1. Xeeni Yesu ahaareere awe oxanka mwaha wa awiixutti awe?

OHIYU Yesu aarowa awe wiiviwa, aahixanka vanceene mwaha wa awiixutti awe. Mwaha wa xeeni? Mwaha wa itthu sootepa otthuneya saarowa waakhumelela muhoolo, owo aahaaleela wira: “Nyuwo khamuhiyó-tho atthu a vathí-va”. (Yohani 15:19) Muhoolo mwaya, Yesu aahinvekela Yehova wira aakhapelele awiixutti awe oriki: “Awo khahiyó a vathí-va, sisale miyo kihikhanlyaka a vathí-va”. (Yohani 17:15, 16) Ni moolumo ala, Yesu aaphavela ohimya exeeni?

2. Okathi Yesu aahimmye awe wira “atthu a vathí-va”, aaphavela ohimya exeeni?

² Okathi Yesu aahimmye awe wira “atthu a vathí-va”, owo aahimya atthu yaale ahinimurumeela Muluku ni anilamuleliwa ni Satana. (Yohani 14:30; aÉfeso 2:2; Yakobo 4:4; 1 Yohani 5:19) Ninrowa owerya sai ohiirela mpantta olumwenku ola? Muru ola, ninrowa othokorerya inamuna 5 sinrowa onikhaliherya ohiirela mpantta olumwenku: (1) Nihaana ovikaniha ororomeleya wa Omwene wa Muluku; (2) okhootta munepa wa olumwenku; (3) owara ni wiitthokiha mwa enamuna eninvuwiha Muluku; (4) okhalana moonelo wooloka voohimya sa musurukhu ni (5) owara ikaruma sotheene sa ekhotto ya Muluku.—Nwehe Enoota n.° 16.

3. Niireke Yesu aaniirela mpantta epoliitika? Ninsuwela sai eyo?

³ Okathi Yesu aari awe valaponi, aahoona wira apinaatamu aakhalana mixankiho sinceene ni makhalelo aya yaari oovila. Nto Yesu aanaathokorerya atthu ale ni aaniphavela waakhaliherya. Niireke ophavela wawe waakhaliherya atthu waahimwiiriha Yesu wiirela mpantta epoliitika? Nnaari. Yesu aanisuwela wira atthu ale yaaniphavela Ekuvernu yooloka, eyo piiyo, Omwene wa Muluku. Nto Yesu aarowa okhala Mwene a Omwene owo, okathi aalaleerya awe owo aahilavula vanceene sa Omwene. (Daniyeli 7:13, 14; Luka 4:43; 17:20, 21) Yesu khiirela mpantta olumwenku, ni aanisyaka opaka eyo. Okathi aari awe ohoolo wa Kuvernatoro ooRoma Ponsio Pilato, Yesu aahimmye so: “Omwene aka khuhiyó wa vathí-va”. (Yohani 18:36) Nave awiixutti awe khayiirela mpantta olumwenku. Eliivuru emosa ehimmye wira maKristau a eseekulu yoopacerya “khiyaavara miteko saavarihana ni epoliitika”. Olelo-va, maKristau eekeekhai annaatakiha maKristau ale eeseekulu yoopacerya. Awo anniroromeleya wa Omwene wa Muluku ni khaniirela mpantta olumwenku.—Matheyo 24:14.

4. MaKristau eekeekhai anikhaliherya sai Omwene wa Muluku?

⁴ Murummwa Paulo aahaalepela maKristau oothanliwa wira: ‘Hiyo na anamitthaka a Kristu’. (2 aKorinto 5:20) Tani ori namitthaka? Namitthaka mutthu onivara muteko elapo ekina okhaliheryaka ekuvernu ya elapo awe. Nto anamitthaka awo khaniirela mpantta epoliitika ya elapo anivara aya muteko. Eyo ti etthu eniiraneya ni maKristau oothanliwa, yaawo anrowa olamulelaka wiirimu vamosa ni Kristu. Okhala wira anamitthaka a Omwene wa Muluku, awo khaniirela mpantta olumwenku. (aFilipi 3:20) Tthiri anna oothanliwa annaakhaliherya atthu anceene osuwela Omwene wa Muluku. Hata vari siiso, awo annikhaliheriwa ni “ipwittipwitthi sikina”, seiyo sirina nlipelelo na okhala mahiku otheene mparayiisu valaponi. Nave “ipwittipwitthi sikina”,  khasiniirela mpantta olumwenku ola. (Yohani 10:16; Matheyo 25:31-40) Nto, eyo ennooniherya wira maKristau ekeekhai khaniirela mpantta olumwenku.—Mmusome Yesaya 2:2-4.

5. Xeeni maKristau eekeekhai ahinrowa aya okhottoni?

⁵ MaKristau eekeekhai, annaathokorerya axinnaya oomunepani ntoko amusi aya a werutthuni. Awo toowiiraana moohicikha elapo ayariwe aya, nikhuli naya wala soolema saya. (1 aKorinto 1:10) Vaakhanle wira naanirowa okhottoni, naarowa owanaka ni amusi ahu wala axinnihu. Muupuweleke wira Yesu aahimmye wira nihaana waaphenta axinnihu. (Yohani 13:34, 35; 1 Yohani 3:10-12) Nave Yesu aahimmye wira nihaana waaphenta awanani ahu.—Matheyo 5:44; 26:52.

6. Nnooniherya sai wira ninniiwelela ikuvernu? Masi exeeni nihinliyala ahu?

 ⁶ Ekeekhai wira maKristau eekeekhai khaniirela mpantta olumwenku. Masi hata vari siiso, hiyo ninnittittimiha vanceene ikuvernu. Mwa ntakiheryo, hiyo ninniiwelela ikuvernu vaavo ninliva ahu mpoosito. Masi, khaninliyala ‘onvaha Muluku ekhanle ya Muluku’. (Marko 12:17; aRoma 13:1-7; 1 aKorinto 6:19, 20) Ele “ekhanle ya Muluku” enihela muhina omphenta, omukokhorela ni omwiiwelela ni murima wotheene. Hata vaxankihaka, ninnileva okumi ahu wira nimwiiwelele Muluku.—Luka 4:8; 10:27; musome Miteko 5:29; aRoma 14:8.

7, 8. (a) Munepa wa olumwenku exeeni? (b) Munepa wa olumwenku oniwiiriha atthu opaka exeeni?

⁷ Ohiirela mpantta olumwenku wa Satana onitaphulela oheemererya weettihiwa ni munepa wa olumwenku. Masi munepa wa olumwenku exeeni? Munepa wa olumwenku muupuwelo ni mweettelo wa atthu a olumwenku ola onilamuleliwa ni Satana. Munepa owo onniweettiha atthu ahinimwiiwelela Yehova. Nto maKristau eekeekhai annikhootta moomalela munepa owo. Murummwa Paulo ohimmye so: “Hiyo khinakhenle osuwela w’olumwenku yola, masi novahiwa [ikuru] ni Muluku”.—1 aKorinto 2:12; aÉfeso 2:2, 3. Nwehe Enoota n.° 17.

⁸ Munepa wa olumwenku, onniwiiriha atthu okhala oowiitthuna, oowiixinnuwiha ni oohiiwelela. Nave onniwiiriha wuupuwelaka wira khanireerela omwiiwelela Muluku. Musuweleke wira Satana oniphavela owiiriha atthu opaka ele aniphavela aya ahuupuwenle ele enrowa okhumelela. Owo onnaakupaliha atthu wira etthu yootepa otthuneya mookumini “ophavela okhalana sothene sinònahu, ororomela ni  wisona mwaha wa mihakhu sirinahu”. (1 Yohani 2:16; 1 Timótheyo 6:9, 10) Muhiliyale wira Satana oniphavela waawoka arumeyi oororomeleya a Yehova ni oniphavela wira nuupuweleke ntoko owo onuupuwela awe.—Yohani 8:44; Miteko 13:10; 1 Yohani 3:8.

9. Mwa inamuna xeeni munepa wa olumwenku okhanle awe oonihapuxa?

⁹ Moolikanasa ni epheyo nimmumula ahu, munepa wa olumwenku onniphwanyaneya khula opuro. Akhala wira khannikhootta, munepa owo pooti onihapuxa. (Musome Miruku 4:23.) Mutthu pooti opacerya okhalana munepa owo eemyaka itthu sinkhala ntoko wira khahiyo sootthekeya. Mwa ntakiheryo, pooti opacerya woonaka wira wuupuwela ni okhalana mweettelo ntoko atthu ahinimurumeela Yehova khahiyo vootthekeya. (Miruku 13:20; 1 aKorinto 15:33) Nave mutthu pooti ohapuxiwa ni epornografia, anammwareya wala axooku yaawo khula mutthu oniphavela awe oxintta.—Nwehe Enoota n.° 18.

10. Ninrowa okhootta sai munepa wa olumwenku?

¹⁰ Ninrowa owerya sai okhootta munepa wa olumwenku? Nihaana okhalana waataana wooloka ni Yehova ni weemererya weettihiwa ni malakiheryo awe. Nave nihaana ovekela ikuru sowaarya sa Muluku ni oluttuweliwa ovara miteko sa Yehova. Owo toowerya sotheene molumwenkuni. Ninnikupali ni murima wotheene wira Yehova onoonikhaliherya okhootta munepa wa olumwenku ola wootakhala.—1 Yohani 4:4.

11. Atthu aniirela mpantta olumwenku aniwara sai?

¹¹ Enamuna ekina nnooniherya ahu wira khanniirela mpantta olumwenku, eri enamuna ninwara ahu ni wiitthokiha. Atthu akina anniwara wira ahimmweke, owiiriha atthu akina wuupuwela orupihana woohiloka, wira yooniherye  ohiiwelela waya wala musurukhu arina aya. Akina khanivaha efaita owara saana ni wiitthokiha mwa enamuna yooloka. Awo anipaka ele enaasivela paahi. Nihikhala-khale nikhalanaka muupuwelo owo okathi ninthanla ahu ikuwo sahu.

12, 13. Malakiheryo xeeni a mBiibiliyani annikhaliherya othanla ikuwo ni enamuna ya wiitthokiha?

¹² Okhala wira na arumeyi a Yehova, okathi wotheene nimphavela wira ikuwo sahu sikhaleke sooloka, wiitthokiha saana ni owara moovarihana ni makhalelo, okathi ni mapuro nri ahu. Hiyo ninwara ‘ikuwo simphwanela ni sihinùliha muru’ okhala wira na atthu ‘animuttittimiha Muluku’.—1 Timótheyo 2:9, 10; Yuda 21.

 ¹³ Wiisumaaliha onihela muhina ottittimiha muupuwelo ni moonelo wa atthu akina. Ohiya-vo, moota ninwara ahu ni wiitthokiha pooti owiiriha atthu okhalana moonelo wooloka wala woohiloka voohimya sa Yehova ni arumeyi awe. Nto nimphavela opaka itthu “sothene vonvuwiha Muluku”. (1 aKorinto 10:31) Tivonto ninvaha ahu efaita enamuna ninwara ahu ni wiitthokiha, nuupuwelaka wira soothanla sahu pooti waakhaliherya atthu akina.—1 aKorinto 4:9; 2 aKorinto 6:3, 4; 7:1.

14. Makoho xeeni annikhaliherya othanla ikuwo ninwara ahu naarowaka omithukumanoni ni naalaleeryaka?

¹⁴ Ti vooloka ovarerya saana ikuwo ninwara ahu naarowaka omuthukumanoni ni muteko woolaleerya. Niireke ninwara wira nihimmweke ni atthu akina? Niireke ikuwo sahu sinnaakhumuliha atthu akina? Niireke nnuupuwela wira: ‘Iya ikuwo saka khuuvo mutthu okhanle ookileela akhala wira ti sooloka wala soohiloka?’ (aFilipi 4:5; 1 Pedru 5:6) Ekeekhai wira nimphavela ophwaneliwa, masi musuweleke wira etthu enimwiiriha mutthu okhala ooreera, mikhalelo sooloka sa eKristau orina awe. Eyo ti etthu Yehova oniphavela awe vaavo onniweha awe. Tthiri mikhalelo iyo sinnooniherya “orera wa murima womàla ni wa murettele. Orera weiwo ti wulupale vamaithoni va Muluku”.—1 Pedru 3:3, 4.

15. Xeeni Yehova ohinivanhe awe elista ya malamulo a ikuwo nikhanle ahu oowara ni ohiwara?

¹⁵ Yehova khonivanhe elista ya malamulo a ikuwo nikhanle ahu oowara ni ohiwara. Ohiya-vo, owo oonivaha malakiheryo annikhaliherya opaka soothanla sooloka. (aHéberi 5:14) Yehova oniphavela wira soothanla sahu sooniheryeke wira ninnimphenta Yehova ni atthu akina hata yoothanla eyo eri ene yaamukhaani wala yuulupale. (Mmusome Marko 12:30, 31.) Olumwenku wotheene, Anamoona a Yehova anniwara ni wiitthokiha mwa inamuna soovirikana moovarihana ni  soolema ni soophavela sa mutthu owo. Ovirikana iwo ti wooloka ni onnihakalaliha vanceene.

16. (a) Satana oniphavela owiiriha atthu wuupuwelaka exeeni voohimya sa musurukhu? (b) Nihaana wiikoha exeeni?

¹⁶ Satana oniphavela owiiriha atthu wuupuwelaka wira musurukhu ni itthu sa werutthuni sinniphwanyiha ohakalala wekeekhai. Masi arumeyi oororomeleya a Yehova annisuwela wira eyo khahiyo ekeekhai. Tthiri hiyo ninnikupali moolumo a Yesu ani: “Mwipasope: muhikhalé atthu  òwùnlela muhakhu, okhala wira ekumi ya mutthu thajiri khinlipana ni watta wa mihakhu sirinawe”. (Luka 12:15) Musurukhu khoniphwanyiha ohakalala wekeekhai. Muhakhu khonimphwanyiha mutthu apatthani eekeekhai, murettele ni ekumi yoohimala. Ekeekhai wira nihaana okhalana itthu sa werutthuni ni okhala atthu oohakalala. Masi Yesu aahimmye wira nihaana okhalana waataana wooloka ni Muluku wira niphwanye ohakalala wekeekhai. Tthiri, etthu yootepa otthuneya mookumini mwahu, ehaana okhala omukokhorela Muluku. (Matheyo 5:3; 6:22) Nto mwiikoheke so: ‘Kiireke moonelo aka voohimya sa musurukhu onoolikana ni atthu a olumwenku ola? Kiireke kimmakela wuupuwela ni olavula voohimya sa musurukhu?’—Luka 6:45; 21:34-36; 2 Yohani 6.

17. Mireerelo xeeni nimphwanya ahu mwaha woosyaka moonelo wa olumwenku voohimya sa musurukhu?

¹⁷ Vaavo ninluttuweliwa ahu omurumeela Yehova ni osyaka moonelo wa olumwenku ola voohimya sa musurukhu, ninniphwanya ohakalala wekeekhai. (Matheyo 11:29, 30) Nave ohakalala ni itthu nrina ahu onniniphwanyiha murettele mmuupuweloni ni vamurimani. (Matheyo 6:31, 32; aRoma 15:13) Eyo enninikhaliherya ohitepa oxanka mwaha wa itthu sa werutthuni. (Mmusome 1 Timótheyo 6:9, 10.) Nave vaavo nnaakhaliherya ahu atthu akina, ninnitepa ohakalala. (Miteko 20:35) Ohiya-vo, ninniviriha okathi nitthekulaka ni atthu nnaaphenta ahu, ni khonniphwanya naawalaphile.—Musuweli 5:12.

18. Exeeni Satana oneererya awe oniiriha?

¹⁸ Satana onniimananiha ohonona waataana wahu ni Yehova. Nto nihaana opaka itthu sotheene ninwerya ahu wira nikhapelele waataana wahu. Wira nipake eyo, nihaana owanana “malaikha òtakhala a musulu”. (aÉfeso 6:12) Tthiri Satana  ni minepa sawe sootakhala khamphavela wira nihakalaleke, nnakhala ophwanya ekumi yoohimala. (1 Pedru 5:8) Ekeekhai wira awanani ahu toowerya, masi nikhaliheriwaka ni Yehova nnoowerya waaxintta!

19. Moovarihana ni aÉfeso 6:14-18, ipantte xeeni sa ‘iyuma sa ekhotto’ muKristau onreerela awe okhalana?

¹⁹ Khalai, anakhotto yaanirumeela nikula nowiisaakihana, ekapaseeti ni ikaruma sikina wira yiikhapelele okhottoni. Mwa enamuna emosaru, nihaana owara ikaruma “s’ekhotto ya Muluku” wira niikhapelele. (aÉfeso 6:13) Eliivuru ya aÉfeso 6:14-18 ninnisoma voohimya sa ikaruma iyo, eyo eni: ‘Tivó, mukhaleke òlikaneene! Mwitthukele muyununi [esintu], eri ekekhai. Nware yowara y’ayuma *, eri exariya. Nware ixapattho, okhanle wakuvela olaleya ehapari yorera ya murettele. Okathi wothene nvarelele nikula no wisakihana, ori wamini: siso munowerya ottipiha matthere a moro anvonyiwa ni mutakhali. Nware-tho ekapaseti y’ayuma, ori ororomela wopowa; mukuxeke nivaka n’eroho, [ikuru sowaarya sa Muluku] ari masu a Muluku. Mwireke mulompaka vanjene n’uvara metto, mulompeke okathi wothene, mwettihiwaka n’iroho’.

20. Nihaana opaka exeeni wira ikaruma sahu “s’ekhotto” sinikhapelele?

²⁰ Akhala wira nakhotto aamuliyala ekaruma emosa ya ekhotto, mpantta mukina wa erutthu awe khiwaakhapeleleya. Nto awanani awe yammuhoma opuro ene yoowo. Wira ikaruma sahu “s’ekhotto” sinikhapelele, nihaana ohiliyala owara nnakhala ekaruma emosa. Okathi wotheene nihaana owara ikaruma sotheene ni okhapelela saana. Ekhotto ninwana ahu ni Satana ni malaikha awe  enrowa omala okathi anrowa aya opwetexiwa vamosa ni olumwenku ola wootakhala. (Wisupulula 12:17; 20:1-3) Nto akhala wira ninwanana soophavela soohiloka ni sootteettheya, nihikhala-khale nooceyaka!—1 aKorinto 9:27.

21. Ninrowa owerya sai omuxintta Diabo?

²¹ Mekhihu khaninrowa owerya owanana Diabo. Masi nikhaliheriwaka ni Yehova nnoowerya omuxintta! Wira nivikanihe ororomeleya, nihaana onvekela Yehova, omusoma Biibiliya ni othukumana ni anna ni arokora. (aHéberi 10:24, 25) Opaka itthu iyo sotheene sinoonikhaliherya ovikaniha ororomeleya wa Muluku ni waakiherya waamini wahu.

22, 23. (a) Ninrowa okhala sai oolikana ene wira naakiherye waamini wahu? (b) Mwaha onittharelana ninrowa oweha exeeni?

²² Okathi mukina, Anamoona a Yehova annikhalana moonelo woovirikana ni atthu a olumwenku ola. Nto nihaana okhala oolikana ene wira naakiherye waamini wahu okathi wotheene. (Yohani 15:19) Nto mwiikoheke so: ‘Kiireke kinnisuwela nthowa naya Anamoona a Yehova arina aya moonelo ola? Kinnikupali wira ele Biibiliya ni murumeyi oororomeleya ni ankhili anihimya aya ekeekhai? Kiireke onnikisivela okhala Namoona a Yehova? (Esalimo 34:3; Matheyo 10:32, 33) Kinniwerya watthokiherya sookupali saka atthu akina?’—Matheyo 24:45; Yohani 17:17; mmusome 1 Pedru 3:15.

²³ Ikwaha sinceene, ninnisuwela etthu yoopaka wiira nihiirele mpantta olumwenku ola wa Satana. Masi okathi mukina khannisuwela. Satana onnirumeela miraakho soovirikana wira onihapuxe. Matthekulelo, muraakho mukina Satana onirumeela awe. Ninrowa othanla sai matthekulelo ooloka mwa miruku? Mwaha onittharelana ninrowa oweha etthu nikhanle ahu oopaka.