo wi okhapeleleke. Nyuwo munnimoona Saulo? Nuumala vo akina a alopwana awo annipacerya onvonyakasa maluku Siteefano. Siteefano onnikhoroma, ntoko nyuwo siniwerya anyu woona, ni onivekela wa Muluku oriki: ‘Yehova, muhaahukhumu awosa mwaha wa etthu ela yootakhala.’ Owo onnisuwela wira akina a yaawo awokiwe ni ahooleli a itiini. Vattuli vaya Siteefano onnookhwa.

Vaavo mutthu mukina vaniwiirelaweni etthu yootakhala, nyuwo muneererya omuttikiherya munvulalihaka, aahiiso muninvekela Muluku wira onvulalihe? Eyo khahiyo etthu yaapanke awe Siteefano aahiiso Yesu. Awo yaari ooreerela murima hataa wa atthu yaawo yahaareerela murima. Nrowee neererye otthara ntakiheryo naya.

Miteko 6:8-15; 7:1-60.