Otheene ahu nohaana opaka yoothanla. Akhala wira ninthanla omurumeela Yehova aahiiso Satana ni axetwani awe. Hiyo khininwerya waarumeela atthu anli. Moota ory’aya wa miruku omurumeela Yehova!

Ntoko soonaly’ahu, axetwani annihakalala vaavo vanaahaaxa aya ni waawoka atthu. Yehova khahiyo siiso. Owo onnaaphenta apinaatamu ntoko siiso tiithi sinaaphenta awe an’awe. Owo Namavaha a “eparakha yothene yophaveleya ni sovahiwa sothene sorera”. (Yakobo 1:17) Owo khonaakhoottiherya apinaatamu etthu yooreera, pooti eyo emuruuhelaka opweteiwa wuulupale.—aÉfeso 2:4-7.

Muupuweleke itthu seiye Yesu, Mwaana a Muluku, saapanke awe ori valaponi. Owo aahiwiiriha olavula ale yahaalavula ni woona alipa-oohoona. Owo aahaavoniha anamakokho ni atthu oorakala. Aahiwoomola axetwani ni waavoniha aretta otheene a khula enamuna. Yesu, orumeelaka ikuruu sa Muluku, aahaahihimuxa-tho alipa-ookhwa.—Matheyo 9:32-35; 15:30, 31; Luka 7:11-15.

Mmapuro mwa onoototha, Muluku okathi wotheene onnileela ekeekhai. Owo khonkhala-khala omootothaka mutthu ori otheene.—Mothakoni 23:19.

Ntoko siiso ntthavi na rattaasi ninvarexexa aya ephepele, atthu imilyau sinceene aavariwa ni woova ethiru ni itthu sowoothiwa. Awo anniwoova alipa-ookhwa ni axetwani. Annixankiheya mwaha wa woova olamphwa, olaviwa, okhwiri ni oloiwa. Awo aapakeya opottha mwaha wa sookupali ni mihapo sinikhuma mu wootha wa Satana Diabo. Nto sotheene iya khisinaavara arumeyi a Muluku.

Yehova ta ikuruu sinceene onvikana Satana. Akhala wira nyuwo munimurumeela Yehova, owo onrowa owaakiheryani axetwani. (Yakobo 4:7) Okhwiri khonrowa woovarani. Mwa ntakiheryo, oNigéria, akulukhana araruu oowerya yaaheererya omulowa aphavelaka omwiiva Namoona a Yehova yoowo aakhootta okhuma muttetthe ole. Vaavo vahaawenrya aya omwiiva ni mirette saya, mmosaa a akulukhana ale aahoova, nto aahirowa wa Namoona ole, wira ovekele oleveleliwa.

Akhala wira axetwani animoovarani, nyuwo nvekele muromolaka nsina na Yehova nto owo onrowa owaakiheryani. (Miruku 18:10) Masi wira mwaakiheriwe ni Muluku, nyuwo muhaana omalamaliha tthiri etthu eri yotheene enaataana ni onammunepani aahiiso waakokhorela axetwani. Khalai, anamakokhorela a Muluku elapo ya wÉfeso yaahipaka eyo. Awo yaahithukumanya iliivuru saya sotheene sa maxintta khupaha. (Miteko 19:19, 20) Olelo va, arumeyi a Muluku ahaana opaka emosaru. Murihee ikhulula sanyu, ihirisi, ni itthu sinihimmwa wira “sinniruuha oreeriwa”, olowa, iliivuru sa maxintta ni etthu eri yotheene  enivarihana ni sowiira sa onammunepani.

Akhala wira muniphavela omuhakalaliha Muluku, khivamphiyerya paahi ottharuwa okokhorela woowoka ni ohiya opaka itthu sootakhala. Nyuwo muhaana weettela ni murima wotheene okokhorela wekeekhai. Biibiliya onnooniherya ele eri yootthuneya wiira:

Satana ni axetwani aakhalana atthu aya valaponi va, yaawo aniixuttiha ni opaka itthu sootakhala. Masi Yehova ookhalana-tho atthu awe. Awo aniihaniwa Anamoona a Yehova. (Yesaya 43:10) Elapo yotheene, aakhala Anamoona anivikana imilyau thanu na piili. Otheene aya anniilipiherya opaka itthu sooloka ni owiixuttiha atthu ekeekhai. Ilapo sinceene, nyuwo munoowerya waaphwanya awo oSalau ya Omwene, weiwo anrowa aya owaakhelani saana.

Muteko aya waakhaliherya atthu wira amurumeeleke Muluku. Awo anrowa omusoma Biibiliya ni nyuwo owannyu, yookhaliheryakani osuwela moota woomukokhorela Yehova mmukhalelo wooloka. Nto nyuwo khimunrowa oliva etthu. Anamoona annisiveliwa wiixuttiha ekeekhai okhala wira awo annaaphenta atthu ni annimphenta Yehova Muluku.