MUUPUWELE wira meediku musya oothaamela muttetthe anyu. Wanipacerya nyuwo pooti ohikupali wira owo meediku ooloka. Masi, ankhi akhala wira apatthani anyu akina aalooliwa nuuwo nto khukhala saana? Nyuwo khimwaarowa omphavelasa wira oolooleni?

Moolikanasa, Nuulumo na Muluku niri ntoko meediku owo. Atthu akina annihoverya Nuulumo na Muluku. Masi okathi anivarihela aya muteko Nuulumo nlo, okumi aya onniloka. Nrowe nithokorerye matakiheryo vakhaani.

Muthiyana mmosa oniihaniwa Sumiatun onnuupuwelela oriki: “Nuuvira okathi vakhaani vaavo naathelanne ahu, kaahoona wira iyaka Dumas, khaakiphenta. Nto miyo, mwaha woonanariwa, kaamakela waaruwana aiyaka, waapwexerya itthu sa vatthokoni ni waamana. Ikwaha sikina, miyo kaanitepa onanariwa mpakha osirikha wala odesmayari.

“Vaavo iyaka Dumas aapacenrye awe osoma Nuulumo na Muluku, kaanimunyohola. Masi, kaaniwiriyana yoosoma ya aiyaka kiryeene esaala ekina, awo ahisuwelaka. Nihiku nimosa, kaahiiwa iveersu saahimya so: ‘Muthiyana omwiweleleke iy’awe, ntoko t’Apwiya . . . Muthiyana amuttittimiheke iy’awe’. (aÉfeso 5:22, 33) Masu ala yaahikivara murima. Nto kaahinvekela Muluku wira okilevelele mwaha wowaaruwana aiyaka, ni kahinvekela-tho wira okikhaliherye okhala muthiyana ooloka. Moohipisa, iyaka ni miyo, naanisoma Nuulumo na Muluku hoothe”.

Nuulumo na Muluku ninhimya so: “Ole othenle ohana omphenta mwar’awe ntoko erutthu awe”. (aÉfeso 5:28) Sumiatun onihimya wira: “Wiixutta masu ala woonikhaliherya oowanli ahu. Nto okathi iyaka aaphiya awe owaani okhumaka omutekoni, kaaninvaha exa ni omulavuliha mooreera murima. Nave, iyaka aanikiphenta vanceene ni okikhaliherya ovara miteko sa vatthokoni. ‘Nanirerelana murima ni omorelana ikharari mukina ni mukhw’awe, nilevelelanaka’. (aÉfeso 4:32) Nto ophentana wahu ni ottittimihana waaninnuwa. Vano soovira iyaakha 40 nirine ene etthoko yoohakalala. Tthiri, miruku sooloka sa Nuulumo na Muluku sookhaliherya etthoko ahu!”

Tayib onihimya wira: “Miyo kaari mutthu oowaakuva onanariwa. Kaaniwana vanceene ni kaaniwoopopiha atthu ni kapwitthi. Nave-tho, kaanaamana amwaaraka, Kustriyah, mpakha waavulaliha. Atthu anceene yaanikoova.

“Masi, nihiku nimosa, kaahisoma masu a Yesu ani: ‘Kinovahani nikano na nanano: mphentaneke mukina ni mukhw’awe. Sisale miyo kophentalyakani’. (Yohani 13:34) Masu awo yaahikivara murima, ni yaahikiiriha ohiya mweettelo aka wa khalai. Okathi kaapaceryaka onanariwa, kaaninvekela Muluku wira okikhaliherye okhala oomaala. Nto onanariwa iwe waanimala. Miyo ni amwaaraka naahivarihela muteko miruku sa yoolepa ya aÉfeso 4:26, 27, enihimya so: ‘Onanariwa wanyu omaleke vahinatthi wila. Muhinvahe opuro Satana’. Nto naanisoma Nuulumo na Muluku ni ovekela hoothe khula ohiyu. Opaka eyo waanimaliha mixankiho sahu, ni onikhaliherya ophentana vanceene.

“Vano kinisuweliwa okhala mulopwana a murettele. Amwaaraka ni anaaka annikiphenta ni okittittimiha. Kookhalana axipatthani anceene, ni kinoona wira koomwattamela Muluku. Tthiri, kamulopwana oohakalala”.

Goin onihimya so: “Miyo kaaneetta ni egrupu ya anaamiravo oomwareya, kaanimpaha soona, nto ikwaha sinceene kaanihapaliwa ni omora mphironi ohiyu. Nave-tho, kaanirumeela ni otumiha mirette soohapala, ntoko esuruma ni ecstasy, seiyo kaavitha aka mukasakoni mwaka yaahaavolowa ebaala. Masi, nnaamwi kaari ntoko mutthu oowoopiha, miyo kaari mutthu owoova.

“Mutthu mmosa, aahikooniherya yoolepa ela: ‘Mwan’aka, muhiliyalé ikano saka . . . Ikano iyo sinimunjereriha mahiku anyu: sinimovahani ekumi yorera ni  murettele’. (Miruku 3:1, 2) Tthiri, miyo kaaniphavela ekumi yooloka ni ya murettele! Nave-tho, kaahisoma yoolepa eni: ‘Axinn’aka òphentiwa! Okhala wira ninniroromela wakhela sorera iya, nrapihe sonanara sothene s’erutthu ni s’eroho: niphaveleke omaleliha exariy’ahu nimuttittimihaka Muluku’. (2 aKorinto 7:1) Nto kaahihiya orumeela mirette soohapala, weetta ni egrupu ya atthu oomwareya, ni khupacerya omurumeela Muluku.

“Vano, soovira iyaakha 17 kihinirumeela aka mirette soohapala. Nto kookhalana ekumi yooloka, etthoko yoohakalala, apatthani eekeekhai, ni yowuupuxerya ya murima yooloka. Vano, ohiya orupa mphironi mwaha woohapaliwa, kinirupa owaani vakhaamani vaka”.

Bambang onihimya so: “Okhuma emiravo aka, miyo kaari mutthu ootakhala. Nto atthu anceene kaawiirela aka itthu sootakhala yaari a nihimo naamukhaani nenlo kaanyokha aka.

“Masi, kaahipacerya omphavelasa Muluku. Nto kaahiphwanya egrupu emosa yaasoma Nuulumo na Muluku. Egrupu eyo yaari yeele kaanyokha aka. Masi yaahikakheela oratteene! Nave-tho, kahoona wira egrupu ele yaahikhala atthu a maloko oovirikana, masi yaari oowiiraana ni oohakalala. Eyo yaahikitikiniha! Nto kaahisoma yoolepa enihimya so: ‘Muluku khanathanla atthu. Tthiri Muluku onnaphenta atthu a nloko ti nloko, yale animuttitimiha, enettela exariya’.—Miteko 10:34-35.

“Olelo-va, koohiya waanyokha atthu. Eriyari ya apatthani aka ooloka, akina ta nloko nenle khalai kaanyokha aka. Nuulumo na Muluku, nookiixuttiha waaphenta atthu otheene”.

Garoga onihimya so: “Nlelo kiryeene mwammiravo, kaahitthukweliwa ikwaha tthaaru: vanli mwaha wa wiiya, omosa mwaha wa omuhoma mutthu mootakhala ni mwaalo. Muhoolo mwaya, kaahipacerya weetta ni egrupu ya atthu oomwareya, ni kaahiwiiva atthu anceene. Nuumala ekhotto, kaahikhala muhooleli a egrupu yaawoopopiha atthu  ni owiiyerya. Nave, khula okathi keetta ni maguardakosta. Nto kaari mutthu ootakhala ni owoopiha.

“Nihiku nimosa, kaahisoma yoolepa eni: ‘Ole omphenta . . . khonakhalela nrima [akhwaawe]; khonìvuwiha, khonìkuxererya. Ole omphenta onalemeliha akhw’awe, khomphavela murerelo awe, khoniviruwa, khonupuwela sotakhala sìreliwawe’. (1 aKorinto 13:4, 5) Masu awo yaahikivara murima. Nto kaahithaamela muttetthe mukina, kaahisoma Nuulumo na Muluku, ni khuvarihela muteko mookumini mwaka.

“Vano miyo nkihiyo ootakhala-tho. Nto ohiya opaka itthu sootakhala, vano ka mutthu oottittimihiwa oniixuttiha Nuulumo na Muluku. Okumi aka vano ti woohakalala ni wooreera”.

Matakiheryo ala ni makina, annooniherya wira “masu a Muluku ti makumi: awo t’òwerya”. (aHéberi 4:12) Malakiheryo aya tookhweya, oovareleya muteko, ni ooloka.

Niireke Nuulumo na Muluku nnoowerya wookhaliheryani? Tthiri, nnoowerya wookhaliheryani khuta muxankiho munirowa anyu okhalana. “Solempwa sothene supuxeriwé ni Muluku, khukhalihiwa wira sixuttiheke ekekhai, savanyiheke ale anvonya, sattaruxeke ale anttheka, siwettiheke atthu ephiro ya xariya. Siso, mutthu a Muluku onolikanyihiwa murohoni mwawe, onolipiheriwa ovara miteko sothene sorera”.—2 Timótheyo 3:16, 17.

Nto, nrowe nithokorerye sowiixuttiha sikina sa Nuulumo na Muluku.