Kiireke Kihiilokiherya?
Kiireke Kihiilokiherya Wira Kipacerye Olaleerya ni Muloko?
Nyuwo pooti okhala namalaleerya oohipatisiwa akhala wira . . .
Munnisomihiwa Biibiliya, munnivekela ni munnirowela mithukumano sotheene.
Munnisiveliwa ni munnikupali itthu muniixutta anyu mBiibiliyani ni munnaaleela atthu akina.
Munnimphenta Yehova ni akhala wira apatthani anyu atthu yaale animphenta Yehova.
Mookhuma etiini yoowootha ni khamuniirela mpantta epoliitika.
Munneettela malamulo a Yehova ni munniphavela ni murima wotheene okhala Namoona a Yehova.
Akhala wira munoona wira muhiilokiherya wira mulaleeryeke ni muloko. Ole onoosomihani Biibiliya ni axitokweene anli anoovaanela ni nyuwo wira awehe akhala wira pooti okhala namalaleerya oohipatisiwa.
Kiireke Kihiilokiherya Wira Kipatisiwe?
Nyuwo pooti opatisiwa akhala wira . . .
Mwa namalaleerya oohipatisiwa.
Munnilaleerya ikwaha sinceene moovarihana ni makhalelo anyu.
Munniiwelela ni okhaliherya malakiheryo a “murumeyi oororomeleya ni a ankhili”.—Matheyo 24:45-47.
Muhiivahererya wa Yehova ni munniphavela omurumeela mahiku otheene.
Akhala wira munoona wira muhiilokiherya wira mpatisiwe, ole onoosomihani Biibiliya onimwaaleela axitokweene. Nto axitokweene anli anoovaanela ni nyuwo wira awehe akhala wira munnireerela opatisiwa wira mukhale Namoona a Yehova.
