Satana ni axetwani alipa-oohaaxa ni atakhalii okathi wotheene. Khalai Satana aahiwiiva arumeyi ni mihuwo sa naxariya Yobi. Nuumala vo, aahiwiiva anamwane mulokoo a Yobi orumeelaka “eyupuru” yuulupale yeeyo yaanyaanyale empa yaary’aya. Vattuli vaya, Satana aahimuruuhela Yobi “makhwatta ònanarexa, yakhunela erutthu awe yothene okhuma inawu mpakha mmuruni”.—Yobi 1:7-19; 2:7.

Okathi wa Yesu, axetwani yaaniwiiriha atthu akina okhala oohilavula ni oohoona. (Matheyo 9:32, 33; 12:22) Axetwani yaahimuhaaxa mulopwana mmosaa amwiirihaka wiivulaliha ni maluku. (Marko 5:5) Awo-tho yaahimwiiriha okhuwela mmiravo mmosaa, amurihelaka vathii, ni “khumuripithula n’ikuru”.—Luka 9:42.

 Olelo va, Satana ni axetwani nlelo anootepa okhala anawiive. Mwekeekhai, otakhala wa miteko saya ohincerereya okhuma vaavo vaavonyiwa aya wirimu. Soohimmwa sa elapo yotheene sinnooniherya okhala ekeekhai otakhala waya. Awo annaahaaxa atthu akina ni iretta. Atthu akina anivariwa ni minepa ohiyu, ahinarupa, aahiiso wiirihiwa oloha itthu sootakhala. Akina anitheliwa ni nakuruu. Nlelo akinaku sinaakhwiiha onepa, owiiva, aahiiso wiixiiva.

Lintina, yoowo onikhala oSuriname, onihimya wira xetwani aahiiso munepa wootakhala, oowiiva atthu 16 a emusi awe ni aahimuhaaxa werutthuni ni mmuupuweleloni mpakha iyaakha 18. Mwaha woowi ela etthu emwiiranenle, Lintina onihimya wira axetwani “waasivela waahaaxa atthu anaalupattha aya mpakha owiiva”.

Masi Yehova onniwerya owaakiherya arumeyi awe vaavo vanitupheliwa aya ni Satana.—Miruku 18:10.