MURU 10
Ekasamento Yoovaha Ya Muluku
“Mukhoi worithiwa vararu, olipa okwaseya”.—MUSUWELI 4:12.
1, 2. (a) Ale anthelana niinaano anlipelela exeeni? (b) Muru ola, ninrowa waakhula makoho xeeni?
NKAHAYA MUUPUWELE nihiku atthu anli anrowa aya othelana. Oowanli aya khareere ohakalala maana anrowa okhalaka vamosa ni aakhalana apalano a muhoolo. Tthiri annikupali wira ekasamento aya enrowa okhala yoohakalala ni ya mahiku otheene.
2 Masi ikasamento sinceene saapacenrye moohakalaliha khasivikaninhe okhala soohakalala. Tthiri wira ekasamento ekhale yoohakalala ni ya mahiku otheene, ehaana otthara malakiheryo a Muluku. Nrowe niwehe moota Biibiliya onaakhula awe makoho ala: Ekasamento enikumiherya mireerelo xeeni? Akhala wira muniphavela othela wala otheliwa, munrowa omuthanla sai mwa miruku ole munrowa anyu othelana? Munrowa okhala sai mulopwana oothela ni muthiyana ootheliwa ooloka? Exeeni enrowa okhaliherya ekasamento anyu okhala ya mahiku otheene?—Musome Miruku 3:5, 6.
KIIREKE KIHAANA OTHELA WALA OTHELIWA?
3. Niireke mutthu ohaana othela wala otheliwa wira ophwanye ohakalala wekeekhai? Mutthokiherye.
3 Atthu akina anuupuwela wira anoophwanya ohakalala wekeekhai akhala wira anoothela wala anootheliwa. Masi eyo khahiyo ekeekhai. Yesu aahimmye wira ohithela wala ohitheliwa etthu yooloka wala yoovaha ya Muluku. (Matheyo 19:11, 12) Nave murummwa Paulo aahimmye wira ohithela aahiiso ohitheliwa wookhalana mareeliho manceene. (1 aKorinto 7:32-38) Xontte muhiweemererye amusi anyu, apatthani wala soolema sa opuro munikhala anyu sookhanyereryakani othela wala otheliwa. Maana nyuwo paahi mukhanle oothanla akhala wira munoothela wala munootheliwa.
4. Ekasamento enikumiherya mireerelo xeeni?
4 Nave Biibiliya onihimya wira ekasamento yoovaha ya Muluku ni yookhalana mireerelo saya. Yehova aahimuleela Adamu wira: “Khivamurèrenle mutthu okhala mekhawe. Kintthuna ompattuxerya mukhaliheryo womphwanela”. (Maphattuwelo 2:18) Okathi Yehova ampattunxe awe Eva wira okhale mwaarawe Adamu, awo yaahikhala etthoko yoopacerya ya apinaatamu. Ohiya-vo, akhala wira anamathelana ahaayara anamwane, ekasamento aya pooti okumiherya opuro woohakalaliha wira anaaya yinnuwe saana. Masi, musuweleke wira waayara anamwane khahiyo yoolakela yuulupale ya ekasamento.—Esalimo 127:3; aÉfeso 6:1-4.
5, 6. Mwa enamuna xeeni ekasamento eri aya ntoko “mukhoi worithiwa vararu”?
5 Mwene Salomoni aalempe so: “Halali okhala atthu anli ovikana okhala mmosa pahi: atthu anli anvara muteko vamosá annitepa oreriwa. Tthiri, mmosá a yawo amorá, mukina onnimukhaliherya ovenya. Òtakhaliwa t’ule onkhala mekhawe: amorá vale, kharina mukhw’awe onimukhaliherya ovenya. . . . Mukhoi worithiwa vararu, olipa okwaseya”—Musuweli 4:9-12.
6 Ekasamento yooloka, enikhumelela vaavo atthu anli aniiraana aya, okhala apatthani, okhaliheryana, olipihana ni okhapelelana mukina ni mukhwaawe. Ekeekhai wira ophenta onnilipiha ekasamento, masi musuweleke wira ekasamento ennitepa olipa akhala wira oowanli anyu munnimukokhorela Yehova. Nto, akhala wira ti siiso, ekasamento eyo enkhala ntoko “mukhoi worithiwa vararu”, eyo piiyo, mikhoi miraru sirithiwe saana vamosa. Mukhoi ntoko owo, onnilipa vanceene ovikana mukhoi orithiwe ni mikhoi miili. Tthiri ekasamento enimuhela muhina Yehova, ennilipa vanceene.
7, 8. Itthu xeeni Paulo aahimmye awe voohimya sa ekasamento?
7 Nuumala othelana, mulopwana ni muthiyana ari ootaphuwa orupihana wira amalihe munkhela aya. (Miruku 5:18) Akhala wira mutthu onniphavela othela wala otheliwa mwaha woophavela orupihana, owo onoomukuxa mutthu oohinreerela awe othelana. Tivonto Biibiliya onihimya awe wira mutthu ohaana othela nuumala ovira okathi “w’okhummwa murima”, eyo piiyo, nuumala ovira okathi mutthu onimakela awe wuupuwela orupihana paahi. (1 aKorinto 7:36) Tthiri ti vooloka othela wala otheliwa nuumala ovira okathi owo. Mwiira siiso, munoowerya wuupuwela saana ni opaka yoothanla yooloka.—1 aKorinto 7:9; Yakobo 1:15.
8 Akhala wira munuupuwela othela wala otheliwa, ti vooloka osuwela wira khula ekasamento yookhalana mixankiho saya. Murummwa Paulo aahimmye wira ale anthelana “anophwanya maxakha a vathí-va”. (1 aKorinto 7:28) Hata ikasamento seiye sinikhala ntoko ti soohakalala sinnikhalana okathi wooxankiha. Nto akhala wira munoothanla othela wala otheliwa, mmuthanleke mwa miruku mwaarinyu wala iyanyu.
KINROWA OMUTHANLA SAI OLE KINROWA AKA OTHELANA?
9, 10. Exeeni yaarowa okhumelela akhala wira ninnithelana ni mutthu ohinimukokhorela Yehova?
9 Muhinatthi omuthanla mwaarinyu wala iyanyu, ti vooloka wuupuwela malakiheryo ala ani: “Muhatàneke n’ale ahinamini”. (2 aKorinto 6:14) Nkahaya muupuwele ela: Akhala wira inama piili sa munnuwelo ni ikuru soovirikana sinnitthukweleliwa vamosa, sotheene sinoohaawa. Opaka eyo khiwaarowa okhaliherya inama iyo. Mwa enamuna emosaru, akhala wira mutthu onimukokhorela Yehova onnimutthela wala onnitheliwa ni mutthu ohinimukokhorela Yehova, ekasamento eyo enookhalana mixankiho sinceene. Tivonto Biibiliya onihimya awe wira muthelaneke “aKristu-ru”.—1 aKorinto 7:39.
10 Okathi mukina, maKristau makina anuupuwela wira vaamuloka omuthela wala otheliwa ni mutthu ohinimukokhorela Yehova, ohiya okhala ahithenle wala ahitheliwe. Masi muhiliyale wira ohitthara malakiheryo a Biibiliya onnikumiherya mixankiho. Hiyo ninnivaha efaita yuulupale omukokhorela Yehova. Mwaarowa woonela sai ohimuleela mwaarinyu wala iyanyu itthu sa faita sa mookumini mwanyu? Atthu akina annithanla okhala ahithenle wala ahitheliwe ohiya othelana ni mutthu ohinimukokhorela Yehova.—Musome Esalimo 32:8.
11. Munrowa omuthanla sai mwa miruku ole munrowa anyu othelana?
11 Musuweleke wira khahiyo khula mutthu onimurumeela Yehova onrowa okhala mwaarinyu wala iyanyu ooloka. Akhala wira munuupuwela othela wala otheliwa, muhaana omuthanla mutthu munrowa anyu okhalanaka saana ni onoosivelani ni murima wotheene. Nave muhaana olipelela mpakha omphwanya mutthu murina anyu soolukama simosaru ni onihela nipuro noopacerya Omwene wa Muluku. Mphavelaseke okathi wira musome ni wuupuwelela malakiheryo anikumiheriwa ni murumeyi oororomeleya ni ankhili.—Musome Esalimo 119:105.
12. Ntakiheryo xeeni Abrahamu ovanhe awe vaavo aamuthanlale awe muthiyana wira otheliwe ni mwanawe iihaniwa Isakhi?
12 Ilapo sikina, anamuyari annimuthanla mutthu mwanaya onrowa awe othelana. Ilapo iyo atthu anuupuwela wira opaka eyo enoomukumiherya mireerelo mwanaya. Yoolema eyo yaahuulaana okathi aalempwa awe Biibiliya. Mwa ntakiheryo, Abrahamu aahimuthanla muthiyana wira okhale mwaarawe mwanawe iihaniwa Isakhi. Masi etthu Abrahamu aaphavela awe khahiyo musurukhu wala okhulupale mmuttettheni, maana amphavela muthiyana amphenta Yehova wira otheliwe ni mwanawe. Nto akhala wira etthoko anyu enniphavela otthara yoolema eyo, Biibiliya pooti wookhaliheryani omuthanla mwa miruku mutthu onrowa omuthela wala otheliwa ni mwaninyu.—Maphattuwelo 24:3, 67; nwehe Enoota n.° 25.
KINROWA WIILOKIHERYA SAI?
13-15. (a) Mulopwana onuupuwela othela, miritti xeeni onireerela awe wiilokiherya? (b) Muthiyana onuupuwela otheliwa, miritti xeeni onireerela awe wiilokiherya?
13 Vakhala wira munuupuwelela othela wala otheliwa, muhaana ovira okathi wa omiravo. Woonasa wene pooti muupuwelaka wira muhinnuwa ni muhiilokiherya saana. Masi nrowe niwehe ele entaphulela aya wiilokiherya wira mutthu othele wala otheliwe. Woonasa wene eyo enimootikinihani.
Mphavelaseke okathi wira musome ni wuupuwelela malakiheryo a Biibiliya voohimya sa ekasamento
14 Biibiliya onnooniherya wira mulopwana oothela ni muthiyana ootheliwa, ookhalana muteko awe vatthokoni. Nto eyo enooniherya wira, wiilokiherya ontaphulela okhala oolikana ene wira mmaliherye miritti sanyu vatthokoni. Akhala wira mulopwana onuupuwela othela, ohaana wiikoha akhala wira onoowerya okhala muhooleli a etthoko. Yehova oniphavela wira mulopwana oothela aakhapeleleke amwaarawe ni anaawe werutthuni ni mmuupuweloni. Masi etthu yootepa otthuneya, Yehova oniphavela wira mulopwana okhapeleleke etthoko awe momunepani. Biibiliya onihimya wira mulopwana ohinikhapelela etthoko awe “t’òtakhala murima onvikana mutthu ohinamini”. (1 Timótheyo 5:8) Akhala wira mwa mulopwana ni munuupuwela othela, nwehe ele Biibiliya onihimya awe oriki: “Mwatthunaka oteka emp’anyu, mpajeryeke ovara miteko sa vaté, mpajeryeke otthukula ematta toko”. Moolumo ala anooniherya wira, muhinatthi othela muhaana wuupuwela enamuna ya mulopwana oothela Yehova oniphavela awe wira mukhale.—Miruku 24:27.
15 Muthiyana onuupuwela otheliwa ohaana wiikoha akhala wira onoowerya omaliherya muritti wa muthiyana ootheliwa wala waayara anamwane. Biibiliya onnihimya itthu muthiyana ootheliwa onireerela awe opaka wira omukhapelele iyawe ni anaawe. (Miruku 31:10-31) Olelo-va, atthu anceene anuupuwela paahi ele ole athelanne aya okhanle awe oowiiriha wala waapakela. Masi Yehova oniphavela wira nipakeke itthu sinrowa omphwanyiha mireerelo ole nithelanne ahu.
16, 17. Akhala wira munuupuwela othela, muhaana wuupuwelela exeeni?
16 Muhinatthi othela wala otheliwa, muhaana wuupuwelela ele Yehova oninvekela awe mulopwana oothela ni muthiyana ootheliwa. Mwa ntakiheryo, okhala muhooleli a etthoko khonitaphulela orumeela okhulupale anyu wira mwaaruwaneke wala waamana atthu a etthoko anyu. Muhooleli a etthoko ooloka, ohaana omutakiha Yesu okhalaka oophenta ni waareerela murima atthu otheene onaakhapelela awe. (aÉfeso 5:23) Nave, muthiyana ootheliwa ohaana osuwela ele entaphulela aya okhaliherya soothanla sa iyawe ni wiiwelela. (aRoma 7:2) Nave, ohaana wiikoha akhala wira onoowerya ovikaniha okhala mutthu oohakalala omwiiwelelaka mulopwana oohimalela. Masi oona wira khonwerya omwiiwelela, vaamuloka ovikaniha okhala ohitheliwe.
17 Ale athelanne ahaana wiimananiha omuhakalaliha ole athelanne aya ovikana wiihakalaliha mmensaya. (Mmusome aFilipi 2:4.) Murummwa Paulo aalempe so: “Mulopwana amphenteke mwar’awe ntoko sinìphentawe, ni wira muthiyana amuttittimihe iy’awe”. (aÉfeso 5:21-33) Tthiri okhale mulopwana wala muthiyana ohaana woona wira onniphentiwa ni ottittimihiwa. Masi wira ekasamento ekhumele saana, mulopwana ohaana woona wira onnittittimihiwa ni muthiyana ohaana woona wira onniphentiwa ni iyawe.
18. Xeeni vari aya vooloka okhalana ephoole okathi woonamorari?
18 Okathi woonamorari, ohaana okhala woohakalaliha ni woosuwelana saana. Nave okathi owo khivanreerela okhala ntoko namanriya, maana muhaana osuwela oratteene akhala wira munoowerya okhala ni mutthu owo okumi anyu wotheene. Muhiliyale wira okathi woonamorari oowanli anyu pooti wiixutta moota woovaanela ni muhaana wiimananiha osuwela omutthu awe, ole munrowa anyu othelana. Nto vaavo onamorari wanyu onrowa aya olipaka, okhala wene munrowa otepaka osivelana. Masi muhaana wiivaha ephoole wira muhipake etthu yoohiloka ntoko orupihana muhinatthi othelana. Ophenta wekeekhai onimwaakhaliherya ale annamorari wiihiiha. Nave onimwaakhaliherya ohipaka etthu yaarowa ohonona waataana waya ni Yehova.—1 aTesalonika 4:6.
Okathi woonamorari mulopwana ni muthiyana pooti wiixutta ovaanela saana mukina ni mukhwaawe
KINROWA WIIRIHA SAI EKASAMENTO AKA OKHALA YA MAHIKU OTHEENE?
19, 20. Ekasamento ya maKristau ehaana okhala mahiku makavi ni nthowa xeeni?
19 Iliivuru ni ifilme sinceene, sinnooniherya ifesta sa ekasamento soohakalaliha. Masi muhiliyale wira, othelana wanipacerya paahi. Maana Yehova oniphavela wira ekasamento anyu ekhaleke mahiku otheene.—Maphattuwelo 2:24.
20 Atthu anceene olelo-va, anuupuwela wira ekasamento ti ya okathi vakhaani paahi. Awo anihimya wira ti vookhweya othelana ni ti vookhweya omwalana. Akina anoona wira vaavo sinikhumelela aya mixankiho mukasamentoni, etthu yooreerela opaka omwalana. Niireke munnuupuwela nlikanyiho na mukhoi woorithiwa vararu? Mukhoi ntoko owo ti woolipa ni onnipisa okwaseya. Mwa enamuna emosaru akhala wira munoophavela okhaliheriwa ni Yehova, ekasamento anyu pooti okhala ya mahiku otheene. Yesu aahimmye so: “Yeyo Muluku ephitanyalyawe mutthu ahimwalanyihé-tho”.—Matheyo 19:6.
21. Exeeni enrowa waakhaliherya anamathelana okhalana ekasamento yoohakalaliha?
21 Otheene ahu sookhala itthu ninwerya ahu opaka ni nihinwerya ahu. Nto vannikhweya oweha soovonya sa mutthu mukina, otepexa wene sa mutthu ole nthelanne ahu. Muhiliyale wira mwapaka eyo khamunrowa ohakalalaka. Masi akhala wira munoowehaka mikhalelo sooloka sa iyanyu wala sa mwaarinyu, munookhalana ekasamento yoohakalala. Niireke vanniweryaneya oweha itthu sooloka ohiya soohiloka? Aayo! Mwa ntakiheryo, Yehova onnisuwela wira naatthu oohimalela. Masi hata vari siiso, owo oniwehexexa mikhalelo sahu sooloka. Nkahaya muupuwele vaakhanle wira Yehova oniwehexexa soovonya sahu paahi. Esalimo 130:3, Biibiliya onihimya so: “Apwiya! Mwathokoreryá sottheka sahu, ti pani onalipé oholo wanyu?” Anamathelana ahaana omutakiha Yehova awehexexaka mikhalelo sooloka sa ole athelanne aya ni olevelelana mukina ni mukhwaawe.—Mmusome aKolosi 3:13.
22, 23. Ntakiheryo xeeni nooloka Abrahamu ni Sara yaavanhe aya anamathelana?
22 Vaavo okathi onrowa aya oviraka, ekasamento anyu pooti olipaka. Abrahamu ni Sara yaahikhalana ekasamento yoohakalaliha ni ya okathi wotheene. Okathi Yehova aamulenle awe Abrahamu wira aahaana okhuma epooma ya Uri, woonasa wene Sara aarina iyaakha saavikana 60. Nave pooti wira waahimuxankiha ohiya empa awe yooloka wira akhaleke muheemani. Masi Sara aanisuwela wira mpatthani awe oolokexa aari iyawe. Ohiya-vo, owo aanimphenta ni omuttittimiha iyawe. Eyo yaahimwiiriha Sara omukhaliherya Abrahamu ni opaka itthu sotheene aawerya awe wira itthu sotheene seette saana.—Maphattuwelo 18:12; 1 Pedru 3:6.
23 Ekeekhai wira okhalana ekasamento yooloka khontaphulela wira okathi wotheene anamathelana awo anrowa wiiwananaka mwa inamuna sotheene. Vaavo Abrahamu aaheemerenrye awe moonelo wa Sara, Yehova aamulenle so: “Mwireke sothene Sara sinovekelaweni”. Abrahamu aahiiwelela eyo, nto itthu saaheetta saana. (Maphattuwelo 21:9-13) Akhala wira okathi mukina khamuneemererya moonelo wa mwaarinyu wala wa iyanyu, muhikhulumuwe. Etthu yootepexa oloka ori omphenta ni omuttittimiha hata muheemereryaka moonelo wa ole muthelanne anyu.
Okhuma wanipacerya, Biibiliya ohaana wiirela mpantta ekasamento anyu
24. Muhaana opaka exeeni wira ekasamento anyu envuwiheke Yehova?
24 Mmutthenkesoni mwa Yehova aakhala anamathelana anceene oohakalala. Akhala wira munuupuwela othela wala otheliwa, muhiliyale wira omuthanla ole munrowa anyu othelana yoothanla yootepexa otthuneya mookumini mwanyu. Musuweleke wira yoothanla anyu pooti oturuka okumi anyu wotheene. Nto mwiimananiheke otthara malakiheryo a Yehova ohiya weettela murima anyu. Akhala wira munoopaka eyo, munoomuthanla saana mwaarinyu wala iyanyu. Nave munimwiilokiherya saana wira mukhalane ekasamento yoolipa ni eninvuwiha Yehova.
