YOOSOMA 10
Mithukumano sa Anamoona A Yehova Sinrowa Wookhaliheryani Sai?
Niireke nyuwo mootoko orowela mithukumano sa Anamoona a Yehova? Akhala wira khamutonko orowela, woonasa wene munnixanka vaavo munuupuwela anyu orowela mithukumano sa Anamoona a Yehova ekwaha yoopacerya. Nave pooti wira munniikoha so: ‘Anamoona a Yehova anipaka sai mithukumano? Xeeni siri aya sa faita yinceene? Xeeni vanireerela aya miyo orowela mithukumano iyo’? Yoosoma ela, munimwiixutta wira othukumana ni Anamoona a Yehova onimookhaliheryani okhalana waataana wooloka ni Muluku ni sinimoophwanyihani mireerelo sinceene.
1. Tiivi eri yoolakela yuulupale ya mithukumano sa Anamoona a Yehova?
Mulipa oomulepa Biibiliya aahimmye so: “Kinnimuttottopela Muluku mmuthukumanoni”. (Esalimo 26:12) Ni moolumo ala, mulipa-oomulepa Biibiliya ole aahihimya etthu yuulupale enniiriha othukumana, eyo piiyo, omukokhorela Muluku. Mwa enamuna emosa-ru, khula esumana Anamoona a Yehova a olumwenku wotheene annithukumana wira anvuwiheke Muluku, wiipa ni ovekela. Nave okathi mukina vamwaakhani, awo annipaka mithukumano suulupale wira amukokhoreleke Muluku. Tthiri Anamoona a Yehova waasivela vanceene orowela mithukumano iyo.
2. Mithukumano sahu, munrowa wiixutta exeeni?
Okathi hiyo ninthukumana ahu, ninrumeela Nuulumo na Muluku, Biibiliya. Okathi owo, hiyo ninnimusoma Biibiliya ni ninnitaphuleliwa “nulumo ti nulumo, wira atthu othene yiwe orattene molumo asommwe”. (Mmusome Nehemiya 8:8.) Mithukumano sa Anamoona a Yehova, nyuwo munimwiixutta voohimya sa Yehova ni mikhalelo sawe sooreera. Tthiri vaavo munrowa anyu owehaka wira Yehova toophenta, munrowa otepaka waataana ni yena. Nave munimoona moota Yehova okhanle awe oowookhaliheryani wira mukhalane okumi woohakalaliha.—Yesaya 48:17, 18.
3. Okathi wa mithukumano nyuwo munimwaasuwela atthu anceene. Eyo enrowa wookhaliheryani sai?
Yehova onihimya wira “nuupuwelaneke mukina ni mukhwaawe, wira nitumereryaneke wooniherya ophenta ni miteko sooreera, nihihiyaka othukumana”. (aHeeberi 10:24, 25) Okathi wa mithukumano sahu, nyuwo munimwaasuwela atthu anithokoreryana oratteene mukina ni mukhwaawe. Nave munoowiiwa atthu awo alavulaka itthu sa mBiibiliyani. Atthu awo ari ntoko nyuwo, maana aniphavela omusuwela oratteene Muluku. (Mmusome aRoma 1:11, 12.) Nave nyuwo munimwaasuwela atthu anceene oovirikana, akina toothela, tootheliwa akina toohithela ni toohitheliwa. Awo annihakalala vanceene nnaamwi arina ene mixankiho. Mpakha-va, mooweha wira ninniixutta itthu sinceene sooloka mithukumano sahu? Tthiri eyo ti etthu enimwiiriha Yehova onitumererya wira nithukumaneke!
MWIIXUTTE ITTHU SIKINA
Nwehe etthu eniiraneya mithukumano sa Anamoona a Yehova. Nave-tho nwehe nthowa naya vari aya vooloka wiimananiha orowela mithukumano iyo.
4. Etthu enipakiwa okathi wa mithukumano sa Anamoona a Yehova
Okathi wa arummwa a Yesu, maKristau yaanithukumana wira amukokhoreleke Yehova. (aRoma 16:3-5) Mmusome aKolosi 3:16, nuumala-vo mwaakhule nikoho ninttharelana:
-
Okathi wa arummwa, maKristau yaamukokhorela sai Yehova?
Olelo-va, khula esumana Anamoona a Yehova annithukumana wira amukokhoreleke Muluku. Wira nwehe moota Anamoona a Yehova anipaka aya mithukumano, nwehe EVIIDIYU. Moottharelana nwehe efootu ya moota sinipakiwa aya mithukumano, nuumala-vo mwaakhule makoho anittharelana.
-
Eviidiyu nwenhe anyu mooweha etthu eniiraneya Empa ya Omwene. Itthu xeeni siniiraneya Empa ya Omwene sinlikana ni ele musomme anyu aKolosi 3:16?
-
Eviidiyu wala efootu, niireke yookhala etthu moonele anyu yoosivenleni?
Mmusome 2 aKorinto 9:7, nuumala-vo mwaakhule nikoho ninttharelana:
-
Xeeni okathi wa mithukumano sa Anamoona a Yehova ohinvekeliwa aya musurukhu?
Mukhaliheriwaka ni ole onoosomihani Biibiliya, nwehe itthu munrowa anyu wiixutta mithukumano sinittharelana.
-
Mpantta xeeni wa mithukumano munoona anyu wira onimoosivelani ni onimookhaliheryani vanceene?
Nyuwo mwaanisuwela?
Esaiti ahu jw.org, nyuwo munooweha okathi ni opuro sinipakiwa aya mithukumano sa Anamoona a Yehova olumwenku wotheene.
-
Mithukumano sahu ninniwiriyana myaha sa atthu otheene, sowooniherya ni iviidiyu. Mithukumano sotheene simpacerya ni simmala ni nsipo ni nivekelo
-
Mipantta sikina sa mithukumano sahu alipa-oowiriyana annivekeliwa ovaha ikomentaario saya
-
Atthu otheene annaakheliwa, akhale anamathelana, ale oohithela ni oohitheliwa, atthu oowuuluvala ni anamwane
-
Mithukumano sahu ti sa mahala. Khuuvo mutthu onviriha ephace nnakhala eparatho ovekiwaka musurukhu
5. Muhaana wiimananiha wira murowele mithukumano
Nkahaya nwehe ntakiheryo na emusi ya Yesu. Khula mwaakha awo yaanikhuma oNazarethi arowaka oYerusalemu wira arowele mithukumano sa vameekhaaya. Mukwaha ole khahiyo waari wookhweya. Maana yaahaana weetta mwentto ikiloomo 100 aviraka mapuro oowaatta myaako. Nto eyo enooniherya wira yaahaana weetta mahiku mararu. Mmusome Luka 2:39-42, nuumala-vo mwaakhule makoho anittharelana:
-
Niireke vaanikhweya weetta mukwaha ole arowaka oYerusalemu wira yamukokhorele Muluku?
-
Xeeni vanireerela aya wiimananiha wira murowele mithukumano?
-
Niireke orowela mithukumano onimoophwanyihani mireerelo? Mwaha wa xeeni?
Biibiliya onihimya wira ti vooloka othukumana wira nimukokhoreleke Yehova. Mmusome aHeeberi 10:24, 25, nuumala-vo mwaakhule nikoho ninttharelana:
-
Xeeni vari aya vooloka ohifaltari mithukumano sa anamoona a Yehova?
ATTHU AKINA ANIHIMYA WIRA: “Khivanitthuneya nyuwo okhuma owaani murowaka nipuro nikina omukokhorela Muluku. Omusoma Biibiliya mekhinyu owaani onniphiyerya”.
-
Yoolepa xeeni ni ntakiheryo xeeni na mBiibiliyani nnooniherya ele Yehova oniphavela awe?
IPONTO SUULUPALE
Orowela mithukumano onimookhaliheryani osuwela itthu sikina voohimya sa Yehova ni olipiha waataana wanyu ni yena. Ohiya-vo, mithukumano sinimoovahani eparakha ya omukokhorela Muluku ni atthu akina.
Wuuluula
-
Xeeni Yehova oniphavela awe wira nithukumaneke?
-
Itthu xeeni munrowa anyu wiixutta mithukumano sa Anamoona a Yehova?
-
Niireke yookhala enamuna ekina mithukumano sinrowa aya wookhaliheryani?
NWEHE ITTHU SIKINA
Niireke munnixanka vaavo munuupuwela anyu orowela mithukumano? Eyo yootoko omwiiraneela mulopwana mmosa. Vano nwehe etthu yaamukhalihenrye osiveliwa mithukumano.
Nwehe moota mmiravo mmosa aasiveliwe awe mithukumano ni ohihiya orowela.
Nwehe enamuna atthu akina yaasiveliwe aya orowela mithukumano.
“Xeeni Vari Aya Vooloka Orowela Mithukumano Empa ya Omwene?” (Mwaha ori va jw.org)
Nwehe yowiiraneya ya mulopwana ootakhala murima ni iirela mpantta ekrupu ya anatarau. Moone marukunuxo aapanke awe nuumala orowela mithukumano sa Anamoona a Yehova.
“Khuuvo Opuro Waarowa Aka Kihimukunxe Kapwitthi Aka” (Owehaweha, 1 a Julyo, 2014)
