NUULUMO na muluku ninnihimya mikhalelo sinceene sa Muluku, seiyo sinnikhaliherya omusuwela. Mwa ntakiheryo, ninniromola mikhalelo mixexe suulupale sa Muluku: owerya, exariya, miruku, ni ophenta. Nrowe nithokorerye mikhalelo iya.

Yehova aahimuleela Abrahamu wira: “Miyo ka Muluku òwerya sothene”. (Maphattuwelo 17:1) Owerya wa Muluku ti wuulupalexa, ni woohimala. Orumeelaka owerya wawe, Muluku oopattuxa olumwenku wotheene.

Muluku khonirumeela moohiloka owerya wawe. Okathi wotheene onnirumeela mooreerela wira opake yootthuna awe. Owo onnirumeela owerya wawe moovarihana ni exariya, miruku, ni ophenta.

Yehova onnirumeela owerya wawe wira aakhaliherye arumeyi awe oororomeleya. “Apwiya anniweha ilapo sothene wira yakhaliherye ale anaroromela ni murim’aya wothene”. (2 Wahala 16:9) Niireke nyuwo khamunisiveliwa ni Muluku yoowo ori oowerya, masi-tho onnithokorerya?

‘Muluku onniphenta’ exariya. (Esalimo 37:28) Okathi wotheene onnipaka itthu sooloka ni sa exariya moovarihana ni malamulo awe oomalela.

Muluku onninyokha ohixariya. Owo ‘khorina nthalu ni khonàkhela makhwankwa’. (Otumererya 10:17, Bibliya Exirima) Muluku onaanyokha ale anaahaaxa akhwaaya ni onnaakhaliherya ale anihaaxiwa, waahela muhina “anamukhweli ni anamwane èkwasuni”. (Okhuma 22:21) Muluku onnaathokorerya atthu otheene voohinthalu. “Muluku khanathanla atthu. Tthiri Muluku onnaphenta atthu a nloko ti nloko yale animuttittimiha, enettela exariya”.​—Miteko 10:34, 35.

Exariya ya Yehova ti yoomalela. Owo khonihiyererya itthu soohiloka, masi-tho toopixa murima. Owo onnaahukhumu anamattheka ahinittharuwa, masi onnaamorela ikharari ale anttharuwa. “Apwiya t’òmoriwa ikharari ni t’òkhupanyerya: t’òpisa onanariwa ni t’òroromeleya. Khannyesererya owulumela atthu: khanaviruwela atthu wa mahiku othene. Khannìrela hiyo siso simphwanelahu: khannilivela sotakhala mwaha wa itampi sahu”. (Esalimo 103:8-10) Nave-tho, Muluku onnuupuwela ni otthuvela miteko sooreera sa arumeyi awe oororomeleya. Tthiri, vannireerela omuroromela Muluku a exariya ntoko owo.

Miruku sotheene sinikhuma wa Yehova. “Ankhili awe n’usuwela wawe ti wulupale”. (aRoma 11:33) Miruku sawe ti soohilikana ni soohimala.

Miruku sa Muluku sinnooneya orweela wa itthu sipattunxe awe. Nasaalimo aahiipa so: “Apwiya! Miteko sanyu ti sowatta! Elapo yosareya itthu sipattuxalyanyu: nyuwo mopaka sothene seiyo n’ankhili”.—Esalimo 104:24.

Nave, vaavo ninsoma ahu Nuulumo na Muluku ninnoona miruku sawe. Mwene Davidi aalempe so: “Molumo Àpwiya t’òroromeleya: annavaha miruku atthu òwiyeviha”. (Esalimo 19:8) Nkahaya muupuwele: nyuwo munoowerya ottottela mureerelo miruku sihinimala sa Muluku! Niireke munoottottela muraarelo eparakha eyo?

Mukhalelo muulupale wa Muluku ori ophenta. Nuulumo nawe ninhimya wira: “Muluku ophentá”. (1 Yohani 4:8) Nto, owo onnipaka itthu sotheene mwa niphento.

 Muluku onnooniherya oniphenta wawe mwa inamuna sinceene. Owo onnivaha itthu sooloka. Owo “onnorupihelani epula, onnovahani sohepha okathi aya, onnoruwerihani solya, onnosarihani otteliwa murima”. (Miteko 14:17) Mwekeekhai, “eparakha yothene yophaveleya ni sovahiwa sothene sorera sinkhuma osulú: sinnikhuruwa w’Atithi, yawo apattunxe itheneri”. (Yakobo 1:17) Orumeelaka Nuulumo Nawe, nenlo niri yoovaha yooreera, Muluku onninleela ekeekhai awe, ni oniixuttiha malamulo ni malakiheryo awe. Yesu aavekenle so: “Ekekhai iyo ti nulumo nanyu”.​—Yohani 17:17.

Nave-tho, Muluku onninikhaliherya okathi wa mixankiho. “Mwareye Apwiya muritti anyu: awo t’aniwemexani: awo khanamuhiye naxariya akwattuliwaka”. (Esalimo 55:23) Owo onnilevelela soottheka sahu. “Apwiya! Nyuwo mòrera murima ni òlevelela, òsareya othunku w’ale othene anovekelani”. (Esalimo 86:5) Ohiya-vo, onninivaha yoolipelela ya ekumi ehinimala. “Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”. (Wisupulula 21:4) Niireke nyuwo munomphenta Muluku?

Muluku oniphavela wira mmusuwele saana. Nuulumo Nawe ninhimya so: “Mmwattameleke Muluku: Muluku onowattamelani”. (Yakobo 4:8) Muluku aahimuhimya profeta Abrahamu okhala ‘mpatthani awe’. (Yesaya 41:8) Nto Yehova oniphavela wira nyuwo mukhale mpatthani awe.

Akhala wira munoovikaniha wiixutta voohimya sa Muluku, nyuwo munoomwaattamela Muluku ni munoohakalala vanceene. “Òreriwa t’ale ansiveliwa n’ikano s’Apwiya antthokelela ikano iyo othana n’uhiyu”. (Esalimo 1:1, 2) Tivonto, nvikaniheke osoma Nuulumo na Muluku. Muupuweleleke mikhalelo ni miteko sa Muluku. Mooniherye wira munnimphenta Muluku mweettelaka ele muniixutta anyu. “Nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”. (1 Yohani 5:3) Nvekeleke ntoko nasalimo wira: “Apwiya! Mukixuttihe iphiro sanyu: mukòniherye miphito sanyu. Mukixuttihe wettela ekekhai anyu”. (Esalimo 25:4, 5) Mwiira siiso, munooweha wira “Muluku khankhala ottaiwene ni hiyo”.​—Miteko17:27.