Okhuma onamwane awe, Samuweli aakhala otabernaakulu, opuro yoowo atthu yaamulompa aya Yehova. Nyuwo munnisuwela moota Samuweli aapacenrya awe okhala otabernaakulu? Wira nisuwele, nrowe nilavule vakhaani sa amamawe Samuweli, yaitthaniwa Ana.

Okhuma khalai, Ana khaawerya okhalana mwaana nnaamwi aaphavela. Nto aahinvekela Yehova wira omukhaliherye. Owo aahimuleiherya wira akhala wira aamukhalana mwaana mwaamulopwana, aarowa onvahererya Muluku wira avareke muteko otabernaakulu. Yehova aahaakhula nivekelo nawe; nto Ana aahikhalana mwaana. Owo aahinvaha nsina na Samuweli. Ntoko Ana aahimyale awe, aahimuroiha Samuweli otabernaakulu okathi aarina awe iyaakha 3 wala 4, wira amurumeeleke Muluku.

Mulopwana mmosa aitthaniwa Eli, aari mukhulupale aalipa a mukuttho. Nave, anamwane anli a Eli yaavara muteko weiwo. Muupuweleke wira otabernaakulu yaari empa aalompiwa awe Muluku. Nto opuro owo atthu yaahaana opakaka itthu sooloka. Masi anamwane a Eli yaapaka itthu sootepa otakhala. Samuweli aanoona itthu iyo. Niireke Samuweli aapaka itthu sootakhala ntoko anamwane a Eli?— Nnaari, owo aanivikaniha opaka itthu sooloka, ntoko aaxuttihiwe awe ni anamuyari awe.

Munoonela sai, Eli aahaana owiiriha exeeni anaawe ale?— Owo aahaana waattaruxa ni waahiiha ovara muteko mpaani mwa Muluku. Masi, Eli khaapanke eyo. Nto, Yehova aahinanariwa ni Eli vamosa ni anaawe. Yehova aahilakela owiiva.

Ohiyu omosa, Samuweli orupaka, aahiiwa nsu naamwiitthana so: ‘Samuweli!’ Nto Samuweli aahitthimakela wa Eli; masi Eli aahimuhimeerya wira: ‘Miyo nkiwiihanneni’. Eyo yahiiraneya-tho ikwaha piili. Nto ekwaha ya neeraru,  Eli aahimuleela Samuweli wira aiwa-tho nsu nimwiitthanaka, aahaana waakhula so: ‘Xontte, mulavuleke, Yehova! Murumeyi anyu onniiwa!’ Nto, eyo ti etthu Samuweli aapanke awe. Vano, Yehova aahimuleela Samuweli wira: ‘Mmuhimeerye Eli wira miyo kinrowa omaliha emusi awe yotheene mwaha wa sotakhala anipaka aya’. Niireke vaahikhweya Samuweli omuleela Eli moolumo awo?— Nnaari. Masi hata vaari siiso, Samuweli aahipaka ele Yehova aamulenle awe. Nto moolumo a Yehova yaahiiraneya. Anamwane anli a Eli yaahiiviwa okhottoni. Nave, Eli aahikhwa moohipisa.

Samuweli oonivaha ntakiheryo nooloka. Owo aahipaka itthu sooloka nnaamwi atthu akina yaapaka itthu sootakhala. Ankhi nyuwo? Munoomutakiha Samuweli ni ovikaniha opaka itthu sooloka? Akhala wira munoopaka eyo, munoomuhakalaliha Yehova, paapa anyu, ni maama anyu.