YOOSOMA 34

Ninrowa Wooniherya Sai Wira Ninnimphenta Yehova?

MURUMIHE

Niireke munoona wira vano munnimphenta vanceene Muluku ovikana okathi mwaapacenrye anyu omusoma Biibiliya? Munniphavela ohihiya olipiha ompatthani anyu ni Muluku? Akhala wira ti siiso, muhiliyale wira vaavo Yehova onoona awe wira munnimphenta vanceene, onrowa otepaka woophentani ni wookhapelelani. Masi munrowa wooniherya sai wira munnimphenta Yehova?

1. Ninrowa wooniherya sai wira ninnimphenta Yehova?

Hiyo ninnooniherya wira ninnimphenta Yehova okathi nimmwiiwelela ahu. (Mmusome 1 Yohani 5:3.) Masi musuweleke wira Yehova khonimukhanyererya mutthu omwiiwelela. Ohiya-vo, owo onvaha eparakha khula mmosa a hiyo othanla omwiiwelela wala ohimwiiwelela. Mwaha wa xeeni? Mwaha woowi Yehova oniphavela wira ‘nimwiiweleleke ni murima wotheene’. (aRoma 6:17) Eyo enitaphulela wira nyuwo muhaana omwiiwelela ohiya mwaha wookhanyereriwa masi mwaha womphenta. Mpantta 3 ni 4 wa eliivuru ela, onimookhaliheryani wooniherya omphenta wanyu Yehova mpakaka itthu sinimusivela ni ohipaka itthu oninyokha awe.

2. Xeeni vanivila aya wooniherya omphenta wahu Yehova?

“Naxariya onnèhereriwa n’uxanka wunjene”. (Esalimo 34:20) Otheene ahu, ninniwanana soovonya sahu. Hiyo pooti omaleliwa wala othoiwa musurukhu aahiiso wiireliwa itthu soohiloka ni okhalana mixankiho sikina. Nto okathi ninkhalana ahu mixankiho, pooti onivila opaka itthu Yehova onnivekela awe. Eyo enniiraneya mwaha woowi vannikhweya opaka itthu soohiloka. Okathi nyuwo munimwiiwelela anyu Yehova, munnooniherya wira munnimphenta ovikana itthu sikina. Nave munnooniherya wira munniroromeleya. Mwiira siiso, Yehova onrowa wookhaliheryakani ni khonikhala-khala oonyanyalakani.—Musome Esalimo 4:3.

MWIIXUTTE ITTHU SIKINA

Nwehe itthu sinimwiiriha Yehova ovaha efaita omwiiwelela wanyu ni moota onrowa awe wookhaliheryani ororomeleya wa yena.

3. Mwaha onoohelani muhina nyuwo

Eliivuru ya mBiibiliyani ya Yobi, hiyo ninnisoma wira Satana aahinvaanyiha Yobi ni atthu otheene aniphavela omurumeela Yehova. Mmusome Yobi 1:1, 6–2:10, nuumala-vo mwaakhule makoho anittharelana:

Ntoko Satana aahimmye awe, etthu xeeni yaamwiiriha Yobi omwiiwelela Yehova?—Munwehe Yobi 1:9-11.
Etthu xeeni Satana oniwootherya awe apinaatamu otheene woohelani muhina nyuwo?—Munwehe Yobi 2:4.

Mmusome Yobi 27:5b, nuumala-vo mwaakhule nikoho ninttharelana:

Yobi oonihenrye sai wira aanimphenta Yehova ni murima wootheene?

Yobi aahooniherya wira aanimphenta Yehova vaavo ahaahiyale awe ororomeleya

Hiyo ninnooniherya wira ninnimphenta Yehova okathi nihinhiya ahu ororomeleya

4. Mmuhakalaliheke Yehova

Musome Miruku 27:11, nuumala-vo mwaakhule makoho anittharelana:

Yehova onoonela sai vaavo nyuwo munipaka anyu itthu sooloka ni munimwiiwelela anyu? Mwaha wa xeeni?

5. Nyuwo munoowerya ororomeleya wa Yehova

Hiyo ninnimphenta Yehova. Nto eyo enniniiriha waalaleerya atthu akina voohimya sa yena. Okhala wira ninniroromeleya wa Yehova, nimphavela omwiiwelela hata vavilaka opaka eyo. Nwehe EVIIDIYU, nuumala-vo mwaakhule makoho.

EVIIDIYU: Mwaakiheryeke Waamini Wanyu Hata Mulupatthiwaka (5:09)

Niireke vannoovilani waalaleerya atthu akina voohimya sa Yehova?
Eviidiyu niwenhe ahu, etthu xeeni yaamukhalihenrye Claúdio oxintta woova?

Vannikhweya ororomeleya wa Yehova okathi nimphenta ahu itthu oniphenta awe ni ninnyokha ahu itthu oninyokha awe. Musome Esalimo 97:10, nuumala-vo mwaakhule makoho anittharelana:

Nuupuwelaka itthu sootheene mwiixuntte anyu, itthu xeeni Yehova oniphenta awe? Itthu xeeni Yehova oninyokha awe?
Munrowa wiixutta sai ophenta itthu sooloka ni onyokha itthu sootakhala?

6. Omwiiwelela Yehova onniniphwanyiha mireerelo

Okathi wootheene, omwiiwelela Yehova etthu yootepexa oloka. Mmusome Yesaya 48:17, 18, nuumala-vo mwaakhule makoho anittharelana:

Munoona wira okathi wootheene nihaana okupali wira Yehova onnisuwela itthu sinniphwanyiha mireerelo? Mwaha wa xeeni?
Itthu mwiixuntte anyu mBiibiliyani ni Muluku eekeekhai Yehova, sookhalihenryeni sai mpakha-va?

ATTHU AKINA ANIHIMYA WIRA: “Muluku khonithokorerya itthu kinipaka aka”.

Yoolepa xeeni ya mBiibiliyani mwaarowa anyu orumeela wira mmukhaliherye mutthu owo woona wira itthu nimpaka ahu pooti omuhakalaliha wala omuriipiha murima Yehova?