1-3. (a) Miruku 13:20 onniixuttiha exeeni? (b) Xeeni vanireerela aya waathanla mwa miruku apatthani ahu?

MOOTOKO omoona mwaana moota onaawehexexa awe anamuyari awe? Mwaana onnitakiha khula etthu onoona awe ni oniiwa awe, ntoko siisaale nxotte ninnuula aya maasi. Nto vaavo oninnuwa awe, owo onnipacerya waatakiha anamuyari awe hata ohisuwelaka. Etthu emosaru enniiraneya ni hiyo. Akhala wira ninniviriha okathi munceene ni mutthu, ninnipacerya wuupuwela ni opaka itthu ntoko mutthu owo.

² Miruku 13:20 onihimya so: “Onetta n’asuweli onokhala musuweli”. Nuulumo nirumeeliwe yoolepa ela noowi ‘wetta’ nintaphulela oviriha okathi munceene ni mutthu mukina, ohiya omukhomasa paahi. Mulipa-ootokosa myaha sa Biibiliya, ohimmye wira weetta ni mutthu ontaphulela omphenta ni ophavela okhala ni mutthu owo okathi munceene. Akhala wira ninniviriha okathi munceene ni mutthu, ninnipacerya omutakiha otepexa wene akhala wira nihaataana nuuwo.

³ Musuweleke wira apatthani ahu pooti oniiriha opaka itthu sooloka aahiiso soohiloka. Miruku 13:20 onnivikaniha oriki: “Onetta n’alolo onophwanya otakhaliwa”. Nttaava na eHeeberi nuulumo noowi “onetta”, pooti otaphulela waataana ni mutthu aahiiso opatthana. (Miruku 22:24; Makhulupale 14:20) Akhala wira apatthani ahu  annimphenta Muluku, awo anoonikhaliherya ovikaniha ororomeleya. Nto ninrowa waathanla sai mwa miruku apatthani ahu? Nrowe niwehe moota Yehova onaathanla awe apatthani awe ni moota nikhanle ahu oomutakiha.

4. (a) Xeeni eri aya eparakha yuulupale okhala mpatthani a Muluku? (b) Xeeni Yehova aamuhimmye awe Abrahamu okhala ‘mpatthani awe’?

⁴ Yehova tori Mukhulupale a Olumwenku wotheene. Masi hata vari siiso, owo onniphavela wira nikhale apatthani awe. Tthiri eyo eparakha yuulupale. Yehova, onnaathanla saana apatthani awe. Maana, apatthani awe, atthu yaale animphenta ni animwaamini. Nkahaya nwehe ntakiheryo na Abrahamu. Owo, aaniiwelela khula etthu aavekeliwa awe ni Muluku. Okathi wotheene, Abrahamu aahooniherya wira aari oororomeleya ni oowiiwelela. Mwa ntakiheryo, Abrahamu aaheemererya onvaha mwanawe Isakhi ntoko mukuttho. Maana, Abrahamu aanikupali ni murima wotheene wira “Muluku anwerya hatá omuhihimuxa” Isakhi. (aHéberi 11:17-19; Maphattuwelo 22:1, 2, 9-13) Mwaha woororomeleya ni wiiwelela, Yehova aahimuhimya Abrahamu okhala ‘mpatthani awe’.—Yesaya 41:8; Yakobo 2:21-23.

5. Yehova oniwoonela sai apatthani awe oororomeleya?

⁵ Yehova onnaavaha efaita yuulupale apatthani awe. Masi hata vari siiso, oniphavela wira apatthani awe akhaleke oororomeleya. (Mmusome 2 Samuweli 22:26.) Awo anniroromeleya ni omwiiwelela, mwaha woowi annimphenta. Biibiliya onihimya wira Yehova onnipatthana “n’atthu òloka”, yaawo animwiiwelela. (Miruku 3:32) Yehova onnaaphenta vanceene apatthani awe ni onnaalattula okhala aletto “mpani” mwawe. Eyo enitaphulela wira  onnaalattula omukokhorela ni onvekela mahiku otheene.—Esalimo 15:1-5.

6. Nnooniherya sai wira ninnimphenta Yesu?

⁶ Yesu aahimmye so: “Akhalá mutthu onkiphenta, onimwettela molumo aka. Vano Atithi anomphenta”. (Yohani 14:23) Wira nikhale apatthani a Yehova nihaana omphenta Yesu. Ninrowa owerya sai opaka eyo? Neettelaka itthu sotheene Yesu iixuttinhe awe ntoko olaleerya ni waapaka awiixutti. (Matheyo 28:19, 20; Yohani 14:15, 21) Nave ninnooniherya omphenta Yesu ‘nimuttharaka yowo munvirawe’. (1 Pedru 2:21) Eyo entaphulela wira nihaana omutakiha Yesu. Nto Yehova onnihakalala vanceene vaavo onniweha awe niimananihaka omutakiha Mwanawe ni moolumo ni miteko sahu.

7. Xeeni vari aya vooloka apatthani ahu okhala apatthani a Yehova?

⁷ Nihoona wira apatthani a Yehova toororomeleya, oowiiwelela ni annimphenta Yesu. Ankhi apatthani ahu? Niireke ari ntoko apatthani a Yehova? Akhala wira apatthani ahu annimutakiha Yesu ni wiimananiha olaleya Omwene, awo anoonikhaliherya okhala atthu ooloka ni ovikaniha omphenta Yehova.

8. Exeeni enoosivelani sa opatthani wa Ruthi ni Nowemi?

⁸ Biibiliya onnihimya matakiheryo manceene a atthu yaari apatthani ooloka. Ntakiheryo noopacerya ninrowa ahu oweha ti na Ruthi ni maathi awe iihaniwa Nowemi. Athiyana awo, yaari a ilapo soovirikana ni makhalelo oovirikana. Ohiya-vo, Nowemi aari muulupale onvikana Ruthi. Masi hata vaari siiso, awo yaari apatthani aalupale mwaha woowi yaanimphenta Yehova. Okathi Nowemi aakhuma awe oMowabi otthikelaka elapo awe wIsarayeli, “Ruthi  khatthunne omwalana ni Nowemi”. Ruthi aahimuleela Nowemi wira: “Atthu anyu anrowa okhalaka atthu aka: Muluku anyu onrowa okhalaka Muluku aka”. (Ruthi 1:14, 16) Tthiri Ruthi aanimukhapelela oratteene Nowemi. Okathi yaaphiyale aya wIsarayeli, Ruthi aanivara muteko munceene wira omukhaliherye mpatthani awe. Nto Nowemi aanimphenta vanceene Ruthi ni aaninvaha miruku sooloka. Vano Ruthi aaniiwelela ele Nowemi aahimya awe. Mwaha woopaka eyo, otheene aya yaahireelihiwa vanceene.—Ruthi 3:6.

9. Exeeni enoosivelani sa opatthani wa Davidi ni Yonathani?

⁹ Ntakiheryo nikina nooloka na apatthani ti na Yonathani ni Davidi. Awo yaaniroromeleya wa Yehova. Yonathani aarina iyaakha 30 onvikana Davidi. (1 Samuweli 31:2; 2 Samuweli 5:4) Muupuweleke wira Yonathani taarowa okhala mwene, masi Yehova aahimuthanla Davidi okhala mwene. Okathi Yonathani aasuwenle awe eyo, khaamukhalenle nrima Davidi. Yonathani aahipaka sotheene aawerya awe wira omukhaliherye Davidi. Mwa ntakiheryo, okathi Sawuli aaphavela awe omwiiva Davidi, Yonathani aahimukhaliherya omulipihaka “murima ni nsina na Muluku”. Ohiya-vo, Yonathani aahileva okumi awe wira omukhapelele Davidi. (1 Samuweli 23:16, 17) Nave Davidi aari mpatthani oororomeleya. Owo, aahileiherya okhapelela emusi ya Yonathani ni aahipaka eyo hata nuumala Yonathani okhwa.—1 Samuweli 18:1; 20:15-17, 30-34; 2 Samuweli 9:1-7.

10. Exeeni mwiixuntte anyu ni ntakiheryo na amiravo araru aHeeberi?

¹⁰ Nwehe-tho ntakiheryo na amiravo araru aHeeberi, Xadraki, Mexaki ni Abedi-Nego. Awo yaari apatthani okhuma enamwane aya ni yaaroihiwe vamosa weepotthani oBabilonia. Nnaamwi yaakhala ottaiwene wa anamuyari aya, awo  yaanikhaliheryana okhala oororomeleya wa Yehova. Nuumala wunnuwa, waamini waya waaheehereriwa ni Mwene Nabukhodonosori, yoowo aakhanyererya okokhorela elatarato ya eweero aapanke awe. Amiravo ale araru yaahimuleela mwene wira: “Hiyo khanintthuna omurumela muluku anyu, nnákhala okokhorela elatarato ya wero epakinhanyu”. Tthiri okathi yeehereriwe aya, apatthani ale araru yaahivikaniha ororomeleya wa Muluku.—Daniyeli 1:1-17; 3:12, 16-23, 91-95.

11. Ninsuwela sai wira Paulo ni Timootheyo yaari apatthani aalupale?

¹¹ Okathi Paulo aamusuwenle awe mmiravo Timootheyo, Paulo aahoona wira Timootheyo aanimphenta vanceene Yehova ni aanikhapelela muloko. Nto Paulo aahimwiixuttiha Timootheyo wira aakhaliheryeke anna ni arokora ilapo sikina. (Miteko 16:1-8; 17:10-14) Timootheyo aaniimananiha vanceene ovara muteko wa Yehova, tivo Paulo aahimmye awe wira: “Owo ahivara muteko ni miyo, alaleyaka ehapari yorera”. Paulo aanisuwela wira Timootheyo ‘aniwetetela’ aahiiso waathokorerya anna ni arokora. Okathi wotheene Paulo ni Timootheyo yaavara aya vamosa muteko wa Yehova, awo yaahikhala apatthani aalupale.—aFilipi 2:20-22; 1 aKorinto 4:17.

12, 13. (a) Xeeni vanreerela aya okhalana ephoole okathi nnaathanla ahu apatthani mmulokoni? (b) Exeeni yaamwiirinhe Paulo ovaha miruku siri 1 aKorinto 15:33?

¹² Mmulokoni aakhala anna ni arokora a ilapo ni soolema soovirikana. Akina yiixuntte ekeekhai niinaano masi akina akhumme khalai omurumeela Yehova. Nto, awo pooti oniixuttiha itthu sinceene ni onikhaliherya  ovikaniha ororomeleya. (Mmusome aRoma 1:11, 12.) Hata vari siiso, nihaana okhalana ephoole vaavo nnaathanla ahu apatthani mmulokoni. Nthowa xeeni? Nkahaya muupuwele ela: Onnivira okathi wira efruta aahiiso muhokorokho ottokotthe saana. Mwa enamuna emosaru, onnivira okathi wira mutthu okhalane waataana woolipa ni Yehova. Tivonto, nihaana opixeryana murima ni ophentana mukina ni mukhwaawe, okathi omosaru naathanlaka apatthani ahu mwa miruku.—aRoma 14:1; 15:1; aHéberi 5:12–6:3.

 ¹³ Okathi mukina, pooti okhumelela mixankiho suulupale mmulokoni. Akhala wira eyo enimwiiraneya, nihaana okhalana ephoole. Mwa ntakiheryo, pooti wira munna aahiiso murokora onnipaka etthu Biibiliya onihimya awe wira ti yoohiloka, aahiiso pooti wira onimwiixinliha. Nto itthu iyo pooti ohonona muloko. Otheene ahu, noosuwela wira eyo pooti wiiraneya mwaha woowi, okathi mukina saanikhumelela mixankiho mmulokoni mahiku aarummwa. MaKristau makina a okathi ole, yaanaanyiherya itthu Yesu iixuttinhe awe. Tivonto Paulo aaloponle awe oriki: “Muhihiye motothiwaka: ‘Wetta n’alavilavi, opwetexa makhalelo òrera’”. (1 aKorinto 15:12, 33) Nave-tho Paulo aahimulopola Timootheyo wira aahaana waathanla apatthani awe mwa miruku. Olelo-va, nihaana opaka etthu emosaru.—Mmusome 2 Timótheyo 2:20-22.

14. Ntakiheryo xeeni ninnikhaliherya waathanla mwa miruku apatthani ahu?

¹⁴ Etthu yootepa otthuneya nikhanle ahu oopaka, ori okhapelela waataana wahu ni Yehova. Khanimphavela okhala apatthani a atthu akhanle ootteettheiha waamini wahu aahiiso ohonona waataana wahu ni Yehova. Nthowa xeeni? Nthowa noowi, hiyo ninkhala ntoko nxotte. Maana nxotte naheliwa mmaasini, ninninuula maasi awo, akhala wira maasi awo toonanara, okathi ninwama ahu, ankhuma maasi oonanara. Mwa enamuna emosaru, hiyo ninnikhalana mikhalelo sa apatthani ahu. Eyo enooniherya wira akhala wira apatthani ahu anipaka itthu soohiloka, vanoonivila opaka itthu sooloka. Tivonto vari aya vootthuneya waathanla mwa miruku apatthani ahu wira nikhapelele waataana wahu ni Yehova.—1 aKorinto 5:6; 2 aTesalonika 3:6, 7, 14.

15. Munrowa waapaka sai apatthani eekeekhai mmulokoni?

 ¹⁵ Mmulokoni nnimwaaphwanya atthu animphenta Yehova ni murima wotheene. Awo pooti okhala apatthani ahu ooloka. (Esalimo 133:1) Masi apatthani anyu ahikhaleke ale murina anyu iyaakha simosaru paahi. Muupuweleke wira Yonathani aari muulupale onvikana Davidi ni Ruthi aari mwaana namulikanyiha ni Nowemi. Nto nihaana otthara miruku iya sa mBiibiliyani sini: ‘Mutthukule murim’anyu!’ (2 aKorinto 6:13; mmusome 1 Pedru 2:17.) Akhala wira munoomutakiha Yehova, atthu akina animoonaka mikhalelo sanyu sooloka ni anrowa okhala apatthani anyu.

16, 17. Akhala wira ookhala munna oninyoonyihale, etthu xeeni nihinreerela ahu opaka?

¹⁶ Muloko ori ntoko emusi. Khula munna ookhalana omutthu awe, muupuwelo awe ni enamuna yoopaka itthu. Nto anna awo anoowerya oniixuttiha itthu sinceene. Masi nkahaya muupuwele vaakhanle wira otheene ahu nnoolikana, niireke vaamuloka? Tthiri munnikupali wira vaamuxankiha. Masi okhala wira khula mutthu ookhalana enamuna awe yoopaka itthu, okathi mukina pooti okhumelela ohiiwanana. Munna owo pooti oniveeha aahiiso oniirela etthu enrowa oniwereya vanceene. (Miruku 12:18) Niireke nnoohiya orowela mithukumano mwaha wa itthu iyo?

¹⁷ Nnaari. Hata munna onipakelaka etthu enniwereya, khaninrowa ohiya orowela mithukumano. Maana khahiyo Yehova oniveehale aahiiso oniirenle etthu eyo yoohiloka. Ohiya-vo, Yehova oonivaha okumi ni itthu sotheene sooloka. Tthiri Yehova onniphwanela ophentiwa ni ororomeliwa. (Wisupulula 4:11) Musuweleke wira muloko yoovaha ya Yehova ennikhaliherya olipiha waamini wahu. (aHéberi 13:17) Nto nihaana owiiwelela anna athanliwe wira  akhapeleleke muloko. Napaka eyo khaninkhala-khala nihiyaka orowela mithukumano, mwaha woowi ookhala munna wala murokora nihiniiwanana ahu aahiiso oninyoonyihale.—Musome Esalimo 119:165.

18. (a) Exeeni enrowa onikhaliherya okhalana waataana wooloka ni anna? (b) Xeeni vanireerela aya olevelelana?

¹⁸ Akhala wira ninnaaphenta anna ni arokora, nnoophavelaka okhalana waataana wooloka. Yehova khonlipelela wira nikhale oomalela. Nto munoona wira nihaana wuupuwela wira anna ni arokora ahaana okhala oomalela? (Miruku 17:9; 1 Pedru 4:8) Otheene ahu ninnipaka itthu soohiloka, nto ophentana onoonikhaliherya ‘olevelelana imara sothene nintthekelana ahu’. (aKolosi 3:13) Nave, ophenta onoonikhaliherya ohiiriha mixankiho saamukhaani okhala suulupale. Ekeekhai wira, munna aninyoonyiha pooti opisa oliyala. Etthu eyo pooti oniiriha onanariwa okathi munceene. Masi musuweleke wira opaka eyo pooti ohonona omutthu ahu ni oniiriha ohihakalala. Nto nihaana waalevelela anna, maana napaka eyo nnookhalana ekumi yooloka, wiiraana mmulokoni ni nnoolipiha waataana wahu ni Yehova.—Matheyo 6:14, 15; Luka 17:3, 4; aRoma 14:19.

19. Okathi xeeni vanireerela aya ohiya waataana ni mutthu?

¹⁹ Vatthokoni, khula mutthu ohaana opaka mpantta awe wira emusi yotheene ehakalaleke. Masi nkahaya muupuwele, akhala wira mwaana mmosa khoniiwelela. Nto emusi yotheene enneererya omukhaliherya, masi owo khoniphavela wiiwa nikhaliheryo naya. Vano mweettelo awe onnitepa otakhala mpakha omwiiriha okhuma vatthokoni aahiiso mpakha mwaneene etthoko omoomola vatthokoni vawe. Etthu emosaru pooti wiiraneya mmulokoni. Mutthu pooti othanla  opaka itthu sihimmusivela Yehova ni sinhonona muloko wotheene. Anna anniimananiha omukhaliherya, masi owo khomphavela owiriyana nikhaliheryo naya. Woonasa wene owo onnithanla wiikumiha mmulokoni aahiiso pooti okumihiwa mmulokoni. Akhala wira eyo enimwiiraneya, Biibiliya onnihimya moowiiwanyeya wira ‘nihatàneke n’atthu’ awo. (Mmusome 1 aKorinto 5:11-13; 2 Yohani 9-11) Eyo pooti okhala etthu yoovila akhala wira mutthu owo mpatthani ihu aahiiso mmusi ihu. Okathi owo, ororomeleya wahu wa Yehova ohaana okhala wuulupale ovikana ororomeleya wahu ni amusi ihu aahiiso apatthani ihu.—Nwehe Enoota n.° 8.

20, 21. (a) Xeeni okumihiwa mutthu mmulokoni onooniherya aya ophenta wa Yehova? (b) Xeeni vanireerela aya waathanla apatthani ahu mwa miruku?

²⁰ Okumihiwa mmulokoni onooniherya ophenta wa Yehova. Mwaha woowi onnikhapelela muloko wira ohihononiwe ni atthu ahimphavela omwiiwelela Yehova. (1 aKorinto 5:7; aHéberi 12:15, 16) Nave ennikhaliherya omphenta ni omuttittimiha Yehova, ottittimiha nsina nawe, malamulo awe ni malakiheryo awe. (1 Pedru 1:15, 16) Ekeekhai wira okumihiwa mmulokoni etthu yoowereya, masi enooniherya omphenta mutthu owo, hata ohiirelaka-tho mpantta muloko. Mwaha woowi okumihiwa iwo pooti omukhaliherya oturuka mweettelo awe woohiloka. Atthu anceene yaatonko okumihiwa mmulokoni, aahokolowela wa Yehova ni annaakheliwa ni murima wotheene mmulokoni.—aHéberi 12:11.

²¹ Ntoko niwenhe ahu, apatthani ahu pooti oniiriha opaka itthu sooloka aahiiso soohiloka. Tivonto, ti vooloka waathanla apatthani ahu mwa miruku. Akhala wira nnimwaaphenta atthu Yehova onaaphenta awe, nnookhalana apatthani anrowa onikhaliherya ovikaniha ororomeleya wa Yehova mahiku otheene.