1-3. (a) Atthu anceene anoonela sai muteko aya? (b) Makoho xeeni ninrowa ahu othokorerya muru ola?

OLUMWENKU wotheene, atthu anniimananiha ovara muteko wira alyiheke etthoko aya. Atthu akina khonaasivela muteko anivara aya, akina khonaasivela ovara muteko mahiku otheene. Niireke eyo enniwiiraneelani? Exeeni mukhanle anyu opaka wira musiveliweke muteko anyu?

² Yehova onihimya so: “Olya n’uwurya n’upuha sorera sothene simphwanyahu ni muteko ahu, sothene ti sovaha sa Muluku”. (Musuweli 3:13) Yehova onipattunxe ni yoophavela ya ovara muteko. Owo oniphavela wira nisiveliweke ni muteko ahu.—Mmusome Musuweli 2:24; 5:18.

³ Exeeni enrowa onikhaliherya osiveliwa ni muteko ahu? Miteko xeeni maKristau anireerela aya osyaka? Ninrowa opweha sai nipuro nooloka muteko ahu wira ohihonone omukokhorela wahu Yehova? Muteko xeeni wootepa otthuneya ninreerela ahu ovara?

4, 5. Yehova onoonela sai ovara muteko?

⁴ Yehova omusivela ovara muteko. Maphattuwelo 1:1 onihimya so: “Wopajeryani, Muluku opattunxe erimu ni’lapo ya vathí”. Nuumala opaka elapo ni itthu sotheene sikhanle, Muluku “ahòna wira sothene sari sorera sana”. (Maphattuwelo 1:31) Yehova aahihakalala vanceene mwaha wa itthu sotheene aapanke awe.—1 Timótheyo 1:11.

 ⁵ Yehova khonahiye ovara muteko. Yesu aahimmye so: “Atithi aka annivara muteko mahiku othene”. (Yohani 5:17) Ekeekhai wira khaninsuwela itthu sotheene Yehova onipaka awe, masi itthu sikina ninnisuwela. Owo onnaathanla ale anrowa olamulelaka ni Mwanawe, Yesu Kristu wiirimu. (2 aKorinto 5:17) Nave Yehova onnaalakiherya apinaatamu ni onnaakhapelela. Mwa ntakiheryo, muteko woolaleerya onivariwa olumwenku wotheene, atthu imilyau sinceene annimusuwela Yehova. Nto atthu awo aakhalana nlipelelo na okhala mahiku otheene mparayiisu valaponi.—Yohani 6:44; aRoma 6:23.

6, 7. Yesu aari namuteko a enamuna xeeni?

⁶ Omutakihaka Tiithi awe, Yesu omusivela ovara muteko. Ohinatthi orwa valaponi, Yesu aanivara saana miteko aavahiwa awe ni Muluku ni aahimukhaliherya opattuxa erimu ni elapo. (Miruku 8:22-31; aKolosi 1:15-17) Nto okathi aari awe valaponi, Yesu aahivara muteko munceene. Ori ene mmiravo, owo aahiixutta okalapintero, vanikhala ntoko wira Yesu aahiteka ipa ni mireerelo sikina sa mpaani sinipakiwa ni ithaapwa. Yesu aanivara saana muteko awe mpakha osuweliwa okhala “kalapintero”.—Marko 6:3.

⁷ Masi okathi aari awe valaponi, muteko wootepa otthuneya wa Yesu waari olaleya ni owiixuttiha atthu ihapari sooreera voohimya sa Yehova. Muteko woolaleerya wa Yesu waari wa iyaakha tthaaru nnimeya. Okathi owo wotheene Yesu aahiimananiha ovenya voosiisu mpakha ohiyu olaleeryaka. (Luka 21:37, 38; Yohani 3:2) Owo aaheetta ikiloomo sinceene iphiro soohiloka wira aalaleerye atthu.—Luka 8:1.

8, 9. Exeeni yaamwiiriha Yesu osiveliwa muteko?

 ⁸ Yesu aanoona ovara muteko wa Muluku ntoko yoolya awe, nto muteko owo waaninvaha ikuru. Yaahikhala mahiku Yesu aaluttuweliwa awe mpakha ohikhalana okathi woolya. (Yohani 4:31-38) Owo aanirumeela khula okathi wira aakhaliherye atthu omusuwela Tiithi awe. Tivonto Yesu aamulenle awe Yehova wira: “Miyo kihovuwihani vathí-va: komaliha muteko wakirummyanyu ovara”.—Yohani 17:4.

⁹ Moohaanyiherya, Yehova ni Yesu annivara muteko munceene ni annihakalala ni muteko aya. Hiyo nimphavela ‘otthara mwettelo wa Muluku’ ni omutthara Yesu “munvirawe”. (aÉfeso 5:1; 1 Pedru 2:21) Eyo ti etthu enniiriha ovara saana khula muteko ninvahiwa ahu.

10, 11. Exeeni enrowa onikhaliherya okhalana moonelo wooloka voohimya sa muteko?

¹⁰ Hiyo Anamoona a Yehova ninniimananiha ovara muteko wira niikhaliheryeke ni olyiha etthoko ahu. Nimphavela ohakalala ni muteko ahu, masi osiveliwa muteko ahu pooti okhala muxankiho muulupale. Etthu xeeni mukhanle anyu oopaka, akhala wira khamunsiveliwa ni muteko anyu?

¹¹ Mukhalaneke moonelo wooloka. Pooti wira khaninwerya oturuka okathi ni muteko ninvara ahu, masi hiyo pooti oturuka moonelo ahu. Osuwela ele Yehova oniphavela awe wira nipakeke, pooti onikhaliherya vanceene. Mwa ntakiheryo, Yehova oniphavela wira alopwana oothela akhapeleleke etthoko aya avahaka yoolya ni mireerelo. Nave Biibiliya onihimya wira ole ohinikhapelela  etthoko awe “t’òtakhala murima onvikana mutthu ohinamini”. (1 Timótheyo 5:8) Akhala wira nyuwo mwa muhooleli a etthoko, tthiri munniimananiha vanceene ovara muteko. Hata muhisiveliwaka muteko munvara anyu, muhiliyale wira olyiha etthoko anyu onnimuhakalaliha Yehova.

12. Xeeni vari aya vooloka okhala namuteko oororomeleya?

¹² Muluttuweliweke ovara muteko ni muroromeleyeke. Akhala wira munoopaka eyo, woonasa wene pooti osiveliwa muteko anyu. (Miruku 12:24; 22:29) Nave patarau anyu onrowa woororomelakani. Muhiliyale wira mapatarau annavaha efaita anamuteko oororomeleya, maana annisuwela wira awo khanrowa wiiya musurukhu, mireerelo, okathi ni itthu sikina. (aÉfeso 4:28) Etthu yootepa otthuneya okhala wira Yehova onnisuwela vaavo nniimananiha ahu ovara muteko ni okhala mutthu oororomeleya. Nave munookhalana murima wooloka mwaha woosuwela wira munnimuhakalaliha Yehova.—aHéberi 13:18; aKolosi 3:22-24.

13. Etthu xeeni ekina ekhanle ookhumelela akhala wira ninniroromeleya omutekoni?

¹³ Musuweleke wira ele munipaka anyu omutekoni pooti onvuwiha Yehova. Eyo etthu ekina enrowa wookhaliheryani osiveliwa muteko anyu. (Tito 2:9, 10) Ntakiheryo nahu pooti omwiiriha namuteko mukhwiihu omusoma Biibiliya.—Musome Miruku 27:11; 1 Pedru 2:12.

14-16. Etthu xeeni ninreerela ahu okhalana ephoole vaavo ninthanla ahu muteko?

¹⁴ Biibiliya khonivaha elista ya miteko muKristau onreerela awe ovara wala ohivara. Masi onninivaha malakiheryo  akhanle oonikhaliherya othanla mwa miruku muteko ahu. (Miruku 2:6) Murumeelaka malakiheryo a mBiibiliyani, mwiikoheke makoho anittharelana.

¹⁵ Kiireke muteko owo onookiiriha ovara itthu sihimmusivela Yehova? Hiyo nihiixutta itthu Yehova oninyokha awe ntoko wiiya ni wootha. (Okhuma 20:4; Miteko 15:29; aÉfeso 4:28; Wisupulula 21:8) Nihaana okhalana ephoole wira niheemererye muteko ohinvarihana ni malamulo a Yehova.—Mmusome 1 Yohani 5:3.

 ¹⁶ Kiireke muteko ola onitumererya wala onikhaliherya itthu Yehova onnyokha awe? Mwa ntakiheryo, muupuwele wira wookhala muteko wooteka ekerexa. Ekeekhai wira khahiyo vootthekeya okhala mulipa ooteka ipa. Masi ninnisuwela moonelo wa Yehova voohimya sa etiini yoowootha. Ekeekhai wiira khimwaarowa wiirela mpantta itthu ntoko olompa ni wiipa mukerexa wala etthu ekina. Masi khamunoona wira oteka ekerexa, waarowa okhala okhaliherya itthu Yehova onnyokha awe?—Wisupulula 18:4.

17. Exeeni enrowa onikhaliherya opaka soothanla sinimusivela Yehova?

¹⁷ Vaavo ninrumeela ahu malakiheryo a mBiibiliyani ninniixutta ‘walimaleliha ankhili ahu’, eyo piiyo, osuwela etthu yooloka ni yoohiloka. (aHéberi 5:14) Mwiikoheke so: ‘Keemererya muteko ola, kiireke nkinaakwattuliha atthu akina? Kiireke muteko ola onookiiriha othaamela elapo ekina ni ohiya etthoko aka? Etthoko aka enrowa woonela sai kathaama vale?’

18. Xeeni vanixankiha aya omuhela Yehova nipuro noopacerya mookumini mwahu?

¹⁸ Ti vooxankiha vanceene omuhela nipuro noopacerya Yehova mookumini mwahu, mwaha woowi ninkhala “mahiku òxanka”. (2 Timótheyo 3:1) Ophwanya muteko ni ovikaniha ovara muteko owo pooti oxankiha vanceene. Ekeekhai wira nihaana okhapelela etthoko ahu, masi musuweleke wira nihaana omuhela Yehova nipuro noopacerya. Nihikhala-khale neemereryaka itthu sa werutthuni sikhalaka sootepa otthuneya mookumini mwahu. (1 Timótheyo  6:9, 10) Nto ninrowa osuwela sai “othanla itthu sintepa ophwanela” okathi omosaru nikhapelelaka etthoko ahu?—aFilipi 1:10.

19. Omuroromela Yehova onnikhaliherya sai ohitepa oxanka ni muteko?

¹⁹ Mmuroromeleke Yehova ni murima wotheene. (Musome Miruku 3:5, 6.) Ninnisuwela wira Muluku onnisuwela itthu nimphavela ahu ni onnimukhapelela khula mutthu. (Esalimo 37:25; 1 Pedru 5:7) Biibiliya onihimya so: “Murim’anyu ohettihiweké ni milili: muhakalaleke n’itthu sirinanyu, okhala wira Muluku mwanene òhimya wira: ‘Miyo nkinonyanyalani-tho: kinimojalani mahiku othene’”. (aHéberi 13:5) Yehova khoniphavela wira nitepeke oxanka voohimya sa moota woolyiha etthoko ahu. Okhuma khalai onnooniherya wira onnaakhapelela atthu awe. (Matheyo 6:25-32) Moohicikha mukhalelo wa muteko ninvara ahu, nihaana ovikaniha omusoma Biibiliya, olaleya ihapari sooreera ni orowela mithukumano sahu.—Matheyo 24:14; aHéberi 10:24, 25.

20. Ninrowa okhweiherya sai okumi ahu?

²⁰ Mukhalaneke niitho nooluluwanya. (Mmusome Matheyo 6:22, 23.) Eyo enitaphulela wira muhaana okhweiherya okumi anyu ni wiimananiha omurumeela Yehova. Noosuwela wira ti voololo weemererya musurukhu, mihakhu, itthu eletroniko sikumiheriwe niinaano sikhalaka sootepa otthuneya ovikana waataana wahu ni Muluku. Nto, etthu xeeni enrowa onikhaliherya ohela nipuro noopacerya itthu sootepa otthuneya? Mwiimananiheke ohikopha-kopha. Akhala wira nookopha, nihaana wiimananiha oweha moota woovukula musurukhu nikomphe ahu wala oliva ekwaha emosa paahi.  Muhiliyale wira naahiivahe ephoole pooti orumeela ikuru ni okathi ahu niphavelasaka mihakhu paahi ohiya omusoma Biibiliya, ovekela ni olaleerya. Ohiya oxankiha okumi ahu ni itthu sa werutthuni, nihaana wiixutta ohakalala ni itthu nrina ahu ntoko “yolya ni sowara”. (1 Timótheyo 6:8) Nto khula okathi nihaana ovarerya makhalelo ahu wira niwehe akhala wira ninnimurumeela Yehova moomalela.

21. Xeeni vari aya vooloka wuupuwela saana ele eri nipuro noopacerya vamurimani vahu?

²¹ Muheleke itthu sooloka nipuro noopacerya. Nihaana orumeela mwa miruku okathi ahu, ikuru sahu ni itthu  sahu sa werutthuni. Mwaha wa xeeni? Mwaha woowi, naahiivahe ephoole itthu soohitepa otthuneya, ntoko osoma ni musurukhu pooti okhala itthu sootepa otthuneya mookumini mwahu. Yesu aahimmye so: “Mpajeryeke ophavela omwene wa Muluku”. (Matheyo 6:33) Soothanla sahu, itthu nimpaka ahu khula nihiku ni soolukama sahu sinimooniherya ele eri nipuro noopacerya vamurimani vahu.

22, 23. (a) Muteko xeeni wootepa otthuneya nikhanle ahu oovara? (b) Exeeni enrowa onikhaliherya osiveliwa muteko ahu?

²² Muteko wootepa otthuneya nikhanle ahu oovara ori omurumeela Yehova ni olaleya ihapari sooreera. (Matheyo 24:14; 28:19, 20) Nimutakihaka Yesu, nimphavela wiimananiha ovara oratteene muteko owo. Anna ni arokora akina aathaamela mapuro oothowa anamalaleerya. Akina anniixutta nttaava nikina wira yaalaleeryeke atthu anilavula nttaava nno. Nvaaneleke ni anna ni arokora apanke eyo, awo animooleelani moota aphwannye aya ohakalala wekeekhai mwaha woopaka eyo.—Musome Miruku 10:22.

²³ Olelo-va, anamunceene a hiyo ninniviriha okathi munceene nivaraka muteko wala nookhalana miteko sikina wira nikhapelele etthoko ahu. Yehova onniweha wiimananiha wahu wira nikhapelele etthoko ahu. Nrowe otheene ahu nimutakihe Yehova ni Yesu nikhalaka anamuteko ooloka, moohicikha muteko ninvara ahu. Xontte muhiliyale wira muteko wootepa otthuneya nikhanle ahu oovara ori omurumeela Yehova ni olaleya ihapari sooreera sa Omwene. Niira siiso, nnoophwanya ohakalala wekeekhai.