1-3. (a) Xeeni maama oophenta oniimananiha awe omurattela mwanawe? (b) Xeeni Yehova oniphavela awe wira atthu awe akhaleke ooratta?

NKAHAYA mmuupuwele maama oophenta oninwariha ni omurattela mwanawe wira orowe oxikola. Owo onnimurapiha ni onwariha ikuwo sooloka ni sookatthiwa saana. Nave eyo ennooniherya wira onnimukhapelela saana ni oniphavela wira mwanawe okhalane okumi wooloka.

² Tiithi ihu a wiirimu Yehova, oniphavela wira nikhaleke atthu ooratta. (Onamukuttho 11:45) Owo onnisuwela wira oratta onniniphwanyiha mireerelo sinceene. Nave vaavo  ninratta ahu ninninvuwiha Yehova.—Ezekiyeli 36:22; mmusome 1 Pedru 2:12.

³ Oratta onihela muhina exeeni? Xeeni vari aya vooloka okhala atthu ooratta? Waakhuliwa wa makoho ala, onoonikhaliherya opaka marukunuxo mookumini mwahu wira nikhale atthu ooratta.

4, 5. (a) Etthu xeeni yuulupale enniiriha okhala atthu ooratta? (b) Itthu Muluku opattunxe awe sinnikhaliherya sai osuwela muupuwelo wa Yehova voohimya sa oratta?

⁴ Etthu yuulupale enniiriha okhala atthu ooratta, okhala wira Yehova tooratta ni oowaarya. (Onamukuttho 11:44, 45) Tthiri Yehova ntakiheryo nooloka ninreerela ahu ‘otthara’.—aÉfeso 5:1.

⁵ Itthu Muluku opattunxe awe sinninikhaliherya osuwela muupuwelo wa Yehova voohimya sa oratta. Yehova oopaka elapo wira epheyo ni maasi akhaleke ooloka. (Yeremiya 10:12) Nkahaya muupuwele moota elapo eniirattela aya nuumala apinaatamu ohonona. Mwa ntakiheryo, Yehova ohaapattuxa axikokho ari ootepa oyeva aniwehiwa arumeeliwaka maakina aniihaniwa microscópio. Axikokho akina annitatuxa itthu soohiloka khukhala itthu sihinihonona okumi wa apinaatamu wala inama. Tthiri eyo, etthu yoovara murima. Musuweleke wira masientista annaarumeela axikokho wira alokiherye mapuro ahononiwe ni apinaatamu.—aRoma 1:20.

6, 7. Malamulo a Yehova anooniherya sai wira ale animukokhorela ahaana oratta?

⁶ Etthu ekina ennikhaliherya woona wira oratta ti wootthuneya, Nlamulo Yehova aavanhe awe aIsarayeli omurumeelaka Moise. Mwa ntakiheryo, atthu ale yaahaana okhala ooratta wira Yehova eemererye okokhorela waya. Tthiri,  Nihiku na Ottipihiwa Itampi (nenlo niiraneya ekwaha emosa vamwaakhani) mukhulupale a anamukuttho aahaana orapa ikwaha piili. (Onamukuttho 16:4, 23, 24) Nave ahinatthi anamukuttho akina ovaha mikuttho, awo yaahaana onyawa ni orapiha metto saya. (Okhuma 30:17-21; 2 Wahala 4:6) Okathi mukina, ale yahiiwelela malamulo voohimya sa oratta yaaniiviwa.—Onamukuttho 15:31; Mothakoni 19:17-20.

⁷ Malamulo Yehova aavanhe awe aIsarayeli anniniixuttiha itthu sinceene. (Malakhiya 3:6) Malamulo awo anooniherya wira ale animukokhorela Yehova ahaana okhala atthu ooratta. Ankhi hiyo olelo-va? Musuweleke wira malamulo a Yehova khaturukeyale, owo oniphavela wira atthu awe akhaleke ooratta.—Yakobo 1:27.

8. Moovarihana ni moonelo wa Yehova, oratta onihela muhina exeeni?

⁸ Moonelo wa Yehova voohimya sa oratta onnivikana, orattela erutthu ahu, ikuwo sahu wala ipa sahu. Maana oratta onihela muhina okumi ahu wotheene, ntoko okokhorela wahu, mweettelo ahu ni muupuwelo ahu. Tthiri Yehova oniphavela wira nikhaleke ooratta mmikhalelo sotheene. Vano nrowe niwehe mikhalelo iyo.

9, 10. Nihaana opaka exeeni wira okokhorela wahu okhale wooloka?

⁹ Okokhorela wooloka. Nihaana osyaka itthu sotheene sinivarihana ni etiini yoowootha. Okathi aIsarayeli yaari aya weepotthani oBabilonia, awo yaari eriyari ya atthu yaakokhorela amuluku eethiru ni okokhorela waya atthu ale waahela muhina orupihana woohiloka. Profeta Yesaya aahihimya wira aIsarayeli ale yaamutthikela elapo aya oYerusalemu wira yamukokhoreleke Yehova mootaphuwa. Yehova aahaaleela  wira: “Nvenyé, murowé, mukhumeke vo: muhivaré itthu sa mwikho”. Tthiri yaahaana omukokhorela Yehova paahi, ohiya otakaaherya ni sowiixuttiha ni soolema sa itiini soohiloka sa oBabilonia.—Yesaya 52:11.

¹⁰ Olelo-va, maKristau eekeekhai khaniirela mpantta etiini yoowootha. (Mmusome 1 aKorinto 10:21.) Olumwenku wotheene, sookhala soolema ni sookupali sinivarihana ni sowiixuttiha sa etiini yoowootha. Mwa ntakiheryo, ilapo sikina, atthu annikupali wira nuumala mutthu okhwa yookhala etthu (erooho) enikhuma enavikaniha okhala. Nto soolema sinceene sinivarihana ni yowiixuttiha yoowi nuumala okhwa ninnivikaniha okhala akumi. (Musuweli 9:5, 6, 10) Nto maKristau eekeekhai ahaana osyaka moomalela soolema iyo. Musuweleke wira amusi anyu pooti wookhanyereryani wiirela mpantta soolema iyo. Tthiri hiyo nnoovikaniha okhala atthu ooratta mwaha woowi nimphavela omwiiwelela Yehova.—Miteko 5:29.

11. Ninrowa wooniherya sai wira nookhalana mweettelo wooloka?

¹¹ Mweettelo wooloka. Wira Yehova onithokorerye okhala atthu ooratta, nihaana osyaka orupihana woohiloka. (Mmusome aÉfeso 5:5.) Yehova onnintumererya wira nihaana ‘otthyawa itthu s’ekhapa’. Tthiri ale anrupihana moohiloka ahinattharuwa khanrowa “okela Momweneni mwa Muluku”.—1 aKorinto 6:9, 10, 18; nwehe Enoota n.° 22.

12, 13. Xeeni vanireerela aya miyuupuwelo sahu okhala sooloka?

¹² Muupuwelo wooloka. Miyuupuwelo sinnimwiiriha mutthu opaka etthu. (Matheyo 5:28; 15:18, 19) Okhalana miyuupuwelo sooloka onoonikhaliherya opaka itthu sooloka. Ekeekhai wira naatthu oohimalela, nto okathi mukina pooti okhalana miyuupuwelelo soohiloka. Nto vaavo eyo enikhumelela aya, nihaana osyaka ni wiimananiha wuupuwela etthu ekina yooloka. Akhala wira khaninrowa opaka  eyo, muupuwelo ni murima ahu khonrowa okhala wooloka. Nuuvira okathi nnoopaka itthu soohiloka seiyo nnuupuwela ahu. Tthiri okhala wira ti siiso, nihaana osariha muupuwelo ahu ni miyuupuwelelo sooloka. (Mmusome aFilipi 4:8.) Eyo enihela muhina osyaka otthekula ni itthu sinivarihana ni orupihana woohiloka ni itthu sootakhala. Nave ninnivaha ephoole itthu ninsoma ahu, oweha ni ninvaanela ahu.—Esalimo 19:9, 10.

¹³ Wira nivikanihe omphenta Muluku nihaana ovikaniha okhala atthu ooratta enamuna nimmukokhorela ahu Muluku, mweettelo ahu ni muupuwelo ahu. Nave Yehova onnivaha efaita vaavo ninrattela ahu erutthu ahu, ikuwo sahu ni empa ahu.

14. Xeeni vari aya vootthuneya wiirattela ni orattela mapuro ninkhala ahu?

¹⁴ Vaavo ninrattela ahu erutthu ahu ni mapuro ninkhala ahu, ninnikhalana okumi wooloka hiyo ni ale naattamanne ahu. Hiyo nnookhalaka saana, ni atthu akina anoosiveliwaka okhala ni hiyo. Masi yookhala etthu ekina yootepa otthuneya enniiriha orattela erutthu ahu ni mapuro ninkhala ahu. Etthu ene tiila: Ninninvuwiha Yehova. Nkahaya muupuwele ela: Vaavo nninweha ahu mwaana onanaranse ene, nnuupuwela exeeni voohimya sa anamuyari awe? Nnuupuwela wira awo toonyala. Mwa enamuna emosaru, akhala wira khanniirattela, atthu akina pooti omulavula voohiloka Yehova. Murummwa Paulo aahimmye so: “Nkimphavela omukwattuliha mutthu mwaha w’etthu p’itthu, wira muteko aka ohinyemuliwe [ohiveehiwe]. Vovirikana, miyo kinnòniherya mwa sothene wira ki namuteko a Muluku”.—2 aKorinto 6:3, 4.

15, 16. Ninrowa ovikaniha sai orattela erutthu ahu ni ikuwo sahu?

 ¹⁵ Erutthu ahu ni ikuwo sahu. Khula nihiku nihaana wiirattela. Mwa ntakiheryo, vaaweryaneyaka nihaana orapa mahiku otheene. Nihaana onyawa nirumeelaka esaphau wala ettuurwa nihinatthi olya wala waapeya. Nave nihaana opaka eyo nuumala orumeela exovoro wala nuumala omukusiha mwaana. Onyawa pooti okhalaka ntoko wira etthu yoohiloka, masi onniiriha osyaka ophwanya iretta. Ohiya-vo, onyawa pooti woopola ikumi sinceene. Ankhi akhala wira empa ahu kherina exovoro? Akhala wira ti siiso, nihaana opaka ele yaapaka aya aIsarayeli okathi yaari aya moothakoni. Awo khiyaarina ixovoro, nto okathi yaaphavela aya onya awo yaanirowa ottaiwene opuro yaakhanle aya oothipela mavi ni ophwanya maasi oonyawa.—Otumererya 23:12, 13.

 ¹⁶ Wira nikhale atthu ooratta, khivantthuneya othuma ikuwo sooreerexa, sa musurukhu munceene wala sikumiheriwe niinaano. Masi sihaana okhala sooloka ni sookatthiwa saana. (Mmusome 1 Timótheyo 2:9, 10.) Nimphavela wira okathi wotheene ninvuwiheke Yehova.—Tito 2:10.

17. Xeeni ninrattela ahu empa ahu ni itthu sikina?

¹⁷ Empa ahu ni itthu sikina. Moohicikha opuro ninkhala ahu, empa ahu ehaana okhala yooratteleya. Nave nimphavela wira ikaaro, amoota ni abisikleta ahu akhaleke ooratteleya, otepexa wene okathi ninrowa ahu omithukumanoni ni muteko woolaleerya. Tthiri vaavo ninlaleerya ahu, ninnaaleela atthu voohimya sa Eparayiisu, opuro wooloka yoowo onrowa okhala valaponi. (Luka 23:43; Wisupulula 11:18) Vaavo ninrattela ahu empa ahu ni itthu sikina nrina ahu, ninnooniherya wira nihiilokiherya wira nakhaleke elapo esya.

18. Xeeni ninrattela ahu nipuro nimmukokhorela ahu Yehova?

¹⁸ Opuro nimmukokhorela ahu Yehova. Ninnooniherya wira ninnivaha efaita oratta, vaavo ninrattela ahu mapuro nimpaka ahu mithukumano sa khula esumana, asembeleya ni akongresu. Moohaanyiherya okathi atthu akina anrowa aya ekwaha yoopacerya Empa ya Omwene, awo annoona wira nipuro nooloka. Eyo enninvuwiha vanceene Yehova. Nto anna otheene mmulokoni aakhalana eparakha yookhaliherya orattela ni olokiherya Empa ya Omwene.—2 Wahala 34:10.

19. Soolema xeeni ninreerela ahu osyaka?

¹⁹ Nnaamwi Biibiliya ohinivanhe elista ya soolema soohiloka ninreerela ahu osyaka, owo oonivaha malakiheryo annikhaliherya osuwela moota Yehova onoonela awe soolema iyo soohiloka. Mwa ntakiheryo, Yehova khomphavela wira nimpaheke soona nnakhala ohapaliwa. Akhala wira  ninniphavela okhala apatthani a Muluku, nihaana osyaka soolema iyo soohiloka. Mwaha wa xeeni? Mwaha woowi ninnivaha efaita okumi. Soolema iyo soohiloka sinnivukula okumi ahu, oniphwanyiha iretta ni sinnaahasula atthu akina nneettana ahu. Atthu akina aahiya soolema iyo wira yoopole ekumi aya. Masi, hiyo nri apatthani a Yehova yookhala etthu yuulupale enniiriha osyaka soolema iyo, etthu ene tiila: Hiyo ninnimphenta vanceene Muluku. Mwali mmosa ohimmye so: “Kikhaliheriwaka ni Yehova kookhalana okumi wooloka ni koohiya soolema soohiloka . . . . Kinoona wira mekhaka nkaarowa owerya ohiya soolema iyo”. Vano nrowe nithokorerye malakiheryo a mBiibiliyani anrowa onikhaliherya ohiya soolema soohiloka.

20, 21. Yehova oniphavela wira nisyakeke exeeni?

²⁰ “Axinn’aka òphentiwa! Okhala wira ninroromela wakhela sorera iya, nrapihe sonanara sothene s’erutthu ni s’eroho: niphaveleke omaleliha exariy’ahu nimuttittimihaka Muluku”. (2 aKorinto 7:1) Yehova oniphavela wira nisyakeke soolema soohiloka seiyo sinihonona erutthu ahu ni muupuwelo ahu.

²¹ Akhala wira nnoohiya soolema iyo, Yehova onnileiherya wira: “Miyo kinokhala atith’inyu, nyuwo munrowa okhala an’aka”. (2 aKorinto 6:17, 18) Eyo enimwiiraneya akhala wira ‘khaninvara itthu sa mwikho’ seiyo sinihela muhina soolema soohiloka Yehova onnyokha awe. Tthiri niira siiso, Yehova onooniphentaka ntoko tiithi onaaphenta awe anaawe. Moohaanyiherya eyo enniniiriha osyaka khula etthu yoohiloka Yehova onoona awe okhala ya mwiikho.

22-25. Mutthokiherye moota malakiheryo a mBiibiliyani anittharelana annikhaliherya aya ohiya soolema soohiloka: (a) Matheyo 22:37; (b) Miteko 17:24, 25; (c) Matheyo 22:39; (d) Tito 3:1.

²² “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu  wothene”. (Matheyo 22:37) Nna nlamulo nootepa otthuneya ovikana malamulo otheene. (Matheyo 22:38) Omphenta wahu Yehova ohaana okhala woomalela. Khanikhanle oohimya wira ninnimphenta Yehova nivaraka itthu soohiloka sinihonona ottoopare wala oramattha ahu. Nto nihaana opaka itthu sotheene ninwerya ahu wira nikhapelele okumi ahu. Vaavo nimpaka ahu eyo ninnooniherya wira ninnimphenta Yehova.

²³ “[Yehova] ti yowo onavaha atthu othene ekumi n’umumula n’itthu sothene”. (Miteko 17:24, 25) Okathi mpatthani anyu onoovahaaweni etthu ya faita, niireke munoopwexakasa wala orihela otakhwani? Akhala wira mwa mutthu mukumi khamunrowa opaka eyo. Mwa enamuna emosaru, okumi yoovaha ya faita enikhuma wa Yehova. Nto ninnivaha efaita yoovaha eyo ni ninnikhala mwa enamuna eninvuwiha Yehova.—Esalimo 36:10.

²⁴ “Mumphenteke mukhw’inyu ntoko sinìphentanyu”. (Matheyo 22:39) Soolema soohiloka khahiyo sinnikumiherya mixankiho hiyo paahi, iyo sinnaakumiherya mixankiho atthu akina otepexa wene ale nnaaphenta ahu. Mwa ntakiheryo, akhala wira ninkhala etthoko emosa ni mutthu onimpaha soona, pooti ophwanya iretta mwaha wa mwiixi. Nto vaavo ninhiya ahu itthu iyo soohiloka, ninnooniherya wira ninnaaphenta atthu akina.—1 Yohani 4:20, 21.

²⁵ “Nwupuxeryeke aKristu wira ahana òwìwelela alupale anettiha elapo ni makhulupale makina”. (Tito 3:1) Ilapo sinceene, iguvernu soopaka malamulo anikhoottiha olya mirette soohapala. Nto akhala wira mutthu onniphwanyiwa olyaaka mirette iyo, owo onnitthukweliwa mukhatteya. Hiyo ninnimwiiwelela Yehova, vaavo nnaattittimiha ahu makhulupale a mulaponi ni malamulo ampaka aya.—aRoma 13:1.

26. (a) Nihaana opaka exeeni wira nikhale apatthani a Muluku? (b) Xeeni vanireerela aya wiimananiha okhala atthu ooratta?

 ²⁶ Akhala wira nimphavela okhala apatthani a Yehova, okathi mukina pooti woonaka wira nihaana opaka marukunuxo mookumini mwahu. Akhala wira ti siiso nihaana opaka eyo moowaakuveya. Ekeekhai wira pooti ovila ohiya soolema soohiloka, masi vanniweryaneya! Yehova ooleiherya wira onoonikhaliherya. Owo onihimya so: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erina anyu otthara”. (Yesaya 48:17) Tthiri vaavo nniimananiha ahu okhala atthu ooratta ninninvuwiha vanceene Yehova.