Masi nthowa xeeni Satana ni axetwani awe vaniimananiha aya waawoka atthu? Mwaha woowi aniphavelasa wira nitakaahane n’awo mu omurukunuwela Muluku. Aniphavela wira naakokhoreleke, nikupaliki wootha waya ni opaka itthu seiyo Yehova sihimphavela awe. Sowiira iya sinihela muhina soolema sinivarihana ni alipa-ookhwa.

Okhwa wa mutthu onimphenta ahu erii yookumana yooriipiha murima. Nto ti veephattu ni khahiyo vootthekeya oriipiwa murima. Nuumala okhwa mpatthani a Yesu, Laazaro, Yesu “ahinla”.—Yohani 11:35.

Sookhala soolema sinceene sinivarihana ni okhwa, nto iya sinnivirikana vanceene khuta elapo. Soolema sinceene khisinikhoottihiwa ni Biibiliya. Hataa vari siiso, sowiira sikina, sinikhuma mmuupuwelelo woowi alipa-ookhwa akumi ni anniwerya waaweha atthu akumi. Olaxerya munepa wa murutthu, wunla moohimaaliheya, mwiirelo wa ovitha oniyiiha musurukhu munceene, sotheene iyo sinikhuma mu woova ohihakalaliha minepa sa alipa-ookhwa. Masi okhala wira alipa-ookhwa “khansuwela-tho etthu”, atthu otheene anipaka itthu iya anikhaliherya wootha wa Satana.—Musuweli 9:5.

 Soolema sikina aahiiso isatakha, sinikhuma mu sookupali soowi, alipa-ookhwa aniphavela nikhaliheryo na atthu akumi ni wi anrowa waahaaxa atthu awo akumi akhala wira khanaakhaliherya. Ilapo sikina, ifesta ni mikuttho sinnipakiwa nuumala mahiku 40 aahiiso mwaakha mmosaa vattuli va okhwa mutthu ole. Vanuupuweliwa wira mikuttho iya sinimwaakhaliherya alipa-ookhwa ‘olapuwela’ mapuro ahinooneya. Mwiirelo mukina woolimaleliwa orii waavaha alipa-ookhwa yoolya ni yoowurya.

Itthu iya ti sootakhala okhala wira sinikhaliherya wootha wa Satana voohimya sa alipa-ookhwa. Niireke wira Yehova aamusiveliwa wiirela wahu mpantta soolema sinikhuma mu sowiixuttiha sa axetwani? Konkhala-khala osiveliwaka!—2 aKorinto 6:14-18.

Arumeyi a Muluku eekeekhai, khaniirela mpantta mwa sowiira sinikhaliherya wootha wa Satana. Ohiya vo, moophenta annilipiherya waakhaliherya ni waamaaliha atthu akumi. Awo annisuwela wira mutthu akhwa vale, paahi Yehova toniwerya omukhaliherya.—Yobi 14:14, 15.

Atthu akina annilavulana axetwani aahiiso anaarumeela anahako. Ela eniihaniwa onammunepani. Nipako, okhwiri, maxintta, waaxerya ehako, okoha minepa sa alipa-ookhwa, sotheene iya onammunepani.

Biibiliya onnikhoottiha itthu iya, oriki: “Ahikhalé mutthu a nyuwo onrowa . . . waxerya ehako, walá omurava mukw’awe, walá wakoha amuluku èthiru, nnákhala opaka maxitta walá omulowa mutthu, nnákhala wakoha majini ni minepa s’alipa-okhwa. Apwiya annanyokha atthu anìra sotakhala seiyo”.—Otumererya 18:10-12.

Nthowa xeeni Yehova vannilopola awe vaalupalexa ni sowiira iya?

 Ophavelaka okhala wahu saana, Yehova onninlopola wira ninyokhe mikhalelo sotheene sa onammunepani. Owo onnaaphenta ni waakhapelela atthu, ni onnisuwela wira otheene yaale anaataana ni axetwani anoohaawa tthiri.

Mmosaa a atthu ala aatanne ni axetwani aari Nilda, yoowo aari nahako oBrasil. Axetwani yaahikumiherya mixankiho mookumini mwawe. Owo onihimya wira: “Axetwani . . . yaahikivara, anakilamulela. Ikwaha sikina kaanimora kihinasuwela etthu, nto wanikisa waya kaahivahuwa. Axetwani yaahikilupattha vanceene mpakha oxankiha muupuwelelo aka. Kaahipacerya owurya murette oniruuhela ikhove, ohapaliwa ni ompaha soona moohihiyererya. Ela yaahiiraneya mu iyaakha sinceene”.