ATTHU otheene annixanka, waahela muhina atthu a Muluku. Nasalimo aalempe so: “Ovelavela n’uxanka wahiniha murim’aka”. (Esalimo 94:19) Nave Yesu aahihimya wira mahiku ookiserya, ale animurumeela Yehova yaarowa oxankaka ni “sovelaveliha s’ekumi”. (Luka 21:34) Niireke nyuwo munnixankiheya mwaha woothoiwa musurukhu, mixankiho sa vatthokoni, wala oretta? Yehova onrowa wookhaliheryani sai ovilela itthu iyo?

Hiyo khanniwerya ovilela mixankiho mekhihuru. Murummwa Paulo aalempe so: “Mwa itthu sothene hiyo ninniphunyiwa, . . . “ninnivelavelihiwa . . . ninnixanka”. Masi aahilepa-tho wira “khaninnyakeliwa”, “khannojeya”, “khanimpweteya”. Exeeni ennikhaliherya ovilela? ‘Owerya wulupalexa’, eyo piiyo, ikuru sinikhuma wa Muluku oowerya sotheene, Yehova.​—2 aKorinto 4:7-9.

Muupuweleleke moota mwaakhenle anyu ‘owerya wulupalexa’ khalai. Niireke munnuupuwelela mwaha mmosa aalavuliwe, owuupuxeryani niphento nuulupale Yehova onooniherya awe? Niireke waamini wanyu sooleiherya sa Yehova khiwancerereya vaavo mwaawiixuttiha anyu akina voohimya sa nlipelelo na eParayiisu? Okathi ninrowela ahu mithukumano, nnaaleela akina ele enaamini ahu, ninniphwanya ikuru sinnikhaliherya ovilela itthu sinnixankiha. Nave ninniphwanya murettele mookumini mwahu wira nimurumeeleke Yehova moohakalala.

Ikwaha sikina pooti woona okhala voovila othanla itthu sootthuneya. Mwa ntakiheryo, Yehova onnivekela wira nipaceryeke ophavela Omwene nave niluttuweliweke miteko somunepani. (Matheyo 6:33; Luka 13:24) Masi sai akhala wira olupatthiwa, owereiwa, wala mixankiho sa vatthokoni sinnookhoottiheryani ovara miteko sikina? Ankhi akhala wira muteko onivara anyu onivekela okathi munceene nto khiyooceela okhala vamosa ni muloko? Vaavo eyo eniireya aya, masi murina ene okathi ni ikuru vakhaani, pooti okhala ookhulumuwa. Woonasa wene pooti wuupuwelaka wira Yehova onoovekelani itthu sinceene sihinwerya anyu.

Masi Yehova onnisuwela ele enookhumelelani. Owo khonlipelela wira ninvaheke ele ehinwerya ahu. Nave onnisuwela wira vannitthuneya ovira okathi wira niilokiherye mwaha wa okhulumuwa werutthuni ni muupuwelelo.​—Esalimo 103:13, 14.

Mwa ntakiheryo, muthokorerye enamuna Yehova aamukhapelenle awe profeta Eliya. Okathi Eliya aariipiwe awe murima ni woova nto khutthyawela woothakoni, niireke Yehova aahimpwapwela khumuruma otthikela ovara muteko awe? Nnaari. Yehova aahiruma nlaikha ikwaha piili orowa onvenxa Eliya mooreerela ni onvaha eyoolya. Hata vari siiso, nuuvira mahiku 40, Eliya nlelo aanoova ni aanixanka. Exeeni-tho Yehova aapanke awe? Yoopacerya, Yehova aahimooniherya  wira anwerya omwaakiha. Ya nenli, Yehova aahimmaaliha Eliya ni nsu naakhala ntoko “epheyo yorera”. Ya neeraru, Yehova aahimuleela wira yaahikhala atthu ikonto sene nlelo yaamurumeela Muluku moororomeleya. Moohipisa, Eliya aahitthikela okhala profeta ooluttuweliwa. (1 Mamwene 19:1-19) Nniixutta exeeni? Okathi Eliya aaxankale awe, Yehova aanimuthokorerya mooreerela, ni moopixa murima. Yehova khorukununwe. Owo onninthokorerya saana ntoko mahiku a Eliya.

Okathi munuupuwela anyu ele yonvaha Yehova, mukhalaneke moonelo wooloka. Muhilikanyiheke ele eniwerya anyu opaka olelo-va, ni ele yaawerya anyu khalai. Nilikanyihe so: Mulipa onitthimaka, yoowo onihiya wixiiniha nikuruta nto khuviriha myeeri wala iyaakha sinceene ohitthimanke, khoniira ovinyakaru onawerya otthimaka ntoko siira awe khalai. Masi, onipacerya vakhaani-vakhaani mpakha ophwanya ikuru ni olimalela. MaKristau anilikanyihiwa ni mulipa onitthimaka. Awo anniina nikuruta esuwelaka oratteene eniphavela aya ophwanya. (1 aKorinto 9:24-27) Tivonto varyaaya vooreerela opacerya soolukama somunepani munrowa anyu owerya waakhwaniherya moohipisa. Mwa ntakiheryo, pooti okhalana yoolukama ya orowa owiriyana mithukumano mmulokoni. Munvekeleke Yehova wira ookhaliheryeni waakhwaniherya yoolukama eyo. Vaavo vanilipa-lipa anyu momunepani, munrowa ‘wererya ni wona orera waya murima Apwiya [Yehova]’. (Esalimo 34:9) Muupuweleke wira khula etthu enrowa anyu opaka wira mooniherye omphenta wanyu Yehova, enayevaru, owo onnixukhurela vanceene.​—Luka 21:1-4.

Yehova anvahale sai ikuru June wira omuhokolowele? June onihimya so: “Kaamakela onvekela Yehova wira okikhaliherye. Nto mwaara a mwanaka aahikihimeerya wira aarowa okhala asembeleya muttetthe aka. Tivo, kaahilakela orowa owiriyana muthukumano ole nihiku nimosa paahi. Kaahihakalala vanceene otthikela othukumana ni atthu a Yehova! Muthukumano ole, ti nikhaliheryo kaalipelela aka. Vano kootthikela omurumeela Yehova mootteeliwa murima. Okumi aka ti woohakalaliha. Vano kinnisuwela wira khivanreerela wiivalaanya aahiiso ovilela mixankiho mekhaka. Kinnixukhurela vanceene mwaha woowi Yehova ookivahaokathi wira kimuhokolowele”.