1-3. (a) Xeeni maama vaniimananiha awe wira mwanawe okhale ootthokiheya saana? (b) Xeeni Yehova vaniphavela awe wira ale animukokhorela akhaleke ooratta, nto ooratta onnitumererya opaka exeeni?

MWAANA ohinatthi okhuma vate, maama awe onnimulokiherya saana. Owo onnipaka eyo omurapihaka ni onwariha ikuwo sooratteleya. Onnisuwela wira oratta ti wootthuneya wira mwaana ole okhalaneke ekumi yooloka. Nave-tho, maama ola onnisuwela wira ophwaneliwa wa mwanawe, nthoonyeryo noowi anamuyari awe tooratta.

² Yehova, Tiithi ihu a wiirimu, oniphavela wira arumeyi awe akhaleke ooratta. Nuulumo nawe nnihimya wira: “Wa mutthu ooratta nyuwo munnikhala ooratta”. * (Esalimo 18:26, NM)  Mwaha wooniphenta Yehova onnisuwela wira oratta onnikumiherya mureerelo. Onilipelela wira Anamoona awe anrowa wiitthokihaka mmukhalelo oniwiiriha atthu onvuwiha Muluku. Mwekeekhai, oratta ahu ni mweettelo ahu wooloka onninvuwiha Yehova ni khoninyoholiha nsina nawe nootteela.​—Ezekiyeli 36:22; mmusome 1 Pedru 2:12.

³ Osuwela wira Muluku onaaphenta atthu ooratta, ohaana onitumererya ovikaniha okhala ooratta. Okhala wira ninnimphenta Muluku, hiyo nimphavela wira moota oneettiha ahu okumi, owiiriheke atthu onvuwiha. Nave-tho, nimphavela wira nivikaniheke okhala moophentani mwawe. Vano, nrowe nithokorerye mwaha aya vanitthuneya ahu okhala ooratta, ele enitaphulela aya okhala ooratta, ni moota woovikaniha okhala ooratta. Ovarerya wa enamuna eyo ononiiriha woona etthu enitthuneya ahu opaka.

4, 5. (a) Nthowa xeeni nuulupale ninnitumererya okhala atthu ooratta? (b) Moota xeeni itthu soopattuxiwa sinooniherya aya wira Yehova tooratta?

⁴ Yehova onniniixuttiha orumeelaka ntakiheryo nawe. Tivonto Nuulumo nawe ninhimya wira ‘nitthareke mwettelo wa Muluku’. (aÉfeso 5:1) Nthowa nuulupale ninniiriha okhala ooratta mwaha woowi Yehova, Muluku yoowo onimukokhorela ahu, tooratta, ooloka, ni oowaarya mmikhalelo sotheene.​—Musome Onamukuttho 11:44, 45.

⁵ Oratta wa Yehova, vamosa ni mikhalelo sinceene ni iphiro sawe, sinnooneya orweela mwa itthu sipattunxe awe. (aRoma 1:20) Elapo yaapakiwe wira ekhale nipuro nooloka wa apinaatamu. Yehova oopaka mikhalelo seephattu valaponi wira sireeriheke epheyo ni maasi. Axiitthu akina annitatuxa ikokhola khupakeya itthu sinivareleya muteko. Masientista makina annaarumeela axitthu awo wira areeriheke mapuro amwarexeliwe patarooya aahiiso ikokhola sikina siyiihiwe ni apinaatamu a nrima. Tthiri, ‘Apwiya apattunxe elapo ya vathí’ annivaha efaita yuulupale oratta. (Yeremiya 10:12) Nave-tho, hiyo nihaana ovahaka efaita.

6, 7. Moota xeeni Nlamulo na Moise naattittimihenrye aya oratta waavekeliwa ale yaamukokhorela Yehova?

 ⁶ Nthowa nikina ninniiriha okhala ooratta ti noowi, Yehova, Namalamulela Muulupale, onivekela wira ale animukokhorela akhale ooratta. Nlamulo nenle Yehova aavanhe awe aIsarayeli, oratta ni okokhorela saari itthu saavarihana saana. Nlamulo naahimya wira Nihiku na Ottipiha Soottheka, namukuttho muulupale aahaana orapa ikwaha piili. (Onamukuttho 16:4, 23, 24) Mulipa a mukuttho aavekeliwa onyawa ni orapiha inawu sawe ohinatthi ovaha mukuttho wa Yehova. (Okhuma 30:17-21; 2 Wahala 4:6) Nlamulo naaniromola itthu 70 saamwiiriha mutthu okhala oohiloka erutthu ni okokhorela wawe. Okathi aakhala awe oohiloka, mwIsarayeli khiirela mpantta myaha sa okokhorela, nto ikwaha sikina aanookotthiwa. (Onamukuttho 15:31) Mutthu yoole ahaaphavela otthara malakiheryo awo ooratta, ohela muhina orapa ni okattha ikuwo sawe, aahaana ‘okumihiwa munlokoni mw’atthu a Isarayeli’.​—Mothakoni 19:17-20.

⁷ Nnaamwi hiyo niheettelaka Nlamulo na Moise, masi nlamulo nlo ninnikhaliherya woona moota Muluku sinithokorerya awe myaha sikina. Mowooneya saana Nlamulo naahimya wira oratta waari etthu yaavekeliwa aya atthu yaale yaamukokhorela Muluku. Moonelo wa Yehova khovirikanne. (Malakhiya 3:6) Okokhorela wahu khonrowa weemereriwa ni Muluku akhala wira khahiyo ‘worera ni woloka’. (Yakobo 1:27) Tivonto, hiyo nohaana osuwela ele Muluku ennivekela awe mmwaha ola.

8. Mikhalelo xeeni Yehova onilipelela awe wira ninrowa wooniheryaka oratta?

⁸ MBiibiliyani, nuulumo noowi oratta khahiyo ninhimya oratta wa werutthuni paahi. Okhala ooratta vamaithoni va Muluku onihela muhina mikhalelo sotheene sa okumi ahu. Yehova onilipelela wira hiyo nnoovikanihaka okhala ooratta mwa inamuna xexe suulupale, eyo piiyo, ooratta wa omunepani, mmweettelo, muupuwelo, ni werutthuni. Nrowe nthokorerye ele enitaphulela aya okhala ooratta mwa inamuna iyo.

9, 10. Enitaphulela exeeni okhala ooratta wa omunepani, ni exeeni maKristau eekeekhai anisyaka aya?

 ⁹ Oratta wa enamuna yomunepani. Moolumo oowi oratta womunepani anitaphulela ohitakaaha okokhorela wekeekhai ni woowoka. Nihiku anaIsarayeli yaakhumme aya oBabilonia arowaka oYerusalemu, awo yahaana wiiwelela yootumererya ya Muluku yoowi: “Mukhumeke vo: muhivaré itthu sa mwikho; . . . mwirerihe”. (Yesaya 52:11) AnaIsarayeli awo yaatthikela oYerusalemu ni yoophavela ya otthikela-tho omukokhorela Yehova. Okokhorela iwo wahaana okhala wooloka, eyo piiyo, woohinanarihiwa ni sowiixuttiha sinimunyohola Muluku, ni sowiira aahiiso soolema sa etiini ya oBabilonia.

¹⁰ Olelo-va, maKristau eekeekhai ahaana okhalana ephoole wira okokhorela waya ohinanarihiwe ni okokhorela woowoka. (Mmusome 1 aKorinto 10:21.) Nihaana okhalana ephoole mmwaha ola, okhala wira etiini yoowoka ehuulaana mulaponi. Mwa ilapo sinceene, soolema ni miteko sinceene sinivariwa sinnivarihana ni sowiixuttiha sa itiini soowoka, ntoko yowiixuttiha yoowi yookhala etthu enihala eri ekumi nuumala okhwa mutthu. (Musuweli 9:5, 6, 10) MaKristau eekeekhai annisyaka soolema seiye sookupali saya sinikhuma etiini yoowoka. * Hiyo niheemereryeke wira atthu akina aniirihe otthekela malamulo a Biibiliya voohimya sa okokhorela wooloka.​—Miteko 5:29.

11. Okhala ooratta wa mweettelo onihela muhina exeeni, nto xeeni vanitthuneya ahu okhala ooratta mmwaha ola?

¹¹ Oratta wa mweettelo. Wira nikhale ooratta mmweettelo ahu, nihaana osyaka muthinto wotheene wa orupihana woohiloka. (Mmusome aÉfeso 5:5.) Okhala ooratta mmweettelo ahu ti vootthuneya vanceene. Ntoko ninrowa ahu woona mmuru onittharelana muliivuruni-mu, wira nikhale moophentani mwa Muluku, nihaana ‘otthyawa itthu s’ekhapa.’ Atthu yaale ahinttharuwa orupihana woohiloka khanrowa “okela momweneni mwa Muluku”. (1 aKorinto 6:9, 10, 18) Mmoonelo wa Muluku, atthu awo ari egrupu ya ‘atakhali’. Akhala wira khanituruka, anrowa waakhela ‘okhwa wanenli’.​—Wisupulula 21:8.

12, 13. Ovarihana xeeni okhanle eriyari ya ele enuupuwela ahu ni ele enipaka ahu, nto ninrowa okhala sai ooratta mmuupuwelo ahu?

 ¹² Oratta wa muupuwelo. Ele enuupuwela ahu enniniiriha opaka itthu. Akhala wira ninnuupuwela itthu soohiloka, moohipisa aahiiso muhoolo mwaya hiyo pooti opaka itthu soohiloka. (Matheyo 5:28; 15:18-20) Masi akhala wira nnuupuwelela itthu sooloka, nnoowerya ovikaniha okhalana mweettelo wooloka. (Mmusome aFilipi 4:8.) Nto ninrowa okhala sai ooratta ni muupuwelo ahu? Etthu emosa enitthuneya ahu othokorerya tiila: hiyo nihaana osyaka otthekula wotheene anihonona muupuwelo ahu. * Nave-tho, nihaana osarya muupuwelo ahu ni itthu sooloka nimusomaka Biibiliya khuta nihiku.​—Esalimo 19:8, 9.

¹³ Wira nivikanihe okhala moophentani mwa Muluku, ti vootthuneya okhala ooratta omunepani, mmweettelo, ni muupuwelo. Mikhalelo iya sa oratta sinnithokoreriwa kamosa-kamosa mmiru sikina sa eliivuru ela. Nrowe nthokorerye mukhalelo wa neexexe, eyo piiyo, oratta wa werutthuni.

14. Xeeni oratta wa werutthuni ohikhanle aya mwaha wa mutthu mekhawe?

¹⁴ Okhala ooratta mmukhalelo wa werutthuni onihela muhina orapa ni orattela mapuro anikhala ahu. Niireke wiirattela wa weerutthu mwaha wa mutthu mwaneene ohinreerela atthu akina ohimya etthu? Nnaari, maana ale animukokhorela Yehova khanoonela siiso. Ntoko soonale ahu, Yehova oniphavela wira nikhaleke ooratta werutthuni ohiya mwaha wa mureerelo ahu paahi, masi-tho mwaha wa ophavela onvuwiha Muluku. Nkahaya muupuwele nlikanyiho niwenha ahu wanipacerya. Onweha mwaana okathi wotheene ori ene oonanara mwaha wa ohirapa, wala ohikatthiwa ikuwo sawe, onniwiirihani okoha so: mwaana ola tawani? Hiyo khanniphavela wira makhalelo ahu a werutthuni amunyoholeke Tiithi ihu a wiirimu, aahiiso owiiriha  atthu akina ohivaha efaita ihapari sooreera sinlaleya ahu. Nuulumo na Muluku ninhimya so: ‘Khinniphavela omukwattuliha mutthu mwaha w’etthu p’itthu, wira muteko ahu ohinyemuliwe. Vovirikana, hiyo ninnòniherya mwa sothene wira na arumeyi a Muluku’. (2 aKorinto 6:3, 4) Nto, ninrowa ovikaniha sai okhala ooratta werutthuni?

15, 16. Wiirattela onihela muhina exeeni, nto ikuwo sahu sikhaleke sai?

¹⁵ Wiirattela ni wiitthokiha wahu. Nnaamwi soolema ni makhalelo avirikanaka khula elapo, vanniweryaneya otheene ahu ophwanya maasi ni esabau wira nirapeke hiyo ni aniihu khula nihiku. Oratta onihela muhina onyawa nirumeelaka esabau ni maasi nihinatthi olya aahiiso waapeya wala ovara yoolya, nave-tho nuumala orumeela elatrina, wala omurapiha mwaana aahiiso omukusiha mwaana iirusenle. Onyawa nirumeelaka esabau ni maasi onninaakiherya iretta, ni woonasa wene eyo ennoopola okumi ahu. Onnikhaliherya-tho wira axiitthu ootakhala  ahimwareele opuro onikhala ahu, nto opaka eyo onoowiiriha atthu osyaka oretta wa ovaluwa wala wooporari. Ilapo seiye ipa sihirina aya ilatrina sookhalela, ikokhola sinintta sihaana othipeliwa otakhwani, ikokhola sihaana othipeliwa ntoko siiriwa aya khalai wIsarayeli.​—Otumererya 23:12, 13.

¹⁶ Nave-tho, nihimaliheke mahiku manceene nihikantthe ikuwo sahu. Ikuwo siniwara maKristau khahiyo wira sohaana okhala sa musurukhu munceene aahiiso sikumiheriwe niinano, masi sohaana okatthiwa wira sikhaleke sooloka ni sookhalela. (Mmusome 1 Timótheyo 2:9, 10.) Voohicikha etthu sa opuro oniphwanyaneya ahu, mawarelo ahu ahaana ‘ottittimiha mwixuttiho wa Muluku Mòpoli ahu’.​—Tito 2:10.

17. Nthowa xeeni empa ahu ni itthu sa vapuwani sinitthuneya aya okhala sooratteleya?

¹⁷ Empa ahu ni itthu sa vapuwani. Hata empa ahu ehikhanle ya maluku wala yohireera saana ehaana okhala yooloka ni yooratteleya nittharihelaka ele eniweryaneya. Vamosaru, akhala wira nookhalana ekaaro ninrumeela ahu naarowaka omuthukumanoni ni olaleerya, hiyo nihaana wiimananiha wira ekhale yooloka muhina ni ota. Nuupuweleke wira empa ni itthu sa vapuwani sooratteliwa sinnivaha onamoona. Opaka eyo, enniwiiriha atthu woona wira Yehova ti Muluku ooratta, ni wira onrowa “wapwetexa ale anihonona elapo”, nto Omwene awe onrowa otatuxa elapo okhala eparayiisu. (Wisupulula 11:18; Luka 23:43, NM) Tthiri nimphavela wira empa ahu ni itthu sa vapuwani sikhale sooratteleya, niwooniheryaka atthu akina wira hata olelo-va hiyo ninnimananiha okhala ooratta, etthu yeeyo eri yootthuneya elapo esya enirwa.

18. Nnooniherya sai wira ninnivaha efaita Empa ya Omwene?

¹⁸ Nipuro nimmukokhorela ahu Yehova. Omphenta wahu Yehova onniniiriha ottittimiha Empa ya Omwene, nipuro na okokhorela wekeekhai eri muttetthe owo. Okathi atthu akina aniphiya aya va empa ya Omwene, ahaana woona oratta okhanle opuro owo oniira ahu mithukumano. Orattela ni olokiherya ti wootthuneya, wira empa ya Omwene ekhale yooloka. Orattela wahu onooniherya wira ninnivaha efaita empa ya Omwene. Eyo eparakha yuulupale orumeela okathi ahu wira nikhaliherye orattela ni ‘olokiha’ opuro onimukokhorela ahu Muluku. (2 Wahala 34:10)  Malakiheryo awo annivariheleya-tho muteko opuro oniiriwa mithukumano suulupale ntoko asembeleya ni kongresu.

19. Exeeni enitthuneya ahu osyaka wira nivikanihe okhala ooratta mmukhalelo wa werutthuni, nto nikhaliheryo xeeni Biibiliya onivaha awe mmwaha ola?

¹⁹ Wira nivikanihe okhala ooratta werutthuni, hiyo nihaana osyaka soolema ni sowiira iya ntoko iya: ompaha ni omulya soona wala sigaro, ohapaliwa, olya mirette sinipahula aahiiso sinihonona muupuwelo. Biibiliya khonihimya soolema ni sowiira sotheene soohiloka sikhumenle mahiku ala, masi onnivaha malakiheryo annikhaliherya osuwela moota Yehova onoonela awe itthu iyo. Omphenta wahu Yehova onniniiriha otthara mweettelo wa okumi onimusivela, mwaha woowi ninnisuwela moota onoonela awe itthu iyo. Nrowe nthokorerye malakiheryo mathanu a Biibiliya.

20, 21. Sowiira xeeni soohiloka Yehova oniphavela awe wira nisyake, nave nthowa xeeni nuulupale ninniiriha wiiwelela?

²⁰ “Axinn’aka òphentiwa! Okhala wira ninroromela wakhela sorera iya, nrapihe sonanara sothene s’erutthu ni s’eroho, niphaveleke omaleliha exariy’ahu nimuttittimihaka Muluku”. (2 aKorinto 7:1) Yehova oniphavela wira nisyake itthu iyo sinihonona erutthu ahu ni munepa ahu, aahiiso ikuru sinilamulela muupuwelo ahu. Tivonto, hiyo nihaana osyaka mikhalelo soohiloka sinisuweliwa wira sinnihonona erutthu ahu ni muupuwelelo ahu.

²¹ Tivonto Biibiliya vannitumererya awe oriki nihaana ‘orapiha sonanara sothene’. Nwehe wira eliivuru ya 2 aKorinto 7:1, enipacerya ni masu oowi: “Okhala wira ninroromela wakhela sorera iya [wala anatiri ala]”. Nto anatiri xeeni anihimmwa? Ntoko sinihimya aya iversikulu soowaattamela, Yehova onilaiherya wira: ‘Miyo kinowakhelani. Miyo kinokhala atith’inyu’. (2 aKorinto 6:17, 18) Nkahaya muupuwelele etthu ela: Yehova onilaiherya wira onimookhapelelani ni woophentani ntoko siisaale tiithi vanimphenta awe mwanawe mulopwana aahiiso muthiyana. Masi, Yehova onrowa opaka ele enilaiherya awe akhala wira nyuwo munrowa osyaka itthu sotheene sininanariha ‘erutthu ni eroho’ wala munepa. Tthiri, mutthu yoole  aarowa weemererya soolema aahiiso sowiira soohiloka simwiirihaka opweteiwa wataana wooloka orina awe ni Yehova, aarowa wooniherya okhala mulolo!

22-25. Malakiheryo xeeni a Biibiliya aniwerya onikhaliherya osyaka soolema ni sowiira soohiloka?

²² “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene”. (Matheyo 22:37) Yesu aahimmye wira yooruma ela ti yuulupalexa ovikana sooruma sotheene. (Matheyo 22:38) Yehova onniphwanelela ophentiwa moota owo. Wira nimphenteke Yehova ni murima ahu wotheene, okumi, ni muupuwelo ahu, nihaana osyaka sowiira saarowa okhuveiha mahiku ahu aahiiso otteettheiha muupuwelo ahu wooloka Muluku onivanha awe.

²³ Yehova ‘onnavaha atthu othene ekumi n’umumula n’itthu sothene’. (Miteko 17:24, 25) Okumi eri yoovaha enikhuma wa Muluku. Hiyo ninnimphenta ole onivanhe okumi, ti mulattu aya vanittittimiha ahu yoovaha eyo. Ninnisyaka soolema aahiiso sowiira sinihonona ekumi ahu, okhala wira ninnisuwela wira itthu iyo sinooniherya ohittittimiha yoovaha eyo ya okumi.​—Esalimo 36:10.

²⁴ “Mumphenteke mukhw’inyu ntoko sinìphentanyu”. (Matheyo 22:39) Ikwaha sinceene, soolema ni sowiira soohiloka sinnimukumiherya maxakha, ohiya paahi ole onipaka itthu iyo masi-tho atthu ari vakhiviru ni yena. Mwa ntakiheryo, omulya soona wala sigaro atthu akina ari vakhiviru, pooti waakumiherya maxakha hata ahimpahale. Nto, mutthu yoole onaakumiherya maxakha ale ahinimpaha soona wala sigaro onnitthekela yooruma ya Muluku yoowi mumphenteke ole aattamanne anyu. Nave-tho, sowiira sawe sinnooniherya wira onimootha, vaavo vanihimya awe wira onimphenta Muluku.​—1 Yohani 4:20, 21.

²⁵ “Nwupuxeryeke aKristu wira ahana òwìwelela alupale anettiha elapo ni makhulupale makina”. (Tito 3:1) Ilapo sinceene, mutthu okhalana wala onirumeela mirette sikina sinipahula onnitthekela nlamulo. Okhala wira hiyo na maKristau eekeekhai, ninnisyaka okhalana aahiiso orumeela mirette iyo sinipahula.​—aRoma 13:1.

26. (a) Nihaana opaka exeeni wira nikhale moophentani mwa Muluku? (b) Xeeni okhala ooratta ntoko Muluku siniphavela awe, oryaaya mweettelo wooloka wa okumi?

 ²⁶ Wira nikhale moophentani mwa Muluku, nihaana okhala ooratta, ohiya mwa itthu vakhaani paahi, masi mwa itthu sotheene. Ekeekhai wira ottharuwa soolema wala sowiira soohiloka khonikhwela, masi vanniweryaneya opaka mirukunuxo iyo. * Tthiri ela ti ephiro yoolokexa ya okumi ekhanle ahu ootthara, okhala wira okathi wotheene Yehova onniniixuttiha ophwanya mureerelo. (Mmusome Yesaya 48:17.) Etthu yootepa otthuneya tiila: ovikaniha okhala ooratta onniniiriha ohakalala mwaha woosuwela wira ninninvuwiha Muluku onimphenta ahu, nto khiyakhala moophentani mwawe.