Mwaha 112: Onyaanyeya Wa Ekalawa Vasisironi
NKAWEHANI! Ekalawa eyo erii mmuxankihoni! Enoonyaanyeya! Nyuwo munniwoona atthu awo atuphenle mmaasini? Akina anookatelela arowaka okuluttuni. Ole ori valee Paulo toko? Nrowee niwehee enimwiiraneela.
Muupuweleke, mu iyaakha piili Paulo onikuhiwa mukhatteya oKesareya. Nuumala vo owo ni anamutthukiwa akina aniheliwa mukalawani, nto annipacerya mukwaha woorowa oRoma. Vaavo vanivira aya vakhiviru va esisiro ya oKereta, munamukhaya ootakhala onnaamana awosa. Epheyo ennoopa vaalupalexa tivonto alopwana awo khanwerya weettiha ekalawa eyo. Ni awo khanwerya woona nsuwa othana aahiiso itheneeri ohiyu. Wanikisa waya, nuumala mahiku manceene, alesa ari mukalawani annooceela yoolipelela eri yotheene ya woopoliwa.
Nuumala vo Paulo onneemela ni khiyahimya so: ‘Khuuvo a nyuwo onrowa oyeleela okumi awe; paahi ekalawa tenrowa oyeleeleya. Aayo ohiyu ovinre nlaikha nimosaa na Muluku naahirwa wa miyo ni khohimya wira, “Muhoove, Paulo! Nyuwo muhaana weemela ohoolo wa Ceesari namalamulela muRoma. Nto Muluku onrowa owoopola otheene yaale aneetta ni nyuwo mukalawani.”’
Ohiyu eriyari nihiku na 14 nuumala munamukhaya opacerya, mamalinyero yaahoona wira maasi yaahipacerya okhala oohiixa! Mwaha wa woova opwexana ni maluku mweepiphini, awo annaarihela ankura aya. Mmeeloni mwaya voosiisu annoona etthaya. Awo anithanla weererya weettiha ekalawa aluluwanyaka oxerexere vale wa ephareya.
Saana, vaavo vanaattamela aya okuluttuni, ekalawa eyo ennimana nttumuxa na mihaava ni khuphara. Nuumala vo mampili annipacerya opwexa ekalawa, ni ekalawa eyo ennipacerya onyaanyeya. Mukhulupale aanakhotto onihoolela onihimya so: ‘Otheene a nyuwo yoole oniwerya okatelela opaceryeke otuphela mphareya ni okateleleke orowaka okuluttuni. Nyuwo oohalela mutupheleke nuumala awosa, ni nvareleleke ipasulela sa ekalawa wira mphempeke.’ Nto ela ti etthu eniira aya. Mmukhalelo ola atthu otheene 276 yaawo yaari mukalawani anniphiya okuluttuni oowoopowa, ntoko siisaale saaleihenrya aya nlaikha nne.
Esisiro eyo eniihaniwa Malta. Atthu tooreera murima vanceene, ni awo annaakhapelela otheene yaale anikhuma mukalawani. Vaavo munamukhaya vanimala awe, Paulo onniheliwa ekalawa ekina ni onakuxiwa onaroihiwa oRoma.
Miteko 27:1-44; 28:1-14.
Makoho
- Exeeni eniiraneya ni ekalawa ery’awe Paulo vaavo vanivira aya vakhiviru va esisiro ya oKereta?
- Paulo onaaleela exeeni ale ari mukalawani?
- Moota xeeni ekalawa eninyaanyeya aya?
- Malakiheryo xeeni mukhulupale aanakhotto anivaha awe, ni atthu anceene aniphiya sai okuluttuni oowoopowa?
- Nsina naya tanii esisiro yeeyo aniphiya aya, ni exeeni enimwiiraneela Paulo vaavo munamukhaya vanimala awe?
Makoho oowuncererya
- Mmusome Miteko 27:1-44.
Moota xeeni onilipa aya ororomela wahu mu waakhwanela wa Biibiliya vaavo vanisoma ahu yoohimmwa ya mukwaha wa Paulo woorowa oRoma? (Mit 27:16-19, 27-32; Luk 1:3; 2 Tim 3:16, 17)
- Mmusome Miteko 28:1-14.
Okhala wira amalapo yaakhala oMalta yaahikuxeya murima mu omukhaliherya Paulo ni apatthani awe a mukalawani ni ‘othokorerya wuulupale,’ maKristau yaatthuneya okuxeyaka murima mu wooniherya exeeni, nto mwavameekh’aya mmukhalelo xeeni? (Mit 28:1, 2; aHeb 13:1, 2; 1 Ped 4:9)
