Mwaha 115: Eparayiisu Esya Mulaponi
NKAWEHANI mirii iye soorakama, ithutuu sooreera ni miyaako soorakama. Khahiyo vooreera va? Nweheke moota epaala enilya aya mmatatani mwa mwammiravo. Ni mwaaweheke amwatto ni ikhavalo seemenle ene vamalaxini vale. Khimwaaphavela nyuwo okhala mu empa mu nipuro ntoko nna?
Muluku oniphavela wira nyuwo mukhalee ni okumi woohimala mparayiisu valaponi. Ni owo khoniphavela wira nyuwo mooneke owereya ni ohaawa weiwo onaahaaxa atthu olelo va. Natiri a Biibiliya wa ale anrowa okhalaka mparayiisu esyaa tuula: ‘Muluku onrowa okhala n’awo. Khivanrowa okhala-tho okhwa aahiiso wunla nnakhala ohaawa. Itthu sa khalai soovira.’
Yesu onrowa ottittimiherya wira murukunuxo ola woohakalaliha wiiraneye. Nyuwo munnisuwela silinii? Aayo, vattuli va owo okumiha mulaponi otakhala wotheene ni atthu ootakhala. Nkuupuwelani, vaavo Yesu aary’awe mulaponi owo aahaavoniha atthu a mithinto sotheene sa iretta, ni hataa waavenxa atthu mwaalipa-ookhwa. Yesu aahipaka ela wira ooniherye yeeyo enrowa awe opaka mulaponi motheene vaavo vanikhala awe Mwene a omwene wa Muluku.
Nkahaya muupuwelele moota vanrowa aya okhala voohakalaliha mparayiisu esyaa mulaponi! Yesu, vamosaa ni akina a yaale onaathanla awe, anrowa olamulelaka wirimu. Anamalamulela ala anrowa waakhapelelaka otheene mulaponi, ni osuwelexa wira awo arii oohakalala. Nrowee niwehee yeele hiyo enitthuneya ahu opaka, wira nttittimiherye wi Muluku onrowa onivaha okumi woohimala mparayiisu awe musyaa.
Wisupulula 21:3, 4; 5:9, 10; 14:1-3.
Makoho
- Mikhalelo xeeni Biibiliya sinooniherya awe wira ninrowa ohakalalela mParayiisu valaponi?
- Natiri xeeni a Biibiliya wa yaale anikhala mParayiisu?
- Yesu onrowa ottittimiherya silini wira murukunuxo ola woohakalaliha wiiraneye valaponi?
- Vaavo Yesu vaary’awe valaponi, aapanke exeeni wira ooniherye yeele yaarowa awe opaka ntoko Mwene a Omwene wa Muluku?
- Yesu ni anamalamulela akhw’awe a wirimu anrowa ottittimiherya exeeni vaavo ari wirimu vanilamulela aya elapo?
Makoho oowuncererya
- Mmusome Wisupulula 5:9, 10.
Nthowa xeeni vaniwerya ahu ororomela wira ale anilamulela elapo okathi wa Olamulelo wa Iyaakha Ekonto Emosaa wira anrowa okhala anamukuttho ni mamwene oosivela ni oomoriwa ikharari? (aEf 4:20-24; 1 Ped 1:7; 3:8; 5:6-10)
- Mmusome Wisupulula 14:1-3.
Enithoonyerya xeeni mwaha woowi nsina na Tiithi ni Mwaapwittipwitthi noolempwa vayuuci va 144.000? (1 aKor 3:23; 2 Tim 2:19; Wis 3:12)
