Minepa sookhala tthiri! Iyo sinikhala mapuro ahinooneya, sookhala minepa sooloka ni minepa sootakhala. Niireke wira minepa iyo atthu yaatonko okhala ni akhwa valaponi?

Nnaari. Vaavo mutthu vanikhw’awe, mutthu owo khonrowa elapo ya minepa, ntoko atthu anceene sinuupuwela aya. Nto ninsuwela sai ela? Okhala wira Biibiliya tonihimya siiso. Biibiliya ti eliivuru yekeekhai enikhuma wa Muluku mmosaa paahi eekeekhai, yoowo nsina nawe nri Yehova. Yehova tokhanle mpattuxa aapinaatamu; owo onnisuwela saana ele eniwiiraneela apinaatamu vaavo vanikhw’aya.—Esalimo 83:18, Tradução do Novo Mundo, NM; 2 Timótheyo 3:16.

Biibiliya onihimya wira Muluku aahimpaka mulopwana oopacerya, Adamu, ni “etthaya . . . ya vathí”. (Maphattuwelo 2:7) Muluku aahimukuha Adamu mParayiisu, mu ejardim ya wEedeni. Vaakhanleke wira Adamu aahiiwelela nlamulo na Yehova, Adamu khaarowa okhwa; aarowa okhala mukumi valaponi mpakha olelo va. Masi vaavo Adamu vahiiwelenly’aya nlamulo na Muluku moolakelela, Muluku aahimenrye so: ‘Munrowa otthikela mutthayani, okhala wira mùpiwé n’itthaya yeyo. Tthiri nyuwo mw’ètthayá, munotthikela-tho mutthayani memmo’.—Maphattuwelo 3:19.

Ela enitaphulela exeeni? Saana, Adamu aari woowi, Yehova ohinatthi omuupa ni etthaya? Owo khaakhanle hataa mu nipuro nikina. Khahiyo aari munepa wirimu waalipelela oyariwa. Owo khaakhanle. Siiso vaavo Yehova vaahimmya awe wa Adamu wira yaarowa “otthikela mutthayani memmo”, owo aaphavela ohimya wira Adamu yaarowa okhwa. Awo khiyaalapunwe  arowaka mapuro ahinooneya. Wookhwaani, Adamu yaahitthikela-tho ohikhala ni okumi, aahiiso ohikhala-tho. Nto okhwa, onitaphulela ohikhala ni okumi.

Masi nihimye exeeni sa atthu akina yaawo akhwiiye? Niireke wira awo khakhanle-tho? Biibiliya onaakhula wira:

• “Atthu n’inama annitthimakela nipuro nimosaru: othene ankhuma muntthupini, othene anotthikela muntthupini memmo”.—Musuweli 3:20.

• “Masi alipa-òkhwa khansuwela-tho etthu”.—Musuweli 9:5.

• “Ophenta waya n’unyokha waya ni munkhelo aya womala vamosá n’awo”.—Musuweli 9:6.

• “Elapo y’alipa-òkhwa khuvovo muteko nnákhala osuwela walá otthokelela nnákhala ankhili. Ni ti weiwo ontthunanyu orowa”.—Musuweli 9:10.

• ‘Iphumu [sa mutthu] sàmmalela, onotthikela vatthayani: nihiku nenlo sowupuwela sawe sothene sinomala’.—Esalimo 146:4.

 Vannoovilani waakhulela soolempwa iya? Vakhala wira ti siiso, nkahaya muupuwelele ela: Imusi sinceene, mulopwana toniphwanya musurukhu wira olyihe etthoko awe. Vaavo mulopwana owo vanikhw’awe, emusi awe ikwaha sinceene ennikumana mixankiho. Ikwaha sikina mwaarawe ni an’awe khanikhalana musurukhu oniphiyerya othuma yoolya. Waaniheryasa anyokhani a mulopwana ole anrowa waahaaxaka. Vano mwiikoheke: ‘Vaakhanleke wira mulopwana ole mukumi mu elapo ya minepa, nthowa xeeni vahinivikaniha awe okhaliherya emusi awe? Nthowa xeeni vahinaakiherya awe emusi awe wa atthu ootakhala?’ Mwaha woowi soolempwa sinihimya ekeekhai. Mulopwana ole khorina okumi, khonwerya opaka etthu.—Esalimo 115:17.

Nto niireke wi ela entaphulela wira ale akhwiiye khankhala-khala-tho akhalaka akumi? Nnaari, khahiyo siiso. Muhoolo ninrowa olavula sa ohihimuxiwa. Ela enitaphulela wira atthu ookhwa khansuwela ele nyuwo enipaka anyu. Awo khanwerya woowehani, owiiwani, aahiiso olavula ni nyuwo. Nyuwo muhiwooveke. Awo khanwerya wookhaliheryani, nnakhala woohaaxani.—Musuweli 9:4; Yesaya 26:14