NYUWO munoowerya ohimya yeeyo mwanamwane ola muthiyana ni apatthani awe enisoma aya? Aayo, ela eliivuru eenexa yeeyo enisoma anyu—Eliivuru Aka ya Miyaha sa Biibiliya. Nto awo anisoma mwah’enexa yoowo nyuwo onisoma anyu—“Moota Sintthuna Ahu Owerya Okhala Moohimala.”

Nyuwo munnisuwela yeeyo eniixutta aya? Wanipacerya, wi hiyo nintthuneya osuwela sa Yehova ni Mwanawe Yesu akhala wira nimphavela okhala moohimala. Biibiliya onihimya so: ‘Ela ti ephiro ya okhala moohimala. Wiixutta sa Muluku mmosaa paahi eekeekhai, ni Mwanawe yoowo aamuruminha awe mulaponi, Yesu Kristu.’

Ninrowa wiixutta sai sa Yehova Muluku ni Mwanawe Yesu? Ephiro emosaa orii osoma Eliivuru Aka ya Miyaha sa Biibiliya, okhuma wanipacerya mpakha wanikisa. Ela enninleela sinceene sa Yehova ni Yesu, khahiyo siiso? Nto ela enninleela sinceene sa itthu seiyo sipanka aya ni itthu seiyo nlelo sinrowa aya opaka. Masi hiyo nintthuneya opaka sikina-tho ohiya paahi osoma eliivuru ela.

Nyuwo munniweha eliivuru ekina eri vathii? Ti Biibiliya. Munvekele mutthu mukina wira oosomeleni mipantta sa mBiibiliya sikumihiwa aya miyaha sa eliivuru ela. Biibiliya onninivaha soohimmwa sotheene siniphavela ahu, wira hiyo otheene niwerye omurumeela Yehova mu ephiro yooloka ni ophwanya okumi woohimala. Siiso, hiyo nohaana opaka okhala yoolimalela ya omusoma Biibiliya imaara sinceene.

Masi wiixutta paahi sa Yehova Muluku ni Yesu Kristu khoniphiyerya. Hiyo nanwerya okhalana osuwela wunceenexa voohimya sa awosa ni sowiixuttiha saya, ni nlelo khihiphwanya okumi woohimala. Nyuwo munnisuwela etthu ekina enitthuneya?

Hiyo-tho nintthuneya okhalaka moovarihana ni itthu siniixutta ahu. Nyuwo munnimuupuwela Yuda Isikaryoti? Owo aari mmosaa a 12 yaale Yesu aathanlalya awe wira akhalee arummwa awe. Yuda aahikhalana osuwela wunceene voohimya sa Yehova ni Yesu. Masi exeeni yaamwiiranenle? Ovinreene okathi owo aahikhala oowiitthuna, ni aahinvariha Yesu wa awanani awe ni musurukhu 30 wa eparatha. Siiso, Yuda khonrowa waakhela okumi woohimala.

Nyuwo munnimuupuwela Gehazi, mulopwana yoowo nimwiixuntta ahu mMwaha 69? Owo aahiphavela okhalana ikuwo sikina ni musurukhu seiyo sihaakhanle sawawe. Siiso aahilavula sowootha wira ophwanye itthu iya. Masi Yehova aahimuhukhumu. Nto owo onrowa onihukhumu-tho akhala wira hiyo khinniiwelela malamulo awe.

Masi aakhala atthu anceene ooloka yaawo okathi wotheene yaamurumenle Yehova moororomeleya. Hiyo nimphavela okhala ntoko yaawo, khahiyo siiso? Mwammiravo Samuweli ntakiheryo nooloka wira ntthareleke. Munnuupuwela, ntoko niwenha ahu mMwaha 55, owo aarina paahi iyaakha xexee aahiiso thanuu vaavo vaapacenrya awe omurumeela Yehova mutabernaakulu mwawe. Siiso, moohithokorerya oyeva wanyu, nyuwo khimuyevenxe-tho wira mmurumeele Yehova.

Mwekeekhai, mutthu yoowo hiyo otheene nintthuneya ahu omutthara ti Yesu Kristu. Hataa vaavo vaary’awe mmiravo, ntoko sinooniheriwaya mMwaha 87, owo aari mu empa ya Muluku olavulaka ni atthu akina voohimya sa Tiithi awe a wirimu. Nrowee nitthare ntakiheryo nawe. Nrowee naaleele atthu anceene nnaawerya ahu voohimya sa Muluku ahu ootikiniha Yehova ni Mwanawe, Yesu Kristu. Akhala wira hiyo nnoopaka itthu iya, nto hiyo nnoowerya okhala moohimala mparayiisu musyaa a Muluku, mulaponi.

Yohani 17:3; Esalimo 145:1-21.