Moolumo a murummwa Paulo ari mu 1 aKorinto 6:1-8, annooniherya wira khalai waanikhumelela ohiiwanana eriyari ya maKristau. Aahooniherya wira khivaamusivenle osuwela wira maKristau makina ooKorinto ‘yanivekela ophukiwa mulattu aya otribunali n’ale ahikhanle aKristu’. (Eversiikulu 1) Paulo aahaavaha maKristau mathowa aniphwanelela wira ahiroiheke otribunaali ya mulaponi milattu arina aya ni annaya eeKristau, masi yeereryeke ophuka attharihelaka malakiheryo anivahiwa mmulokoni. Nrowe nthokorerye mathowa yiirinhe ovahiwa malakiheryo ala a mBiibiliyani, ni nrowe niwehe myaha sikina sihinihimmwa mooluluwanya ni malakiheryo ala.

Akhala wira nookhalana muxankiho wa nakoso ni muKristau mukhwiihu, nohaana toko ophuka muxankiho owo nttharihelaka malakiheryo a Yehova, ohiya muupuwelo ahu. (Miruku 14:12) Ntoko Yesu oonihenrye awe, ti vooloka omaliha ohiiwanana mowaakuveya, ohinatthi okhala mulattu muulupale. (Matheyo 5:23-26) Moothananiha, maKristau makina anninanariwa mootepana, nto khiyaroiha myaha saya otribunaali. Murummwa Paulo ohimmye so: “Vekekhai, okumiheryana milattu yenyuru etthu yowuliha muru khuluwi”. Nthowa xeeni? Nthowa nuulupale ti noowi, opaka eyo, onninyoholiha nsina nooloka na muloko ni na Muluku onimukokhorela ahu. Hiyo ninnuupuwelela oratteene nikoho na Paulo, noowi: “Khino vamuhirerela ovilela wireliwa yotakhala?”​—Eversiikulu 7.

Nave-tho Paulo aahihimya wira Muluku onnivaha mmulokoni marehereryo ooloka wira aphukiweke manyaku-nyaku manceene. Axitokweene a mmulokoni aakhalana miruku sinceene mwaha woosuwela oratteene Nuulumo na Muluku, ni Paulo onihimya wira awo anniwerya ‘ophuka milattu sa . . . anna’, mmyaha “sa nihiku ti nihiku”. (Iversiikulu 3-6) Yesu ohooniherya wira ohiiwanana weiwe onihela muhina soottheka suulupale, ntoko wootha ni wiiya, wohaana ophukiwa atthariheliwaka mavalo mararu. Noopacerya tinla: mphaveleke ophuka mwaha owo nuule otthekelanne anyu; na nenli tinla: akhala wira khanwenrye omaliha mwaha owo ekwaha yoopacerya, nto mumphavele namoona mmosa aahiiso anli; ni na neeraru tinla: akhala wira khanwenrye ikwaha iye piili, nto mwaaroihele mwaha owo axitokweene a mmulokoni.​—Matheyo 18:15-17.

Ekeekhai wira muteko wa axitokweene a mmulokoni khahiyo paahi ophuka milattu aahiiso mixankiho sa nakoso, okhala wira awo khahiyo maadvogado. Khanivaha malamulo a moota woophuka onyakulihana mmyaha sa nakoso eriyari ya anna. Ohiya vo, awo aniphavela waakhaliherya ale arina muxankiho wira avariheleke muteko malakiheryo a Biibiliya ni aphukeke mwaha owo mwa murettele. Sakhala myaha soovila, axitokweene anninvekela nikhaliheryo mutokweene a esirkwitu aahiiso efiliyaali ya Anamoona a Yehova. Masi sookhala myaha sikina sihintthuneya otthariheliwaka vakhiviru vene malakiheryo ovanhe Paulo. Myaha xeeni?

Ikwaha sikina, atthu pooti oroihana otribunaali wira alokiherye itthu sikina, masi voohikhala mulattu muulupale. Mwa ntakiheryo, atthu awo aroihanne otribunaali pooti aphavelaka paahi wira avahiwe etukumento ya omwalana, ophavela ohalana mwaana okathi animwalana aya, wira mulopwana onvaheke mwaarawe musurukhu nuumala omwalana, ophavela oliveriwa ni empereesa ya seguro (empereesa yeele mutthu onivahererya awe musurukhu awe, wira yamukhumelela ehasara, mutthu owo oliveriwe ni empereesa eyo), oheliwa mulistani ya anamakopha oopwata, ophavela omooniherya mulipa oniphuka milattu otribunaali wira etukumento ehiiwale ni mulipa okhwiiye, yeeyo enimuhimya ole onirowa ohalana itthu sawe, ti yekeekhai. Sookhala ikwaha sikina munna onrowa awe woonaka wira vannitthuneya omukaxari mutthu yoole okaxanri otribunaali. *

Akhala wira myaha iyo khasinikumiherya onyakulihana, pooti ohitthekela masu Paulo uupuxeriwe awe olepa. * Masi, yoophavela yoopacerya ya muKristau ehaana okhala otteeliha nsina na Yehova ni okhaliha murettele ni wiiraana mmulokoni. Ekanyeryo yuulupale ya atthareli a Kristu ti ophenta, okhala wira “ole omphenta . . . khamphavela murerelo awe”.​—1 aKorinto 13:4, 5; Yohani 13:34, 35.