Nkahaya mmuupuwele maama oophenta oninwariha ni omurattela mwanawe wira orowe oxikola. Owo onniweha akhala wira ikuwo sa mwanawe ti sookatthiwa ni sooreera. Nave onniweha akhala wira oophwaneliwa. Eyo ennimukhaliherya mwaana owo okhalana okumi wooloka ni atthu akina annoona wira anamuyari awe annimukhapelela oratteene. Ntoko siisaale anamuyari aniphavela aya wira anaaya akhaleke ooratta, Tiithi ihu oophenta Yehova oniphavela wira nikhaleke ooratta weerutthuni ni mweettelo ahu wootheene. Maana oratta onniniphwanyiha mireerelo sinceene ni onninvuwiha Yehova.

1. Xeeni vari aya vooloka orattela erutthu ahu?

Yehova onihimya wira: “Mukhaleke oowaarya”. (1 Pedru 1:16) Wira nikhale atthu oowaarya, nihaana orattela erutthu ahu ni okhalana mweettelo wooloka. Hiyo ninnirattela erutthu ahu, nirapaka ikwaha sinceene, okattha ikuwo sahu, orattela empa ahu, ekaaro ni okhapelela oratteene mireerelo sahu. Nave nihaana okhaliherya orattela Empa ya Omwene. Okathi ninrattela ahu erutthu ahu, ninninvuwiha Yehova.—2 aKorinto 6:3, 4.

2. Wira nikhale atthu ooratta, soolema xeeni ninreerela ahu okhootta?

Biibiliya, onnintumererya wira ‘nikumihe itthu sotheene sinnanariha erutthu ni munepa’. (2 aKorinto 7:1; enoota.) Moolumo ala, annooniherya oratteene wira nihaana wiimananiha okhootta itthu saarowa ohonona erutthu ahu ni muupuwelo ahu. Hiyo nimphavela okhalana miyuupuwelelo sinimuhakalaliha Yehova. Tivonto nniimananiha ahu okhootta miyuupuwelelo soohiloka. (Esalimo 104:34) Nave ninniimananiha olavula moolumo ooloka.—Mmusome aKolosi 3:8.

Itthu xeeni sikina saarowa ohonona erutthu ahu ni mweettelo ahu? Mirette soohapala, pooti okumiherya mixankiho erutthu ahu. Tivonto, hiyo nihinimpaha ahu soona, sikaro ni nihinlya ahu mirette soohapala. Opaka eyo, enninikhaliherya okhalana okumi wooloka ni ninnooniherya wira ninnittittimiha okumi. Ninrowa okhalana sai mweettelo wooloka? Nihaana wiimananiha okhootta soolema soohiloka ntoko wiivukula ni oweha epornokrafia. (Esalimo 119:37; aEefeso 5:5) Ekeekhai wira ikwaha sikina khivanikhweya ohiya soolema iyo. Masi nikhaliheriwaka ni Yehova nnoowerya ottharuwa soolema iyo.—Mmusome Yesaya 41:13.

 MWIIXUTTE ITTHU SIKINA

3. Orattela erutthu ahu onninvuwiha Yehova

Malamulo Yehova aavanhe awe aisarayeli annooniherya wira oninvaha efaita oratta ni oniphavela wira atthu awe akhaleke ooratta. Mmusome Okhuma 19:10 ni 30:17-19, nuumala-vo mwaakhule makoho anittharelana:

• Soolepa iya, sinooniherya sai wira Yehova oniphavela wira nikhaleke atthu ooratta?

• Itthu xeeni sinrowa wookhaliheryani okhala mutthu ooratta?

Okathi wootheene, nihaana wiimananiha orattela erutthu ahu. Nnoowerya orattela erutthu ahu, moohicikha opuro ninkhala ahu, naari ene oohaawa aahiiso athaaciri. Nwehe EVIIDIYU, nuumala-vo mwaakhule nikoho.

• Xeeni orattela mireerelo sahu oninvuwiha aya Yehova naalaleeryaka?

4. Muttharuwe soolema soohiloka

Akhala wira munnimpaha soona aahiiso munnoolya mirette sikina soohapala, munnisuwela wira vannivila ottharuwa soolema iyo. Etthu xeeni enrowa wookhaliheryani ottharuwa? Muupuweleke moota soolema iyo sinihonona aya okumi anyu. Mmusome Matheyo 22:37-39, muthokorerye iponto sinittharelana. Ompaha soona aahiiso olya mirette soohapala sinihonona sai . . .

• waataana wanyu ni Yehova?

• ompatthani anyu ni amusi aahiiso ni atthu akina?

Mumpakeke palano wira muxintte soolema soohiloka. a Nwehe EVIIDIYU.

Mmusome aFilipi 4:13, nuumala-vo mwaakhule nikoho ninttharelana:

• Ovekela, omusoma Biibiliya ni orowela mithukuma- no, onrowa wookhaliheryani sai ohiya soolema soohiloka?

 5. Muxintte miyuupuwelo ni soolema soohiloka

Mmusome aKolosi 3:5, nuumala-vo mwaakhule makoho anittharelana:

• Ninsuwela sai wira oweha epornografia, sexting b ni wiivukula soolema sinimunanara Yehova?

• Munoona wira vanniweryaneya okhalana mweettelo wooloka ntoko Yehova oniphavela awe? Mwaha wa xeeni?

Nwehe moota wooxintta miyuupuwelelo soohiloka. Nwehe EVIIDIYU.

Mmusome Matheyo 5:29, 30, nuumala-vo mwaakhule nikoho ninttharelana:

• Yesu khaaphavela ohimya wira nihaana wiivulaliha. Masi aaphavela ohimya wira nihaana opaka etthu wira nihiye yoolema eyo. Etthu xeeni mutthu onireerela awe opaka wira okhootte miyuupuwelelo soohiloka? c

Akhala wira munniimananiha okhootta miyuupuwelelo soohiloka, musuweleke wira Yehova onnivaha efaita wiimananiha wanyu. Musome Esalimo 103:13, 14, nuumala-vo mwaakhule nikoho ninttharelana:

• Akhala wira vannoovilani ottharuwa soolema soohiloka, yoolepa ela enrowa wookhaliheryani sai ohihiya wiimananiha ottharuwa?

 IPONTO SUULUPALE

Vaavo ninrattela ahu erutthu ahu, muupuwelo ni ninkhalana ahu mweettelo wooloka, ninnimusiveliha Yehova.

Wuuluula

• Xeeni vari aya vooloka okhala ooratta mwa inamuna sootheene?

• Etthu xeeni enrowa onikhaliherya orattela erutthu ahu?

• Ninrowa okhalana sai miyuupuwelelo ni mweettelo wooloka?