MPANTTA 3
Oveehiwa Vanceene: Okathi Hiyo ‘Nintthekeliwa Ahu’
Linda onihimya so: “Murokora mmosa a muloko aka aahikootherya omwiiyerya musurukhu awe. Nto anna akina a mmulokoni yaahipacerya olavula moovarihana niile yuupuwela aya sa mwaha ole. Nuuvira okathi, aahileeliwa itthu sikina sooniherya wira khahiyo miyo kaamwiiyenrye. Nnaamwi aakivekenle musammaha, vamurimani vaka, kaanoona wira nkaawerya omulevelela”.
NIIREKE muri ntoko Linda, yoowo aaveehiwe ni murokora a muloko awe? Mooriipiha murima, akina annixankiheya vanceene mwaha wa mweettelo wa anna akina, nto onawiiriha otthikela ottuli momunepani. Niireke ti yeeyo eniwiiraneelani?
Ookhala Toko Oniwerya “Onimwalanyiha N’uphenta wa Muluku”?
Tthiri pooti ovila waalevelela annihu aniveehale vanceene. Masi, maKristau ahaana ophentana mukina ni mukhwaawe. (Yohani 13:34, 35) Veekeekhai, okathi ninveehiwa ahu ni annihu, hiyo ninnikhumuwa ni onyoonyiwa vanceene.—Esalimo 55:13.
Biibiliya onnoniherya wira, ikwaha sikina maKristau ‘annitthekelana’. (aKolosi 3:13) Hata vari siiso, okathi oniveehiwa ahu, vanninirikela oliyala oveehiwa iwo. Niireke yookhala etthu ekhanle oonikhaliherya? Muthokorerye malakiheryo ala mararu a mBiibiliyani:
Tiithi ahu a wiirimu onnisuwela sotheene. Yehova onnoona sotheene siniiraneya, ohela muhina itthu sotheene siniireliwa ahu moohixariya. (aHéberi 4:13) Nave Yehova onnoona othunku nahaawaka. (Yesaya 63:9) Owo khoneemererya wira “ovelavela n’ulupatthiwa”, wala etthu ekina, aahiiso munnihu eeKristau, ‘onimwalanyihe n’uphenta wa Muluku’. (aRoma 8:35, 38, 39) Nave-tho hiyo, nihaana omutakiha Yehova, niheemereryaka wira etthu wala mutthu, onivalaanyihe ni Yehova.
Olevelela khonitaphulela osiveliwa ni etthu yoohiloka. Okathi onaalevelela ahu ale anitthekenle, khonitaphulela wira etthu yoohiloka epakiwe eroonisivela wala khahiyo yootthekeya. Muupuweleke wira Yehova, khonsiveliwa ni etampi, masi yena onnilevelela akhala wira vannireerela. (Esalimo 103:12, 13; Habakuki 1:13) Vaavo Yehova vannitumererya awe waalevelela akina, owo oniphavela wira nimutakiheke yena. Owo “khanaviruwela atthu wa mahiku othene”.—Esalimo 103:9; Matheyo 6:14.
Ohipweha etthu yoowereya vamurimani, onniniphwanyiha mureerelo. Moota xeeni? Nkuupuwelelani yowiiraneya ela: Nyuwo mookuxa nluku waaniheryasa ninlemela ekiilu emosa, nto khiyavarelela ni moono anyu. Woonasa wene eyo khiyaarowa okhala etthu yooxankiha mwa okathi vakhaani. Masi exeeni yaarowa okhumelela akhala wira nvarelenle mwa okathi munceene? Waaniheryasa minutu sinceene, ewoora ntero aahiiso ovikana-vo? Moohaaniherya, moono anyu wampacerya owuumani! Khahiyo wira nluku nle nrimuncerereya olemela waya. Masi etthu ene, okhala wira mooviriha okathi munceene nvarelenle ene. Ti yeeyo eniiraneya voohimya sa opweha etthu yoohiloka vamurimani. Vaavo mutthu vaniviriha awe okathi munceene opwenhe ene etthu yoowereya vamurimani, hata eryeene yaamukhaani, owo onootepa wiiwereiha mmansawe. Tivonto Yehova vannitumererya awe ohipweha etthu yoowereya vamurimani vahu. Tthiri, opaka eyo, onniniphwanyiha mureerelo.—Miruku 11:17.
Ohipweha etthu yoowereya vamurimani vahu, onniniphwanyiha mureerelo
“Vaakhala Ntoko Wira Yehova Aalavula ni Miyo”
Exeeni yaamukhalihenrye Linda ohivikaniha onanariwa nuumala otthekeliwa ni muKristau mukhwaawe? Etthu emosa yaamukhalihenrye, waari wuupuwelela Soolempwa seiyo sinooniherya otthuneya waya mutthu olevelela. (Esalimo 130:3, 4) Linda aahisuwelexa wira akhala wira owo anwerya olevelela, Yehova nave aarowa omulevelela. (aÉfeso 4:32–5:2) Olavulaka sa moota oonela awe, owo onihimya so: “Vaakhala ntoko wira Yehova aalavula ni miyo”.
Nuuvira okathi, Linda aahikumiha vamurimani vawe etthu yanwereya. Nto aahimulevelela murokora ole aamutthekenle, nto olelo-va, awosa apatthani eekeekhai. Nto Linda ootthikela omurumeela Yehova. Nave mukupaliki wira Yehova, onniphavela wookhaliheryani opaka etthu emosaru.
