MURU 6
Moota Woothanla Matthekulelo Ooloka
“Mwireke sothene vonvuwiha Muluku”.—1 AKORINTO 10:31.
1, 2. Xeeni vari aya vooloka othanla mwa miruku matthekulelo ahu?
NKAHAYA muupuwele mphavelaka olya efruta, masi munoona wira mpantta mukina ohuutta. Mwaarowa opaka exeeni? Niireke mwaarowa olya yotheene? Mwaarowa oriha? Aahiiso mwaarowa othikila mpantta wowuntta wira mulye mpantta wooloka?
2 Matthekulelo anoolikana ni efruta. Sookhala inamuna sikina sooloka sa otthekula, masi inamuna sinceene sa otthekula ti soowuntta, maana sinnaatumererya atthu orupihana woohiloka, otakhala murima ni itthu sinivarihana ni minepa sootakhala. Okathi munthanla anyu matthekulelo anyu niireke munihimya wira: “Kookhalana ehakhi yoothanla khula enamuna ya matthekulelo kimphavela
aka? Eyo yoothanla aka”. Wala munihimya so: “Khekhanle enamuna yooloka ya matthekulelo”. Aahiiso munnithanla saana matthekulelo anyu, munaweha itthu sooloka ohiya sootakhala.3. Xeeni nintthuneya ahu othanla saana matthekulelo ahu?
3 Otheene ahu ninniphavela otthekula. Masi hata vari siiso nimphavela othanla mwa miruku matthekulelo ahu, mwaha woowi nimphavela wira matthekulelo ahu ahihonone waataana wahu ni Yehova.
“MWIREKE SOTHENE VONVUWIHA MULUKU”
4. Malakiheryo ari 1 aKorinto 10:31, annikhaliherya sai othanla saana matthekulelo ahu?
4 Vaavo naivaherenrye ahu wa Yehova, naahimuleiherya wira nimphavela omukokhorelaka okumi ahu wotheene. (Mmusome Musuweli 5:3.) Nave naahileiherya wira naarowa opakaka itthu “sothene vonvuwiha Muluku”. (1 aKorinto 10:31) Niireke naarumeyi a Muluku okathi ninlaleerya ahu ni omithukumanoni paahi? Nnaari. Okathi wotheene na arumeyi a Muluku, okhale okathi nimphumurya ahu aahiiso okathi nintthekula ahu.
5. Enamuna xeeni ya okokhorela nimphavela ahu onvaha Yehova?
5 Etthu nintepa ahu ovaha efaita mookumini mwahu ori omukokhorela Yehova. Tivonto, okathi wotheene nimphavela onvaha Yehova itthu sootepa otthuneya. Murummwa Paulo aatthokihenrye so: “Mwivahererye wa Muluku, ntoko mukuttho mukumi ni worerihiwa ni womusivela Muluku”. (aRoma 12:1) Vano Yesu aahimmye wira: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene!” (Marko 12:30) Khalai, aIsarayeli yaaninvaha Yehova mukuttho wa inama. Nto wira eemererye mukuttho aya, inama iyo saahaana okhala soohirakala. Masi akhala wira mwamunama owo aahirakala, Yehova kheemererya mukuttho aya. (Onamukuttho 22:18-20) Moolikanasa, akhala wira omukokhorela wahu ti woohiloka, Yehova pooti oheemererya. Eyo yaarowa wiiraneya sai?
6, 7. Yehova onoonela sai okokhorela wahu akhala wira ninnithanla matthekulelo oohiloka?
6 Yehova ohimmye so: “Mukhaleke atthu òwarya, okhala wira miyo k’òwarya”. (1 Pedru 1:14-16; 2 Pedru 3:11) Wira Yehova eemererye okokhorela wahu, nihaana okhala atthu oowaarya, niire so, atthu ooreera murima. (Otumererya 15:21) Noosuwela wira akhala wira nnoopaka itthu Yehova ohimphavela awe ntoko orupihana woohiloka, otakhala murima ni opaka itthu sinvarihana ni minepa sootakhala, owo khonrowa weemererya okokhorela wahu. (aRoma 6:12-14; 8:13) Musuweleke wira Yehova khivammusivela akhala wira ninnitthekula ni itthu iyo soohiloka. Nave itthu iyo pooti wiiriha okokhorela wahu okhala woohiloka ni pooti ohonona waataana wahu ni Yehova.
7 Ninrowa othanla sai mwa miruku matthekulelo ahu? Malakiheryo xeeni anrowa onikhaliherya osuwela matthekulelo ooloka ni oohiloka?
MUNYOKHEKE SOOTAKHALA
8, 9. Enamuna xeeni ya otthekula ninreerela ahu osyaka ni nthowa xeeni?
8 Olelo-va, sookhala inamuna soovirikana sa otthekula. Inamuna sikina sa otthekula sinneemereriwa ni maKristau. Masi inamuna sinceene sa otthekula soosareya itthu Yehova onnyokha awe. Vano nrowe niwehe inamuna soohiloka sa otthekula ninreerela ahu osyaka.
9 Ifilme sinceene, isaite, iprograma sa TV, axooku eletroniko ni isipo sinceene ti soohiloka ni sintumererya Miteko 15:28, 29; 1 aKorinto 6:9, 10) Vaavo ninsyaka ahu matthekulelo awo, ninnimooniherya Yehova wira ninninyokha itthu sootakhala.—Esalimo 34:15; aRoma 12:9.
orupihana woohiloka ni okhwiri. Okathi mukina itthu iyo sinnooniheriwa ntoko wira ti sooloka ni soohakalaliha. Masi, maKristau eekeekhai annikhootta matthekulelo anivarihana ni itthu Yehova onnyokha awe. (10. Exeeni enrowa okhumelela akhala wira ninnithanla matthekulelo oohiloka?
10 Atthu akina anuupuwela wira khahiyo vootthekeya otthekula ni itthu sintumererya orupihana woohiloka, otakhala murima aahiiso itthu sinivarihana ni minepa sootakhala. Atthu awo anuupuwela so: ‘Nkinoona otakhala waya. Miyo nkinkhala-khala kipakaka itthu iyo’. Akhala wira nnuupuwela siiso, nisuweleke wira nnimwiiwoka. Biibiliya onihimya so: “Khivo etthu yotakhala envikana murima wowotha. Murim’owo khunttharuwa”. (Yeremiya 17:9) Akhala wira ninnitthekula ni itthu sihimmusivela Yehova, khanikhanle oohimya wira ninninyokha itthu Yehova onyokha awe. Vaavo nintepa ahu otthekula ni itthu soohiloka, nnootepaka woona okhala ntoko wira ti sooloka. Nuuvira okathi, murima ahu pooti ohononeya ohinanleela okathi ninthanla ahu itthu soohiloka.—Esalimo 119:70; 1 Timótheyo 4:1, 2.
11. Yoolepa ya aGalasia 6:7, ennikhaliherya sai othanla matthekulelo ooloka?
11 Biibiliya onihimya wira: “Eyo mutthu enàlawe, yeyo t’inhephawe”. (aGalasia 6:7) Ekeekhai tiila: Akhala wira nintthekula ni itthu soohiloka, nuuvira okathi nnoopaka itthu soohiloka. Mwa ntakiheryo, atthu akina waanaasivela oweha ifilme sa orupihana woohiloka, nto nuuvira okathi muupuwelo woohiloka waahisareya mmuruni mwaya mpakha owiiriha opaka etampi. Yehova onninivaha itthu sinnikhaliherya othanla mwa miruku matthekulelo.
MURUMEELEKE MALAKIHERYO A BIIBILIYA OKATHI MUNIPAKA ANYU SOOTHANLA
12. Exeeni enrowa onikhaliherya opaka soothanla sinimuhakalaliha Yehova?
12 Matthekulelo makina annooneya wira khaneemereriwa ni Yehova, tivonto nihaana osyaka. Masi ankhi akhala wira khaninsuwelexa akhala wira Yehova onneemererya aahiiso koneemererya? Nto nisuweleke wira Yehova khonnivaha elista ya malamulo a itthu nikhanle ahu ooweha, owiriyana aahiiso osoma. Masi Yehova omphavela wira nirumeeleke murima ahu wiixuttihiwe ni Biibiliya. (Mmusome aGalasia 6:5.) Wira opake eyo, Yehova oonivaha malakiheryo, eyo piiyo, ikeekhai sa mBiibiliyani sinnikhaliherya osuwela moonelo awe. Nto malakiheryo awo anninikhaliherya wiixuttiha murima ahu. Nave, anninikhaliherya osuwela “sintthunawe Muluku”, wira nipakeke soothanla sinimuhakalaliha.—aÉfeso 5:17.
Malakiheryo a mBiibiliyani anninikhaliherya othanla saana matthekulelo ahu
13. (a) Xeeni okathi wotheene maKristau ahinthanla aya enamuna emosaru ya otthekula? (b) MaKristau otheene ahaana opaka exeeni?
13 Khahiyo wira okathi wotheene maKristau anrowa othanlaka matthekulelo mamosaru. Mwaha wa xeeni? Mwaha woowi khula mutthu ookhalana itthu sinimusivela. Ohiya-vo, muKristau mmosa pooti wuupuwelaka wira enamuna emosa ya otthekula ti yooloka, masi mukina onoona wira ti yoohiloka. Hata vari siiso, wira maKristau otheene apakeke soothanla sooloka, ahaana otthara malakiheryo a Biibiliya. (aFilipi 1:9) Malakiheryo awo anoonikhaliherya othanla saana matthekulelo animuhakalaliha Muluku.—Esalimo 119:11, 129; 1 Pedru 2:16.
14. (a) Etthu xeeni ninreerela ahu othokorerya? (b) Murummwa Paulo aaloponle sai maKristau?
Matheyo 6:33.) Niireke okathi ninviriha ahu ntthekulaka onnooniherya eyo? Moohisuwela, okathi mukina pooti ovirihaka okathi munceene nitthekulaka paahi. Murummwa Paulo aahaalopola maKristau oriki: “Muhetteké ntoko alolo: mwetteke ntoko atthu a miruku. Mphwanye murerelo w’okathi orinanyu, okhala wira mahiku ala t’òtakhala”. (aÉfeso 5:15, 16) Eyo enooniherya wira nihaana okhalana ephoole ni okathi ninviriha ahu nitthekulaka. Nave nihaana wiimananiha ohela nipuro noopacerya omukokhorela Muluku mookumini mwahu.—aFilipi 1:10.
14 Etthu ekina ninreerela ahu othokorerya, okathi ninviriha ahu nitthekulaka. Eyo etthu yootepa otthuneya. Maana, ntoko maKristau eekeekhai, etthu nintepa ahu ovaha efaita omurumeela Yehova. (Mmusome15. Niireke ninsyaka paahi matthekulelo ninsuwela ahu wira toohiloka?
15 Noosuwela wira nihaana osyaka khula enamuna ya otthekula Yehova oninyokha awe. Ankhi akhala wira khaninsuwela oratteene akhala wira enamuna eyo ya otthekula ti yoohiloka? Niireke tthiri nihaana okhalana ephoole? Nkahaya muupuwele ela: Vaakhanle wira munwela mwaako woorakama, niireke mwaamphiya mpakha oponta waya? Nnaari. Maana akhala wira munnivaha efaita ekumi anyu, mwaamusyaka wiikumiherya maxakha. Etthu emosaru enniiraneya vaavo ninthanla ahu matthekulelo. Biibiliya onihimya so: “Mukhotteke sotakhala”. (Miruku 4:25-27) Tthiri ti vooloka osuwelexa itthu sootakhala. Nave ti vooloka osyaka itthu nihinsuwela ahu oratteene akhala wira ti sooloka wala nnaari, maana khanimphavela opaka itthu sinrowa ohonona waataana wahu ni Yehova.
MUSUWELEKE MOONELO WA YEHOVA
16. (a) Itthu xeeni Yehova oninyokha awe? (b) Munrowa wooniherya sai wira munninyokha itthu Yehova oninyokha awe?
16 Nasalimo mmosa aalempe so: “Nyuwo munaphenta Apwiya, mukhotteke sotakhala”. (Esalimo 97:10) MBiibiliyani ninnisuwela muupuwelo ni moonelo wa Yehova. Okathi munimusoma anyu Biibiliya nwehe moota ele munisoma anyu enookhaliheryayani okhalana moonelo wa Yehova. Mwa ntakiheryo, noosuwela wira Yehova onninyokha “nlumi nowotha; matata animwiva ohitthenke; murima onùpuwela sotakhalaru: [ni] inawu sintthimakela miteko sonanara”. (Miruku 6:16-19) Nave nihiixutta wira Yehova onninyokha ‘oraruwa, . . . okokhorela itthu sihikhanle Muluku, wiinelana okhwiri, . . . wunlelana ehaje [nrima], oviruwa, . . . oramelana, ohapaliwa, opaka mithukumano sotakhala, [ni] wira itthu sikina sothakhala’. (aGalasia 5:19-21) Munniwerya woona moota malakiheryo ala annikhaliherya aya othanla matthekulelo ooloka? Mwa inamuna sotheene nimphavela omwiiwelela Yehova, hata nri ene mekhihu wala ni atthu anceene. (2 aKorinto 3:18) Tthiri soothanla nimpaka ahu nri ene mekhihu, sinnooniherya omutthu ahu.—Esalimo 11:4; 16:8.
17. Nihinatthi othanla matthekulelo ahu, makoho xeeni ninreerela ahu wiikoha?
17 Tivonto, nihinatthi othanla matthekulelo ahu, nihaana wiikoha so: ‘Nuumala oweha enamuna ela ya otthekula, waataana waka ni Yehova onrowa okhala sai? Murima aka onrowa okhala sai?’ Vano, nrowe niwehe malakiheryo anrowa onikhaliherya othanla mwa miruku matthekulelo ahu.
18, 19. (a) Moovarihana ni aFilipi 4:8, miruku xeeni murummwa Paulo ovanhe awe? (b) Malakiheryo xeeni anrowa onikhaliherya othanla saana matthekulelo ahu?
18 Othanla matthekulelo ahu, onoolikana ni othanla itthu ninrowa ahu osariha mmuupuweloni mwahu. Murummwa Paulo aalempe so: “Mphaveleke ni murim’anyu wothene itthu sikhanle s’ekekhai ni sottittimiheya; sothene sikhanle sa xariya ni soloka; sothene sikhanle sophenteya ni sophwanelela; sothene sikhanle sa nlema ni sottottopeleya”. (aFilipi 4:8) Akhala wira nnoosariha muupuwelo ahu itthu ntoko iyo, nnoowerya ohimya wira: “Apwiya! Mwakhelele molumo a mwano mwaka: mwakhele mupuwelo wa mmurimani mwaka”.—Esalimo 19:15.
19 Mwiikoheke so: ‘Itthu xeeni kinhela aka mmuupuweloni mwaka? Nuumala oweha eviidiyu aahiiso eprograma ya TV, kiireke kinnuupuwela itthu sooloka? Kiireke aÉfeso 5:5; 1 Timótheyo 1:5, 19) Kiireke kinninvekela Yehova mootaphuwa? Kiireke onnikuuliha muru onvekela Yehova? Kiireke kimmakela wuupuwela itthu sa orupihana ni sinivarihana ni minepa sootakhala? (Matheyo 12:33; Marko 7:20-23) Kiireke matthekulelo aka annikiiriha okhalana “mwettelo w’atthu” a mulaponi?’ (aRoma 12:2) Waakhula wahu ni murima wotheene makoho awo, anoonikhaliherya woona moota nikhanle ahu oovikaniha olipiha waataana wahu ni Yehova. Nihaana onvekela Yehova ntoko nasalimo aavekenle awe oriki: “Muhuluxe maitho aka, wira kihòneké ithiru”. *—Esalimo 119:37.
kinnikhalana murettele wala murima wooloka?’ (ATTHU AKINA ANROWA WOONELA SAI SOOTHANLA SAKA?
20, 21. Xeeni nintthuneya ahu othokorerya moonelo wa annihu okathi ninthanla ahu matthekulelo?
20 Malakiheryo makina anreerela ahu wuupuwela ari 1 aKorinto 10:23, 24, “Ninniwerya wira sothene sintthunahu, masi khahiyó wira sothene sininnuwiha muthukumano. Ahikhale omphavela oreriwa wawe, nto aphaveleke sinaphwanyiha oreriwa akhw’awe”. Okhala wira nookhalana otaphuwa woothanla etthu yoopaka, eyo khentapulela wira nookhalana ehakhi yoopaka etthu eyo. Nihaana wuupuwela moota anna ni arokora anrowa aya woonela yoothanla ahu.
21 Khula mutthu ookhalana muupuwelo awe. Mwa ntakiheryo, murima wa munna aahiiso murokora mmosa pooti omweemererya oweha eprograma ya TV. Masi hata vari 1 aKorinto 8:12) Tivonto, khanimphavela opaka etthu yaarowa waaxankiha axinnihu oowaamini.—aRoma 14:1; 15:1; 1 aKorinto 10:32.
siiso, pooti wira eprograma eyo ennimuxankiha munna aahiiso murokora mukina. Nto vakhala wira ti siiso, munrowa opaka exeeni? Hata musuwelaka wira khiivo enookhoottiheryani oweha eprograma eyo, nyuwo pooti othanla ohiweha-tho vakhala wira ennixankiha murima wa anna akina. Mwaha wa xeeni? Mwaha woowi, khamumphavela “watthekiha” axinninyu, aahiiso ‘omutthekela Kristu’! (22. Ninrowa wooniherya sai wira ninnittittimiha moonelo wa anna akina?
22 Mwa enamuna ekina, sai akhala wira murima anyu khoniweemereryani oweha, osoma aahiiso opaka etthu ekina anna akina anoona aya wira ti yooloka? Okhala wira munnaaphenta ni waattittimiha anna awo, khivanreerela waakhanyererya wira apakeke soothanla simosaru ntoko nyuwo mumphavela anyu. Mwa ntakiheryo, mulipa oneettiha ekaaro onnisuwela wira atthu akina pooti wuupiha, akina weettiha vaakhani, masi hata vari siiso anakhala alipa-ooweettiha ekaaro ooloka. Mwa enamuna emosaru, nyuwo ni munna mukina pooti okhalana moonelo woovirikana voohimya sa enamuna emosa ya otthekula, masi otheene anyu munatthara malakiheryo a mBiibiliyani.—Musuweli 7:16; aFilipi 4:5.
23. Exeeni enrowa onikhaliherya othanla saana matthekulelo ahu?
23 Exeeni enrowa onikhaliherya othanla saana matthekulelo ahu? Etthu enrowa onikhaliherya ori orumeela murima ahu wiixuttihiwe ni Biibiliya ni waaphenta wahu anna ni arokora. Tthiri okathi nimpaka ahu eyo, ninnihakalala maana ninniira “sothene vonvuwiha Muluku.”
^ etti. 19 Soolepa sinittharelana sinoonikhaliherya othanla saana matthekulelo ahu: Miruku 3:31; 13:20; aÉfeso 5:3, 4 ni aKolosi 3:5, 8, 20.