“Nyuwo mwahana okhala awixuttihi”. (aHéb. 5:12) Nkahaya muupuwele! Yehova, yoowo ori Mwiixuttihi oosuwelexa a olumwenku wotheene, onninlattula hiyo wira niwiixuttiheke akina voohimya sa yena! Tthiri eparakha ni muritti muulupale wiixuttiha voohimya sa Yehova, vakhale vatthokoni vahu, mmulokoni wala okathi woolaleerya. Exeeni enrowa onikhaliherya wiixuttiha oratteene?

Waakhuliwa nimphwanya ni masu murummwa Paulo aamulepenle awe Timootheyo: “Muthokorerye wasomela atthu Solempwa, ni walalèrya n’uwixuttiha”. Owo aahincererya oriki: “Mwira siso, munimòpowa mmansinyu vamosá n’ale aniwiwani”. (1 Tim. 4:13, 16) Muhupi onilaleya anyu onniwoopola atthu. Tivonto vanitthuneya anyu wiimananiha vanceene wira muncererye osuwela wanyu osoma ni wiixuttiha. Ebroxura ela epakeliwe wira yookhaliheryeni osuwela osoma ni wiixuttiha oratteene. Nwehe itthu vakhaani sinithokoreriwa ebroxura ela:

Yehova tori “Mwixuttihi [Muulupale]”. (Yes. 30:20) Nnaamwi ebroxura ela erowaka wookhaliheryani otepaka osuwela osoma ni wiixuttiha saana, muhiliyaleke wira Yehova tori Mwaneene muhupi onlaleleya ahu ni toniwiiriha atthu omurumeela. (Yoh. 6:44) Tivonto, ikwaha sinceene munvekeleke Yehova munepa awe wotteela. Murumeeleke Nuulumo na Muluku ikwaha sinceene. Mphaveleke onvuwiha Yehova, ohiya wiivuwiha. Mwiimananiheke waakhaliherya alipa-oowiriyana wira amphenteke Yehova.

Nyuwo moolattuliwa owiixuttiha atthu muhupi wootepaxa otthuneya ovahiwe apinaatamu. Hiyo ninnikupali wira mwaroromelaru ‘ikuru sinivahiwa anyu ni Muluku’, munoowerya osoma ni wiixuttiha saana.​—1 Ped. 4:11.

Awiixuttihi akhwiinyu,

Nikhuuru Noolamulela na Anamoona a Yehova