Moolumo Oopacerya a Epantte 3
Iyaakha saattharelana nuumala Mutaaseke, Biibiliya onooniherya wira atthu vakhaani paahi ti yaamurumeela Yehova. Mwa atthu yaawo, aahikhala Abrahamu, yoowo aasuweliwa okhala mpatthani awe Yehova. Xeeni aahimmwa awe okhala mpatthani a Yehova? Akhala wira mwa namuyari, mmukhaliherye mwaninyu oweha wira Yehova onnimuthokorerya yena ni onniphavela omukhaliherya. Hiyo pooti onvekela Yehova nikhaliheryo, ntoko iirale awe Abrahamu, Lothi ni Yakobe, yaawo yaari oororomeleya. Nroromeleke wira Yehova onrowa opaka itthu sotheene onileiherya awe.
EPANTTE ELA
YOOSOMA 7
Empa Yoorakama ya oBabeli
Atthu akina yaahuupuwela oteka empa yoorakama yeeyo yaarowa ophiya wiirimu. Xeeni Muluku mootutuxerya aawiirinhe awe olavula mattaava oovirikana?
YOOSOMA 8
Abrahamu ni Sara Yaahimwiiwelela Muluku
Xeeni Abrahamu ni Sara yaahiyale aya empa aya enarowa okhalaka moothakoni oKanani?
YOOSOMA 9
Wanikisa Waya Yaahikhalana Mwaana!
Muluku aakhwanihenrye sai yooleiherya aamanenle awe Abrahamu? Mwaana aarowa wiirela mpantta yooleiherya eyo aarowa okhala Isakhi wala Iximayeli?
YOOSOMA 10
Mmuupuwele mwaarawe Lothi
Muluku aahikumiha mooro ni sófiri wiirimu ni aahipaha ipooma sa oSodoma ni oGomora. Xeeni ipooma iye saapwetexiwe aya? Xeeni nintthuneya ahu omuupuwela mwaarawe Lothi?
YOOSOMA 11
Waamini Wawe Waheehereriwa!
Muluku aahimuleela Abrahamu wira: ‘Mmukuxe Isakhi mwaninyu mmosene mmurowane omwaako Moriya mwamwiive mukivahe ntoko mukuttho’. Abrahamu aarowa weehereriwa sai waamini wawe?
YOOSOMA 12
Yakobe Aahaakhela Mareeliho
Isakhi ni Rebeka yaahikhalana anamwane anli Esawu ni Yakobe. Mwaha woowi Esawu taapacenrye oyariwa owo aamukhalana yoohiyeriwa ya vameekha aya. Xeeni aatuminhe aya ni eyoolya?
YOOSOMA 13
Yakobe ni Esawu Yaahitthikela Wiiwanana
Yakobe aareelihiwe sai ni nlaikha? Ni aapacenrye sai wiiwanana ni Esawu?