YOOSOMA 28

Niireke Munnixukhurela Ele Yehova ni Yesu Yoopakenlaayani?

MURUMIHE

Nyuwo munoonela sai okathi mpatthani anyu onoovahaaweni etthu ya efaita yinceene? Woonasa wene, nyuwo munnihakalala ni munniphavela omooniherya mpatthani anyu wira etthu oovanhaaweni ehoosivelani ni munnixukhurela vanceene. Yehova ni Yesu aanivaha etthu ya efaita yinceene. Etthu xeeni? Ninrowa wooniherya sai wira ninnivaha efaita wala ninnixukhurela vanceene?

1. Ninrowa wooniherya sai wira ninnixukhurela vanceene ele Muluku ni Kristu anipakenle aya?

Biibiliya onihimya wira “otheene ale anooniherya omwaamini [Yesu]” anoophwanya okumi woohimala. (Yohani 3:16) Masi ontaphulela exeeni wooniherya waamini? Wira nooniherye wira ninnaamini, nihaana opaka etthu ekina ohiya paahi ohimya wira ninnimukupali Yesu. Maana nihaana wooniherya waamini wahu ni soothanla sahu ni miteko sahu. (Yakobo 2:17) Vaavo nnooniherya ahu waamini wahu ni miteko ni itthu nimpaka ahu, hiyo ninnilipiha waataana wahu ni Yesu vamosa ni Tiithi awe, Yehova.—Mmusome Yohani 14:21.

2. Okathi xeeni wa vameekhaaya onnikhaliherya wooniherya wira ninnimuxukhurela Yehova ni Yesu mwaha wa ele anipakenle aya?

Ohiyu aarowa awe wiiviwa, Yesu aahaaleela atthareli awe wira yaahaana wooniherya oxukhurela mukuttho aarowa awe ovaha. Owo aahaaleela wira yaahaana othukumana okathi wa vameekhaaya, yoowo Biibiliya onihimya awe okhala “Yoolya ya Ohiyu ya Apwiya” aahiiso ele ninsuwela ahu okhala Wuupuwelela Okhwa wa Kristu. (1 aKorinto 11:20) Yesu aaphavela wira arummwa awe ni makristau makina yaarowa okhumelelaka nuumala yena, yuupuweleke wira yena oovaha okumi awe wira onoopole. Tivonto Yesu aarumme awe wira: “Muthipeleleke opaka ela mukuupuwelaka miyo”. (Luka 22:19) Okathi munrowela anyu muthukumano wa Wuupuwelela, nyuwo munnooniherya oxukhurela wanyu ophenta wuulupale Yehova ni Yesu anoonihenrye aya.

MWIIXUTTE ITTHU SIKINA

Nwehe inamuna sikina mukhanle anyu oowooniherya wira munnixukhurela ni munnivaha efaita ophenta wuulupale Yehova ni Yesu anoonihenrye aya. Nave nwehe moota Wuupuwelela okhwa wa Kristu ori aya wa efaita yinceene.

3. Inamuna sa wooniherya oxukhurela

Nkahaya muupuwele nyuwo musamme ene mmaasini munahala okhwa, vano mutthu mmosa onarwa owoopolani. Niireke nyuwo mwaarowa okhuma ni oliyala ele mwiireliwe anyu? Wala mwampaka sotheene muniwerya anyu wira mmooniherye mutthu owo wira munnimuxukhurela mwaha wa owoopolani?

Okumi nrina ahu, Yehova tonivanhe. Mmusome 1 Yohani 4:8-10, nuumala-vo mwaakhule makoho anittharelana:

Xeeni mukuttho wa Yesu ori aya yoovaha ya efaita yuulupale?
Munoonela sai nuumala osuwela ele Yehova ni Yesu yoopakenlaayani?

Ninrowa wooniherya sai wira ninnixukhurela ele Yehova ni Yesu anipakenle aya? Mmusome 2 aKorinto 5:15 ni 1 Yohani 4:11; 5:3. Nuumala osoma soolepa iyo, mwaakhule nikoho ninttharelana:

Moovarihana ni soolepa iya nisomme ahu, ninrowa wooniherya sai wira ninnixukhurela yowoopola?

4. Mmutakiheke Yesu

Enamuna ekina nikhanle ahu oowooniherya wira ninnixukhurela, ori omutakiha Yesu. Mmusome 1 Pedru 2:21, nuumala-vo mwaakhule nikoho ninttharelana:

Ninrowa wooniherya sai wira ninnitthara mavalo a Yesu vakhiviru vene?

Yesu aaniphenta Nuulumo na Muluku, aanilaleya ihapari sooreera ni anaakhaliherya atthu akina

5. Muroweleke muthukumano wa Wuupuwelela okhwa wa Kristu

Wira musuwele itthu sikina siiraneyale nihiku na Yoolya ya Ohiyu ya Apwiya, mmusome Luka 22:14, 19, 20. Nuumala-vo mwaakhule makoho anittharelana:

Etthu xeeni yiiraneyale nihiku na Yoolya ya Ohiyu ya Apwiya?
Ephaawu ni eviinyu enithoonyerya exeeni?—Nwehe eversiikulu 19 ni 20.

Yesu oniphavela wira atthareli awe apakeke Yoolya ya Ohiyu ya Apwiya khula mwaakha nihiku aakhwiiye awe. Tivonto Anamoona a Yehova anithukumana aya khula mwaakha wira yuupuwelele okhwa wa Yesu ntoko onirumme awe. Wira musuwele efaita erina aya muthukumano wa Wuupuwelela, nwehe EVIIDIYU. Nuumala-vo mwaakhule nikoho.

EVIIDIYU: Wuupuwelela Okhwa wa Yesu (1:41)

Etthu xeeni eniiraneya nihiku na Wuupuwelela?

Okathi wa Wuupuwelela, ephaawu ni eviinyu ithoonyeryo paahi. Ephaawu enithoonyerya erutthu yoomalela ya Yesu Kristu, yeeyo ovanhe awe wira onoopole. Vano eviinyu enithoonyerya ephome awe

ATTHU AKINA ANIHIMYA WIRA: “Etthu mukhanle anyu oopaka wira moopowe ori omwaamini Yesu paahi”.

Mwaarowa orumeela sai yoolepa ya Yohani 3:16 ni Yakobo 2:17 wira mmooniherye mutthu owo wira vannitthuneya opaka itthu sikina?

IPONTO SUULUPALE

Ninnooniherya wira ninnivaha efaita ele Yesu onipankenle awe nimwaaminiki ni nirowelaka muthukumano wa Wuupuwelela okhwa wawe.

Wuuluula

Ontaphulela exeeni omwaamini Yesu?
Munrowa wooniherya sai wira munnixukhurela ele Yehova ni Yesu yoopakenlaayani?
Xeeni vari aya vooloka orowela muthukumano wa Wuupuwelela okhwa wa Kristu?

Yoosoma ela kimalinhe nihiku:

Yoolakela aka

Orowela muthukumano wa Wuupuwelela okhwa wa Kristu onittharelana. Munvekele ole onoosomihani Biibiliya wooleelani nihiku na Wuupuwelela, nuumala-vo mulepe vakalentariyuni vanyu.

Ekina:

Soolukama sanyu sikina

NWEHE ITTHU SIKINA

Okhwa wa Kristu onniiriha opaka exeeni?

Yesu Oorumela Okumi Awe Wira Onvuwihe Yehova (9:28)

Mwiixutte itthu sikina sa moota mukhanle anyu oowooniherya waamini.

“Nwaaminiki Anatiri a Yehova” (Owehaweha Outubro, 2016)

Musome mwaha oni: “Miyo Kinniixoona Okhala Ooloka, Mukumi ni Kinnihakalala” wira nwehe moota okumi wa muthiyana mmosa waaturukeyale aya nuumala wiiwexexa ele entaphulela aya mukuttho wa Kristu.

“Biibiliya Onnirukunuxa Mirima sa Atthu” (Owehaweha, 1 a Agosto, 2011)