1, 2. Exeeni eniwiirihani omphenta Yehova Muluku?

NIIREKE munnimphenta Muluku? Pooti wira omphenta wanyu ti wuulupale mpakha owiirihani wiivahererya wa Muluku. Woonasa wene, nyuwo munnoona wira Muluku mpatthani anyu muulupalexa. Masi musuweleke wira muhinatthi opacerya omphenta, Yehova topacenrye woophentani. Biibiliya onihimya so: “Hiyo ninnimphenta Muluku, okhala wira Muluku t’opajenrye oniphenta”.—1 Yohani 4:19.

² Nkahaya muupuwele inamuna soovirikana sinooniherya wira Yehova onniniphenta. Owo oonivaha elapo ela yooreera ni itthu sotheene sikhanle sinnihakalaliha. (Matheyo 5:43-48; Wisupulula 4:11) Ohiya-vo, Yehova oniphavela wira nikhale apatthani awe, tivonto onivanhe awe eparakha yoomusuwela oratteene. Tthiri okathi nimmusoma ahu Biibiliya ninninwiriyana Yehova. Nto vaavo ninvekela ahu owo onniniwiriyana. (Esalimo 65:3) Yehova onninlipiha ni onilakiherya orumeelaka ikuru sawe sowaarya. (Luka 11:13) Nave oomuruma Mwanawe mmoseene orwa valaponi wira onoopole etampi ni okhwa.—Mmusome Yohani 3:16; aRoma 5:8.

3. Nihaana opaka exeeni wira ompatthani ahu ni Muluku ohimale?

³ Niireke mookhalana mpatthani ookhalihenryeni okathi wooxanka ni okathi wooreera? Wira opatthani anyu  olipe, onitthuneya wiimananiha vanceene, kiira? Etthu emosaru enniiraneya ni Yehova, mpatthani muulupalexa mukhanle anyu ookhalana. Nto wira ompatthani ahu ni Yehova ohimale, Biibiliya onihimya wira nihaana okhala “mophentani mwa Muluku”, eyo piiyo, wiimananiha wira niphentiweke ni Muluku. (Yuda 21) Ninrowa owerya sai opaka eyo? Biibiliya onaakhula so: “Nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”.—1 Yohani 5:3.

4, 5. (a) Moolumo oowi ‘omphenta Muluku’ antaphulela exeeni? (b) Omphenta wanyu Yehova opacenrye sai?

⁴ Exeeni Biibiliya oniphavela awe ohimya ni moolumo oowi ‘omphenta Muluku’? Moolumo ala khamphavela ohimya ophenta wa Muluku, masi anihimya ophenta nimmooniherya ahu Muluku. Niireke munnuupuwela okathi mpacenrye anyu omphenta Yehova?

⁵ Niireke munnuupuwela okathi mwiixuntte anyu wira Yehova oniphavela wira mukhaleke mahiku otheene elapo esya? Tthiri munnuupuwela itthu sotheene Yehova opanke awe wira eyo eweryaneye. Nave muhiixutta wira Yehova oonivaha etthu ya faita vaavo aamurumme awe Mwanawe orwa valaponi wira onoopole. (Matheyo 20:28; Yohani 8:29; aRoma 5:12, 18) Tthiri, osuwela wira Yehova ohoophentani vanceene, ohoovarani murima mpakha owiirihani omphenta.—Mmusome 1 Yohani 4:9, 10.

6. (a) Omphenta mutthu onihela muhina exeeni? (b) Omphenta wanyu Yehova owiirinheni opaka exeeni?

⁶ Omphenta Muluku wanipacerya paahi. Maana omphenta mutthu onihela muhina itthu sinceene ovikana ohimya paahi wira “kinnoophentani”. Akhala wira  ninnimphenta mutthu, ninnipaka itthu sotheene ninwerya ahu wira nimuhakalalihe. Mwa enamuna emosaru, omphenta wanyu Yehova ohaana owiirihani okhala mwa enamuna enimuhakalaliha. Nto vaavo omphenta wanyu oninnuwa aya, woonasa wene, pooti owiirihani wiivahererya ni opatisiwa. Okathi mwaapanke anyu eyo, mwaahimmanela natiri Yehova wira munrowa omukokhorelaka okumi anyu wotheene. (Mmusome aRoma 14:7, 8.) Munrowa ommaliherya sai natiri owo?

7. (a) Akhala wira ninnimphenta Yehova, ninrowa opaka exeeni? (b) Malamulo makina a Yehova taavi?

⁷ Akhala wira ninnimphenta Yehova ‘nnimwettelaka soruma sawe’, eyo piiyo, malamulo awe. Nimpaka sai eyo? Nimwiiwelelaka ni murima wotheene. MBiibiliyani, Yehova onninleela moota wookhala. Mwa ntakiheryo, Yehova onninleela wira ti voohiloka ohapaliwa, wiiya, wootha, orupihana ni mutthu nihilepihanne ahu ekasamento ni omukokhorela mutthu aahiiso etthu ohikhanle Yehova paahi.—1 aKorinto 5:11; 6:18; 10:14; aÉfeso 4:28; aKolosi 3:9.

8, 9. Akhala wira Biibiliya khonihimya mooluluwanya etthu yoopaka, ninrowa osuwela sai ele enimusivela Yehova? Nvahe ntakiheryo.

⁸ Wira nimusiveliheke Yehova, khomphiyerya wiiwelela malamulo awe paahi. Maana owo khonivanhe elista ya malamulo a khula etthu mookumini mwahu. Tivonto, okathi mukina Biibiliya pooti ohihimya mooluluwanya etthu nikhanle ahu oopaka. Nto, okathi owo ninrowa opaka sai soothanla sooloka? (aÉfeso 5:17) Wira onikhaliherye opaka soothanla sooloka, Yehova oonivaha malakiheryo ari mBiibiliyani. Malakiheryo awo anninikhaliherya  osuwela moonelo wa Yehova. Tthiri okathi nimmusoma ahu Biibiliya, ninnitepa omusuwela Yehova, ntoko Mutthu. Osuwela muupuwelo wa Yehova, onihela muhina osuwela itthu sinimusivela ni itthu oninyokha awe.—Musome Esalimo 97:10; Miruku 6:16-19; nwehe Enoota n.° 1.

⁹ Nrowe niwehe moota nikhanle ahu oovarihela muteko mookumini mwahu. Exeeni enrowa onikhaliherya othanla itthu ninweha ahu mutelevisauni ni munternetini? Ekeekhai wira Biibiliya khonihimya mooluluwanya ele nikhanle ahu ooweha. Masi hata vari siiso, Yehova oonivaha malakiheryo annikhaliherya opaka soothanla sooloka. Mwa ntakiheryo, noosuwela wira olelo-va matthekulelo manceene aasareya orupihana woohiloka ni owali. Nave, musuweleke wira Biibiliya onihimya wira Yehova ‘onniphweliwa n’alipa-òwali’ ni “onimwaphuka anamuttompe n’anamararuwa”. (Esalimo 11:5; aHéberi 13:4) Malakiheryo ala anrowa onikhaliherya sai opaka soothanla sooloka? Vaavo ninsuwela ahu ele Yehova onnyokha awe nihaana osyaka ni ohipaka etthu eyo.

10, 11. Exeeni enniiriha omwiiwelela Yehova?

¹⁰ Exeeni enniiriha omwiiwelela Yehova? Niireke nimmwiiwelela mwaha woomoova onihukhumu aahiiso osyaka sookhumelela soohiloka mwaha woopaka soothanla soohiloka? (aGalasia 6:7) Nnaari. Hiyo ninnimwiiwelela Yehova mwaha womphenta. Ntoko siisaale mwaana oniphavela awe omuhakalaliha tiithi awe, hiyo nave nimphavela omuhakalaliha Tiithi ihu a wiirimu. Tthiri khiivo etthu yootepa ohakalaliha ovikana osuwela wira ninnimuhakalaliha Yehova!—Esalimo 5:13; Miruku 12:2; nwehe Enoota n.° 2.

¹¹ Hiyo khanimmwiiwelela Yehova okathi itthu sineetta aya saana paahi. Nave khaninthanla malamulo aahiiso  malakiheryo ninreerela ahu wiiwelela. (Otumererya 13:1) Ohiya-vo, ninnimwiiwelela Yehova mwa itthu sotheene. Tthiri moonelo ahu onoolikana ni wa nasaalimo, yoowo aahimmye so: “Kinnisiveliwa n’ikano sanyu: kinniphenta seiyo vanjene”. (Esalimo 119:47; aRoma 6:17) Nave nimphavela okhala ntoko Nowe. Owo aahooniherya wira aanimphenta Muluku opakaka itthu sotheene aarummwale awe ni Yehova. Biibiliya onihimya wira Nowe aahiira “sothene sarummwawe”. (Maphattuwelo 6:22) Tthiri otheene ahu ninniphavela okhala ntoko Nowe.

12. Ninrowa omuhakalaliha sai Yehova?

¹² Yehova onoonela sai vaavo nimmwiiwelela ahu? Biibiliya onihimya wira ‘onnitteliwa murima’. (Miruku 11:20; 27:11) Nkahaya muupuwele! Vaavo nimmwiiwelela ahu Mpattuxa a olumwenku wotheene ninnimuhakalaliha vanceene. Masi musuweleke wira Yehova khonnikhanyererya omwiiwelela. Ohiya-vo, owo oonivaha eparakha ya othanla mootaphuwa. Eyo entaphulela wira hiyo pooti othanla ele eri yooloka ni yoohiloka. Yehova oniphavela wira nipakeke itthu sooloka mwaha womphenta. Opaka eyo, enoonikhaliherya okhalana ekumi yooloka.—Otumererya 30:15, 16, 19, 20; nwehe Enoota n.° 3.

13, 14. Xeeni ohimyaka wira malamulo a Muluku khannirikela weettela? Nvahe ntakiheryo.

¹³ Ankhi akhala wira nnuupuwela wira malamulo a Yehova toovila aahiiso anninikhoottiherya otaphuwa? Biibiliya onihimya so: “Soruma sa Muluku khasinnirikela wettela”. (1 Yohani 5:3) Nuulumo na eGriki noowi “khasinnirikela”, ikwaha sikina ninnirumeeliwa ohimmwaka opaka malamulo oovila weettela aahiiso malamulo  anaahasula atthu akina. (Matheyo 23:4; Miteko 20:29, 30) Eyo ennivirikana ni malamulo a Yehova, maana ‘khannirikela’ wiiwelela mwaha woowi khahiyo oovila. Nave Yehova khonikhala-khala onivekelaka opaka etthu nihinwerya ahu.

¹⁴ Mwa ntakiheryo, nkahaya muupuwele wira munimukhaliherya mpatthani anyu othaamela empa ekina. Owo oohela itthu sawe mukaaxani. Ikaaxa sikina ti sooveya. Masi ikaaxa sikina ti soolemela ni sihaana oteexiwa ni atthu anli. Munoona wira mpatthani anyu aamoovekelani oteexa mekhinyu ikaaxa soolemela? Nnaari! Mwaha wa xeeni? Mwaha woowi khoniphavela wira moone owereya. Moolikanasa, mpatthani ahu Yehova khonikhala-khala onivekelaka opaka etthu onsuwela awe wira khaninwerya. (Otumererya 30:11-14) Yehova onnisuwela mukhalelo ahu. Maana Biibiliya onihimya wira: “Awo [Apwiya Yehova] annisuwela orattene mùpeliwo ahu: annisuwela wira hiyo ná ntthupi pahi”.—Esalimo 103:14.

15. Exeeni ennikupaliha wira malamulo a Yehova anniniphwanyiha mireerelo?

¹⁵ Khalai Moise aahaaleela aIsarayeli wira malamulo a Yehova yaamwaaphwanyiha mireerelo. Nto vaakhanle wira aIsarayeli yaamwiiwelela, ‘yamukhalana ekumi’. (Otumererya 5:28-33; 6:24) Eyo enniiraneya olelo-va. Itthu sotheene Yehova onnivekela awe sinninikhaliherya okhalana okumi wooloka. (Mmusome Yesaya 48:17.) Okathi wotheene, Tiithi ihu Yehova onnisuwela itthu sinrowa onikumiherya mireerelo. (aRoma 11:33) Biibiliya onihimya wira: “Muluku ophentá”. (1 Yohani 4:8) Eyo enooniherya wira itthu sotheene Yehova onihimya awe ni onipaka awe sineettihiwa ni ophenta.

16. Okhala wira khivanikhweya okathi wotheene omwiiwelela Muluku, exeeni enrowa onikhaliherya okhala oowiiwelela?

 ¹⁶ Khivanikhweya okathi wotheene wiiwelela malamulo a Muluku, mwaha woowi ninkhala olumwenku wootakhala onilamuleliwa ni Diabo. Owo onniimananiha owiiriha atthu opaka itthu soohiloka. (1 Yohani 5:19) Ohiya-vo, nlelo na anatampi. Nto nihaana owanana muupuwelo ni moonelo woohiloka, yoowo okathi mukina onniiriha ohimwiiwelela Muluku. (aRoma 7:21-25) Masi muusuweleke wira khanirimenle. Maana omphenta wahu Yehova onninikhaliherya opaka itthu sooloka. Nave Yehova onniweha wiimananiha wahu, omwiiwelela ni onninikhaliherya onivahaka ikuru sawe sowaarya. (1 Samuweli 15:22, 23; Miteko 5:32) Ikuru sowaarya sa Muluku sinninikhaliherya okhalana mikhalelo sinnikhaliherya omwiiwelela Yehova.—aGalasia 5:22, 23.

17, 18. (a) Eliivuru ela, ninrowa wiixutta exeeni? (b) Muru onittharelana ninrowa oweha exeeni?

¹⁷ Eliivuru ela, ninrowa wiixutta moota woomuhakalaliha Yehova. Nave ninrowa woona moota woovarihela muteko malakiheryo a mBiibiliyani mookumi mwahu, nihiliyalaka ele Muluku onihimya awe okhala yooloka ni yoohiloka. Muhikhala-khale muliyalaka wira Yehova khonnikhanyererya omwiiwelela. Masi namwiiwelela nnookhalana okumi wooloka, niinaano-va ni muhoolo ekumi yoohimala. Etthu yootepa otthuneya, osuwela wira vaavo nimmwiiwelela ahu Yehova ninnooniherya wira ninnimphenta vanceene.—Nwehe Enoota n.° 4.

¹⁸ Wira onikhaliherye osuwela ele eri yooloka ni yoohiloka, Yehova oonivaha murima. Akhala wira nnimwiixuttiha saana murima ahu, owo onoonikhaliherya ‘wettela soruma sawe’. Masi, murima exeeni? Ninrowa wiixuttiha sai? Muru onittharelana, ninrowa waakhula makoho awo.