1, 2. Nihaana opaka exeeni wira nihihiye omphenta Muluku?

OTHEENE AHU ninniphavela okhalana ikuru ni ekumi yooloka. Tivonto ninlya ahu yoolya yooloka, otthimaka okathi munceene ni okhapelela saana erutthu ahu. Nnaamwi otthuneyaka wiimananiha opaka eyo, sookhumelela saya ti sooloka ni khannooceya opaka itthu iyo. Masi yookhala enamuna ekina ninreerela ahu okhalana okumi wooloka ni woolipa.

² Nnaamwi nimusuwelaka oratteene Yehova, nihaana ovikaniha olipiha waataana wahu ni yena. Vaavo Yuda aatumerenrye awe maKristau okhala “mophentani mwa Muluku” owo aahihimya nthowa naya ori aya vooloka opaka eyo. Owo aahimmye so: “Mutepeke wunnuwa mowaminini mwanyu mowaryexa”. (Yuda 20, 21) Ninrowa olipiha sai waamini wahu?

3-5. (a) Satana oniphavela wira nooneleke sai malamulo a Yehova? (b) Nyuwo munoonela sai malamulo ni malakiheryo a Yehova?

³ Ti vooloka okupali ni murima anyu wotheene wira enamuna Yehova onipaka awe itthu ti yooloka. Satana oniphavela owiirihani wuupuwela wira malamulo a Yehova toovila weettela, ni wira munoohakalalaka akhala wira munimweettelaka murima anyu. Okhuma ojardim ya wEdeni, Satana onniwiiriha atthu othanla ele anoona aya okhala yooloka ni  yoohiloka. (Maphattuwelo 3:1-6) Olelo-va, Satana onipaka etthu emosaru.

⁴ Niireke Satana onihimya ekeekhai? Niireke malamulo a Yehova toovila weettela? Nnaari. Nkahaya muupuwele mweettaka eparkhi yooreera. Vano munniweha mpantta mukina wa eparkhi etekeleliwe ene ni ekintaali ya araami. Woonasa wene, nyuwo mwaamuupuwela so: ‘Xeeni ehalaka opakiwa ekintaali ela?’ Moohipisa munnimwiiwa kharamu oopaka murukulu mpantta yoowo otekeleliwe. Mwarowa woonela sai ekintaali eyo? Tthiri yahaakhanle ekintaali eyo, nyuwo mwaamukhuuriwa. Malakiheryo a Yehova ari ntoko ekintaali, vano kharamu owo ti Satana Diabo. Biibiliya onihimya so: “Mwisumalihe, mwipasopeke. Nwanan’inyu, Satana, onorukureryani ntoko kharamu onòpa murukulu, amphavelaka òmukhura”.—1 Pedru 5:8.

⁵ Yehova oniphavela wira nikhalaneke ekumi yootepexa oloka. Owo khoniphavela wira niwokiwe ni Satana. Tivonto Yehova onivanhe awe malamulo ni malakiheryo wira anikhapeleleke ni nihakalaleke. (aÉfeso 6:11) Murummwa Yakobo aalempe so: “Ale antthokelela ikano somalela so wòpoliwa, enettela orattene, . . . atthu awo anophwanya oreriwa [ohakalala]”.—Yakobo 1:25.

6. Exeeni ennikupaliha wira enamuna Yehova onipaka awe itthu ti yootepexa oloka?

⁶ Vaavo nimmwiiwelela ahu Yehova, ninnikhalana okumi wooloka ni ninnilipiha waataana wahu ni yena. Mwa ntakiheryo, Yehova oniphavela wira ninvekeleke khula okathi nimphavela ahu ni opaka eyo enninikhaliherya vanceene. (Matheyo 6:5-8; 1 aTesalonika 5:17) Nave ninnihakalala vaavo nniiwelela ahu malakiheryo awe a othukumana wira nimukokhorele, olipihana mukina ni mukhwaawe, olaleerya ni owiixuttiha atthu ihapari sooreera. (Matheyo 28:19,  20; aGalasia 6:2; aHéberi 10:24, 25) Vaavo nnuupuwela ahu moota itthu iyo sinikhalihenrye aya olipiha waamini wahu, ninnitepa okupali wira enamuna Yehova onipaka awe itthu ti yootepa oloka.

7, 8. Exeeni enrowa onikhaliherya ohitepa oxanka nuupuwelaka wira muhoolo waamini wahu onrowa weehereriwa?

⁷ Hiyo pooti oxanka nuupuwelaka wira muhoolo waamini wahu onrowa weehereriwa vanceene. Akhala wira munooxanka, muupuweleke moolumo a Yehova ani: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara. Nyuwo mwaiwelelá soruma saka, oreriwa wanyu wamulikana ni màsi anririha ematta, owerya wanyu wamunnuwa ntoko mawimpi a mphareya”.—Yesaya 48:17, 18.

 ⁸ Moohaanyiherya, vaavo nimmwiiwelela ahu Yehova, murettele ahu onikhala ntoko muro ohinuuma maasi. Nave exariya ahu, eyo piiyo, mweettelo ahu onkhala ntoko mawimpi a mphareya, yaawo amphiya muxerexere. Moohicikha ele enrowa onikhumelela, nnoowerya ovikaniha ororomeleya. Biibiliya onileiherya so: “Mwareye Apwiya [Yehova] muritti anyu: awo t’aniwemexani: awo khanamuhiye naxariya akwattuliwaka”.—Esalimo 55:23.

9, 10. Ontaphulela exeeni okhala muKristau oolipa?

⁹ Vaavo ninlipiha ahu waataana wahu ni Yehova, ninnikhala maKristau oolipa ‘nettaka nrowaka oholo’. (aHéberi 6:1) Ontaphulela exeeni okhala muKristau oolipa?

¹⁰ Okhala muKristau oolipa khontaphulela okhalana iyaakha sinceene. Tthiri wira nikhale maKristau oolipa, nihaana okhala apatthani a Yehova ni oweha itthu ntoko Yehova oniweha awe. (Yohani 4:23) Murummwa Paulo aalempe so: “Vekekhai, ale antthara makhalelo aya òtakhala anniphavela itthu iye sotakhala: vano ale antthara eroho, anniphavela itthu sintthunaya eroho”. (aRoma 8:5) MuKristau oolipa khonihela nipuro noopacerya mookumini mwawe itthu sa werutthuni ni mihakhu. Ohiya-vo, owo onniimananiha omurumeela Yehova ni opaka soothanla mwa miruku. (Miruku 27:11; mmusome Yakobo 1:2, 3.) Nave mutthu oolipa momunepani onnisuwela itthu sooloka ni onniimananiha opaka itthu iyo hata okhanyereriwaka opaka itthu soohiloka.

11, 12. (a) Exeeni murummwa Paulo aahimmye awe sa ‘walimaleliha ankhili’? (b) Mwa enamuna xeeni okhala muKristau oolipa onlikana aya ni mulipa-ootthimaka?

¹¹ Nihaana wiimananiha wira nikhale maKristau oolipa. Murummwa Paulo olempe so: “Yolya yolipa ti y’atthu atokwene, mana yawo ahalimaleliha ankhili aya osuwela  n’uthanla sorera ni sotakhala”. (aHéberi 5:14) Nuulumo noowi “ahalimaleliha” ninnuupuxerya mulipa onipaka isersiisiyu.

¹² Vaavo nninweha ahu mutthu opakaka isersiisiyu, ninnisuwela wira ohiimananiha vanceene wira opake etthu onipaka awe. Owo khoyariwe opakaka etthu eyo. Vaavo oniyariwa awe mwaana, owo khonsuwela moota woorumeela miyoono ni metto sawe. Nuuvira okathi, owo onniixutta moota woweetta ni okuxa itthu. Mwaha wowiixuttihiwa, owo onniwerya okhala mulipa ootthimaka. Mwa enamuna emosaru, onnivira okathi wira niixutte okhala muKristau oolipa momunepani.

13. Wira nuupuweleke ntoko Yehova, nihaana wiikoha exeeni?

¹³ Eliivuru ela, nihoona moota wowuupuwela ntoko Yehova onuupuwela awe ni woona itthu ntoko onoona awe. Nave nihiixutta moota woophenta ni ovaha efaita malamulo ni malakiheryo a Yehova. Okathi nimpaka ahu soothanla nihaana wiikoha so: ‘Malamulo xeeni ni malakiheryo a mBiibiliyani anivarihana ni mwaha ola? Kinrowa ovarihela sai muteko? Yehova oniphavela wira kipake exeeni?’—Musome Miruku 3:5, 6; Yakobo 1:5.

14. Nihaana opaka exeeni wira nilipihe waamini wahu?

¹⁴ Nihikhala-khale nihiyaka olipiha waamini wahu. Ntoko siisaale yoolya yooloka ennikhaliherya aya okhalana okumi wooloka ni ikuru, wiixutta voohimya sa Yehova onninikhaliherya olipiha waamini wahu. Vaavo naapacenrye ahu omusoma Biibiliya, naahiixutta ikeekhai soopacerya voohimya sa Yehova ni moota onipaka awe itthu. Masi nuuvira okathi, nihaana wiixutta itthu sowiixerya sa Nuulumo na Muluku. Eyo ti etthu yaamwiirinhe murummwa Paulo ohimya so: “Yolya yolipa ti y’atthu atokwene”. Nto vaavo ninvarihela ahu muteko itthu nniixutta ahu, ninnikhalana ankhili.  Biibiliya onihimya wira ankhili aakhalana efaita yinceene.—Miruku 4:5-7; 1 Pedru 2:2.

15. Xeeni vari aya vootthuneya omphenta Yehova ni annihu ni murima wotheene?

¹⁵ Mutthu pooti okhalana ikuru, masi wira ovikanihe okhalana ikuru, owo onnisuwela wira ohaana ovikaniha okhapelela erutthu awe. Mwa enamuna emosaru, mutthu oolipa momunepani onnisuwela wira ohaana wiimananiha wira ovikanihe olipiha waataana wawe ni Yehova. Murummwa Paulo ohimmye so: “Mukoheke murim’anyu: mòneke mwari ni wamini. Mwilamuleke mmansinyu”. (2 aKorinto 13:5) Tthiri ti vootthuneya okhalana waamini woolipa. Masi yookhala etthu ekina nikhanle ahu oopaka, etthu ene tiila: Omphenta wahu Yehova ni annihu ohaana ovikaniha wunnuwa. Paulo ohimmye so: “Hatá. . . . kasuwela .  . . hatá karina wamini womalela, weiwo omphiyerya olovola miyako: kahiphentekeru, nkihiyó etthu”.—1 aKorinto 13:1-3.

16. Satana oniphavela wira nuupuweleke exeeni?

¹⁶ Satana oniphavela wira nuupuweleke wira khaninwerya omusiveliha Yehova. Owo oniphavela onikhulumula ni oniiriha wuupuwelaka wira mixankiho sahu khasinimala. Nave oniphavela wira nihaaroromeleke annihu ni nihihakalaleke. (aÉfeso 2:2) Ohiya-vo, Satana onnisuwela wira muupuwelo woohiloka pooti ohonona waataana wahu ni Muluku. Masi, muhiliyale wira Yehova oonivaha etthu ennikhaliherya owanana muupuwelo woohiloka, etthu ene tiila: Nlipelelo nahu na muhoolo.

17. Xeeni nlipelelo nahu nri aya na faita yinceene?

¹⁷ 1 aTesalonika 5:5, Biibiliya onihimya wira nlipelelo nahu nri ntoko ekapaseeti yaakhapelela muru wa nakhotto  okathi weekhotto. Biibiliya onnihimya ekapaseeti eyo okhala “ororomela wopowa”. Ororomela sooleiherya sa Yehova onnikhapelela muupuwelo ahu ni onninikhaliherya owanana miyuupuwelo soohiloka.

18, 19. Nlipelelo naamukhalihenrye sai Yesu?

¹⁸ Muupuweleke wira nlipelelo naaninvaha ikuru Yesu. Ohiyu aarowa awe wiiviwa, Yesu aahikhalana mixankiho sinceene. Owo aahivarihiwa ni mpatthani awe. Apatthani awe akina yaahimmye wira khiyaamusuwela. Akina yaahimutthyawa khumuhiya mekhawe. Atthu a elapo awe yaahimurukunuwela ni yaaphavela wira iiviwe vamwirini va nihaaxeryo. Exeeni yaamukhalihenrye ovilela itthu iyo sotheene? Biibiliya onaakhula so: “Owo atthunne, amutteliwa murima, ntoko saphwanelawe: nto ahivilela wiviwa” vamwirini va nihaaxeryo “ahithokoreryaka wuliwa muru iwo: tivó vakilanthyawe mono wolopwana w’ehije ya Muluku”.—aHéberi 12:2.

 ¹⁹ Yesu aanisuwela wira aahihiye ororomeleya aamunvuwiha Tiithi awe ni aamooniherya wira Satana nawoothe. Osuwela eyo yaanimuhakalaliha vanceene Yesu. Nave aanisuwela wira moohipisa aamutthikela okhala ni Tiithi awe wiirimu. Nlipelelo nno naahimukhaliherya Yesu ovilela. Nimutakihaka Yesu, nihaana owehexexa nlipelelo nahu. Opaka eyo, enoonikhaliherya ovilela hata sinikhumelelaka mixankiho sinceene.

20. Exeeni enrowa wookhaliheryani owanana muupuwelo woohiloka?

²⁰ Yehova onnoona waamini ni ovilela wanyu. (Yesaya 30:18; mmusome Malakhiya 3:10.) Owo ooleiherya ‘wovahani sothene simphavelanyu’. (Esalimo 37:4) Nto nwehexexeke nlipelelo nanyu. Satana oniphavela wira muhiye nlipelelo nanyu ni muupuweleke wira itthu Yehova oleihenrye awe khasiniiraneya. Nto nwananeke  muupuwelo anyu woohiloka! Moonaka wira nlipelelo nanyu ninnitteettheya, munvekeleke Yehova wira ookhaliheryeni. Muupuweleke moolumo ari aFilipi 4:6, 7, yaawo ani: “Muhukhuwé mwaha w’etthu p’itthu. Vano, okathi wothene nweliherye mavekelo anyu wa Muluku, munvaraka metto, mmuxukhuruku-tho. Siso murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu”.

21, 22. (a) Yehova onileiherya exeeni muhoolo? (b) Nyuwo mulakenle opaka exeeni?

²¹ Okathi wotheene muupuweleleke itthu sookuxa murima Yehova oleihenrye awe muhoolo. Moohipisa, atthu otheene valaponi anrowa omukokhorelaka Yehova paahi. (Wisupulula 7:9, 14) Elapo esya, okumi onrowa okhala woolokexa ovikana ele munuupuwela anyu! Satana, minepa sootakhala ni atthu ootakhala khanrowa okhala-tho. Nyuwo khamunrowa owereiwaka, nnakhala okhwa. Khula nihiku nyuwo munrowa ovenyaka murina ene ikuru ni muhakalanle ene. Atthu otheene anrowa ovaraka vamosa wira yiirihe elapo okhala eparayiisu. Atthu otheene anookhalana yoolya yooloka ni opuro wookhala. Khuuvo mutthu onrowa okhala ootakhala murima, atthu otheene anrowa oreerelanaka murima. Nuuvira okathi, apinaatamu mulaponi anrowa ophwanya “otaphuwa n’uvuwa w’àna a Muluku”.—aRoma 8:21.

²² Yehova oniphavela wira mukhale Mpatthani awe muulupalexa. Tivonto mpakeke itthu sotheene muniwerya anyu wira mmwiiweleleke Yehova ni okhalana waataana wooloka khula nihiku. Mwiira siiso, otheene ahu khaninrowa ohiya omphenta Muluku mahiku otheene!—Yuda 21.