1, 2. Niireke okhalana mixankiho mukasamentoni ontaphulela wira ekasamento eyo yoorimeela? Mutthokiherye.

EKASAMENTO yoovaha enikhuma wa Yehova ni pooti omphwanyiha mutthu ohakalala. Hata vari siiso, ekasamento yookhalana mixankiho saya. Okathi mukina, mixankiho sa mukasamentoni pooti okhalaka ntoko wira khasinimala. Eyo pooti owiiriha anamathelana awo ovalaana.

² Nto khanintikhina vaavo okathi mukina sinikhumelela aya mixankiho mukasamentoni. Masi eyo khentaphulela wira ekasamento yoorimeela. Hata anamathelana ale yaarina mixankiho suulupale aaphwanya enamuna yooloka ya ophuka mixankiho saya ni olipiha ekasamento aya. Moota xeeni?

3, 4. Okathi mukina etthu xeeni ekhanle ookhumelela mukasamentoni?

³ Ekasamento enniwuuranyiha atthu anli. Woonasa wene, khula mutthu ookhalana itthu simmusivela ni sihimmusivela, muupuwelo awe ni enamuna yoopaka itthu. Nave mulopwana ni muthiyana athelanne pooti wira ahuuwale mwa inamuna soovirikana. Okhala wira ti siiso, vanitthuneya wiimananiha wira asuwelane mukina ni mukhwaawe.

⁴ Nuuvira okathi, mulopwana ni muthiyana athelanne pooti oluttuweliwa vanceene miteko saya anapacerya  ovalaana vakhaani-vakhaani mukina ni mukhwaawe. Nto anakhala ntoko atthu anli ahinsuwelana anikhala etthoko emosa. Exeeni enrowa waakhaliherya anamathelana okhala oowiiraana?

5. (a) Exeeni ekhanle oowaakhaliherya anamathelana maKristau okhala oowiiraana? (b) Moovarihana ni aHéberi 13:4, nthokoreryeke sai ekasamento?

⁵ Yehova onnivaha miruku sinaakhaliherya anamathelana okhala oowiiraana ni waataana ni Muluku. (Esalimo 25:4; Yesaya 48:17, 18) Yehova onihimya so: “Othelana ottittimihiweke n’atthu othene”. (aHéberi 13:4) Etthu munttittimiha anyu yookhalana efaita yinceene, munnikhapelela ni othokorerya oratteene. Nto Yehova oniphavela wira nithokoreryeke ekasamento ntoko etthu yoottittimiheya.

6. Moovarihana ni Matheyo 19:4-6, Yehova oniphavela exeeni voohimya sa ekasamento?

⁶ Yehova taakumihenrye ekasamento yoopacerya. Olavulaka sa ekasamento, Yesu aahimmye so: “Nyuwo mosoma khuluwi wira: ‘Wopajeryani Muluku, àpattuxaka atthu, àpakalé mulopwana ni muthiyana’, ni wira: ‘Tivó, mulopwana onimwahiya atithi awe n’ame awe, wira aphitane ni mwar’awe: òwanli aya enakhala mutthu mmosá pahi’. Siso awo khahiyó-tho atthu anli: ari mutthu mmosá pahi. Tivó, yeyo Muluku ephitanyalyawe mutthu ahimwalanyihehé-tho”. (Math. 19:4-6) Yoolepa ela ennooniherya wira okhuma woopaceryani Yehova aaphavela wira ekasamento ekhaleke ya mahiku otheene. Nave aaphavela wira anamathelana yiiraaneke ni ahakalaleke vanceene.

7. Exeeni enrowa waakhaliherya anamathelana olipiha ekasamento aya?

⁷ Masi, olelo-va, anamathelana anootepa oxanka ni onyoonyiheya ovikana khalai. Okathi mukina anuupuwela wira mixankiho saya ti suulupale, nto enamuna anoona aya okhweya ori ovalaana aahiiso omwalana. Masi osuwela moonelo wa Yehova voohimya sa ekasamento pooti okhaliherya.—1 Yohani 5:3.

8, 9. (a) Okathi xeeni vanireerela aya otthara malakiheryo a Yehova voohimya sa ekasamento? (b) Ninrowa wooniherya sai wira ninnivaha efaita ekasamento?

⁸ Okathi wotheene, miruku sa Yehova sinniniphwanyiha mireerelo. Ntoko niwenhe ahu, Yehova oniphavela wira “othelana ottittimihiweke”. (aHéberi 13:4; Musuweli 5:4) Akhala wira nnimwiimananiha otthara malakiheryo a Yehova hata vavilaka, nikupaliki wira itthu sinimweetta saana.—1 aTesalonika 1:3; aHéberi 6:10.

 ⁹ Okhala wira ninnivaha efaita ekasamento, khanimphavela opaka etthu wala ohimya etthu yaarowa ohonona ekasamento ahu. Ohiya opaka eyo, nimphavela olipiha oratteene ekasamento ahu. Ninrowa owerya sai opaka eyo?

10, 11. (a) Mixankiho xeeni suulupale ikasamento sikina sirina aya? (b) Exeeni ekhanle ookhumelela akhala wira khaninvaha ephoole enamuna ninlavulana ahu ole nithelanne ahu?

¹⁰ Noosuwela wira muKristau khonreerela ommana mwaarawe aahiiso iyawe. Masi sookhala inamuna soovirikana anamathelana akhanle aya oowereihana murima mukina ni mukhwaawe. Okathi mukina moolumo pooti onvulaliha mutthu ovikana ommana, maana moolumo kapwitthi muulupale. Muthiyana mmosa ootheliwa ohimmye so: “Iyaka onnikivulaliha ni moolumo awe. Ekeekhai wira nkirina makhwatta wala murala mweerutthuni. Masi onnikiwereiha murima vaavo onihimya awe wira: ‘Miyo kinoolyihani!’ wala ‘Nyuwo khamunfai!’ Tthiri awo makhwatta ahinvola vamurimani vaka”. Mulopwana mmosa oothela ohimmye wira mwaarawe onnimuriipiha murima mwaha woomuramusa ni onvaha masina oohiloka. Owo onihimya so: “Nkinwerya ohimya itthu amwaaraka ankilavulela aya. Eyo ennikiiriha ohiphavela ovaanelana ni kinnikhala omutekoni mpakha wiila. Opaka eyo ennikikhaliherya osyaka mixankiho owaani”. Moolumo oohiloka, oowaawa ni ooruwana annikumiherya mixankiho sinceene ni ahuulaana olelo-va.

¹¹ Akhala wira anamathelana annilavulelana moolumo oowereya, eyo ennimuriipiha murima ole athelanne aya ni pooti onvila oliyala. Tthiri, Yehova khoniphavela wira anamathelana athokoreryaneke mwa enamuna eyo. Masi okathi mukina awo pooti oriipihana murima ahisuwelaka. Woonasa  wene, nyuwo munoona wira mwa mutthu ooreera murima, masi iyanyu wala mwaarinyu onoonela sai? Akhala wira mwaarinyu wala iyanyu onniriipiwa murima mwaha wa itthu munipaka anyu wala munihimya anyu, niireke munniimananiha ottharuwa?—aGalasia 5:15; mmusome aÉfeso 4:31.

12. Akhala wira mutthu oothela wala ootheliwa, etthu xeeni ekhanle oohonona waataana wawe ni Yehova?

¹² Musuweleke wira Yehova onnivaha efaita enamuna anamathelana anilavulihana aya hata ari ene mekhaya aahiiso ni atthu anceene. (Mmusome 1 Pedru 3:7.) Yoolepa ya Yakobo 1:26 enihimya so: “Akhalá mutthu onupuwela wira onimuttittimiha Muluku, nto ahinasuwela wettiha nlumi nawe,  mutth’owo onnisototha mmansawe: omuttittimiha wawe Muluku khuhi etthu”.

13. Enamuna xeeni ekina anamathelana akhanle aya ooriipihana murima yaahiivahe ephoole?

¹³ Anamathelana ahaana wiivaha ephoole wira ahiriipihane murima mwa enamuna ekina. Mwa ntakiheryo, mwaarowa woonela sai vaakhanle wira mwaarinyu wala iyanyu onniviriha okathi munceene ori ene ni mutthu mukina? Pooti wira munipaka eyo ni moonelo wooloka, ntoko ovara vamosa okathi woolaleerya wala omukhaliherya mutthu owo ophuka muxankiho awe. Masi niireke iyanyu wala mwaarinyu onniriipiwa murima mwaha wa etthu munipaka anyu? Murokora mmosa ohimmye so: “Kinniriipiwa murima vaavo iyaka ontepa awe omuthokorerya ni oviriha okathi munceene ori ene ni murokora mukina a mmulokoni. Vanikhala ntoko wira miyo nkirina efaita”.

14. (a) Maphattuwelo 2:24, onniixuttiha exeeni? (b) Exeeni ninreerela ahu wiikoha?

¹⁴ Ntoko maKristau ekeekhai nihaana waakhaliherya anamuyari ahu ni anna mmulokoni. Masi okathi ninthela ahu wala otheliwa, ole nithelanne ahu ohaana okhala nipuro noopacerya. Yehova ohimmye wira mulopwana ohaana onvarexexa mwaarawe. (Maphattuwelo 2:24) Moonelo wa iyahu wala mwaarihu ohaana okhala wootepa otthuneya mookumini mwahu. Mwiikoheke so: ‘Kiireke kinninvaha efaita, kinninvaha okathi ni omukhapelela iyaka wala mwaaraka ntoko oniphwanela awe?’

15. Xeeni ninreerela ahu osyaka otepa wiiraana ni mutthu ohikhanle mwaarihu wala iyahu?

¹⁵ Akhala wira nootepa wiiraana ni mutthu ohikhanle mwaarihu wala iyahu, eyo pooti okumiherya mixankiho mukasamentoni mwahu. Vakhaani-vakhaani nnoopacerya osiveliwa vanceene ni mutthu owo. (Matheyo 5:28) Osiveliwa  iwo pooti wunnuwa vamurimani vahu mpakha opaka etthu yaarowa ohonona ekasamento ahu.

16. Nlamulo xeeni Biibiliya onivaha awe voohimya sa othelana?

¹⁶ Nuumala ohimya wira: “Othelana ottittimihiweke n’atthu othene”, Biibiliya onihimya wira: “Ale athelanne ettittimihaneke, ehiraruweké, okhala wira Muluku onimwaphuka anamuttompe n’anamararuwa”. (aHéberi 13:4) Yoolepa ela, aBiibiliya akina anihimya wira “olili wa anamathelana” ophavelaka ohimya orupihana wa atthu ale athelanne. (Miruku 5:18) Anamathelana anrowa wooniherya sai ottittimihana voohimya sa orupihana?

17. (a) Atthu anceene anoonela sai oraruwelana? (b) MaKristau anoonela sai oraruwa?

¹⁷ Olelo-va, atthu anceene anuupuwela wira khahiyo vootthekeya omuraruwela ole athelanne aya. Masi nihikhala-khale nihapuxiwaka ni muupuwelo owo woohiloka. Biibiliya onnooniherya wira Yehova onninyokha orupihana woohiloka ni oraruwa. (Mmusome aRoma 12:9; aHéberi 10:31; 12:29) Akhala wira nnoorupihana ni mutthu ohikhanle mwaarihu wala iyahu, naamuhonona ekasamento ahu. Nave naarowa wooniherya wira khaninttittimiha malamulo a Yehova ni nampweteiwa waataana wahu wooloka ni yena. Nto nihaana onyokha itthu sootakhala saarowa oniiriha oraruwa. Eyo enihela muhina ohimakela wuupuwelela nrupihanaka ni atthu akina.—Yobi 31:1.

18. (a) Mwa enamuna xeeni oraruwa onlikana aya ni waakokhorela amuluku eethiru? (b) Yehova onoonela sai oraruwa?

¹⁸ Nlamulo na Moise naahimya wira oraruwa etampi yuulupale ni onlikana ni waakokhorela amuluku eethiru. Mutthu aapaka itampi iyo, aamwiiviwa. (Onamukuttho 20:2, 10) Mwa enamuna xeeni oraruwa waalikana aya ni waakokhorela amuluku eethiru? Akhala wira mwIsarayeli aanaakokhorela  amuluku eethiru, owo aanihonona ele aamuleihenrye awe Yehova wira aamuroromeleyaka wa yena mahiku otheene. Mwa enamuna emosaru, akhala wira mwIsarayeli aaniraruwa, owo aanihonona ele aamuleihenrye awe mwaarawe wira aarowa ororomeleyaka wa yena. (Okhuma 19:5, 6; Otumererya 5:9; mmusome Malakhiya 2:14.) Tthiri vannooneya wira Yehova onnoona oraruwa okhala etampi yuulupale.

19. Exeeni enrowa onikhaliherya opaka yoolakela ahu ya ohiraruwa?

¹⁹ Ankhi olelo-va? Nnaamwi niheettelaka Nlamulo na Moise, moonelo wa Yehova voohimya sa oraruwa khoturukeyale. Ntoko siisaale nihaarowa ahu omukokhorela muluku eethiru, nihikhala-khale nimuraruwelaka ole nithelanne ahu. (Esalimo 51:3, 6; aKolosi 3:5) Mutthu oniraruwa khahiyo paahi ohinimuttittimiha ole othelanne awe, maana onooniherya wira khonimuttittimiha Muluku ahu Yehova.—Nwehe Enoota n.° 26.

20. Ankhili anrowa olipiha sai ekasamento anyu?

²⁰ Munrowa olipiha sai ekasamento anyu? Biibiliya onaakhula so: “Empa ennitekiwa n’usuwela, ennilipihiwa n’ankhili”. (Miruku 24:3) Empa yootekiwa saana ti yoohakalaliha, yoomaaliha ni ennaakhapelela atthu a etthoko eyo. Eyo enoolikana ni ekasamento. Masi wira eyo yiiraneye anamathelena awo ahaana okhalana ankhili, mwaha woowi ankhili pooti okhaliherya ekasamento okhala yoolipa ni yoohakalaliha.

21. Muhaana opaka exeeni wira osuwela olipihe ekasamento anyu?

²¹ Olavulaka voohimya sa empa eyo, Biibiliya onnivikaniha oriki: “Okhovelela [wala osuwela] onnisariha emp’eyo n’itthu sothene sorera ni soloka”. (Miruku 24:4) Itthu sotheene muniixutta anyu mBiibiliyani sinookhaliherya vanceene ekasamento anyu. (aRoma 12:2; aFilipi 1:9) Tthiri vaavo munimusoma  anyu vamosa Biibiliya ni iliivuru sinimutthokiherya Biibiliya, nvaaneleke moota munrowa anyu ovarihela muteko ele muniixutta anyu. Nwehe inamuna mukhanle anyu owooniheryana ophenta, nttittimiho ni oreerelana murima mukasamentoni mwanyu. Munvekeleke Yehova wira ookhaliheryeni okhalana mikhalelo iyo ni mikhalelo sikina sinrowa olipiha ekasamento anyu ni owiirihani okhala mulopwana wala muthiyana onimphavela awe ole muthelanne anyu.—Miruku 15:16, 17; 1 Pedru 1:7.

22. Xeeni vanreerela aya omuthokorerya moophenta ni mwa nttittimiho ole nithelanne ahu?

²² Nihaana wiimananiha wira nimuthokoreryeke mwaarihu wala iyahu moophenta ni mwa nttittimiho. Niira siiso, ekasamento ahu enoolipa vanceene. Etthu yootepa otthuneya, okhala wira nnoomuhakalaliha Yehova.—Esalimo 147:11; aRoma 12:10.