YEHOVA ohinatthi opaka elapo, aahipattuxa malaikha wiirimu. Masi, nuuvira okathi munceene, nlaikha nimosa naahiphavela okokhoreliwa weiwo ori paahi wa Muluku. Mwaha wa nrima, owo aahiipaka okhala Satana, onitaphulela “Munyokhani”, eyo piiyo, munyokhani a Muluku. Moota xeeni Satana ohimwiiwelenle awe Muluku?

Arumeelaka enowa, Satana aahimwiiriha Eva ohimwiiwelela Muluku. Orumeelaka olavilavi, owo aahihimya wira Yehova aakhoottiherya etthu yooloka vaavo aahimyale awe wira Eva ehilye muhokorokho mmosa. Owo aahimuhimya Muluku okhala nawoothe, nto khuhimya wira Eva aahaana ohimwiiwelela Muluku. Satana aahimyale so: “Muluku orosuwela wira nihiku ninkelanyu olya, maitho anyu anotthukuwa, nyuwo munokhala ntoko Muluku, musuwelaka oreriwa n’utakhaliwa”. (Maphattuwelo 3:5) Eva aahikupali wootha wa Satana. Siiso aahithanla ohimwiiwelela Muluku ni khumwiiriha Adamu ovara etthu emosaru. Nto okhuma vaavo, Satana, munyokhani a atthu othene arina waamini wekeekhai. Nto owo onnivikaniha waawoka atthu mpakha olelo-va. Moota xeeni?

Satana aahaarumeela amuluku eethiru ni soolema sa atthu wira aahapuxe aYuda. Yesu, Mesiya, aahaahimeerya ahooleli a itiini wira olompa waya khiwaarina efaita mwaha woowi yiixuttiha “soruma s’atthu pahi”. (Matheyo 15:9) Vaavo aYuda yaamukhoottale aya Mesiya, nto Muluku aahaakhootta. Yesu aahaaleela wira: “Munimwakhiwa omwene wa Muluku. Anovahiwa atthu a nloko nikina, antthuna wimiha mihokorokho s’omwene yola”. (Matheyo 21:43) Vano, awiixutti a Yesu yaahikhala atthu oophentiwa ni Muluku.

Nuumala-vo, Satana aahiphavela waahapuxa awiixutti a Yesu. Niireke wira owo ookhumela saana? Orumeelaka nlikanyiho, Yesu aahihimya ele yaarowa wiiraneya. Owo aahimyale wira, mulopwana mmosa aahaala etiriku yooloka mmatta mwawe. Nuuvira okathi, nwanani khurwa ni khwaala nthakathaka variyari va etiriku. Vano, khweemererya wira sinnuwe vamosa mpakha okathi woohepha. Nto etiriku yaahipwehiwa opuro mukina vano nthakathaka khupahiwa. Masi etiriku yaahisukiwa mmuruttuni.

Moottharelana, Yesu aahaataphulela awiixutti awe etthu yaahimya aya nlikanyiho nle. Owo aahaaleela wira owo taari Mulipa oowaala. Nto aahivikaniha iiraka: “Epyó yorera t’ale anettela omwene wa wirimu. Nthakathaka t’ale animwettela Mutakhali. Nwanani onàla epyó eyo yonanara ti Satana yowo. Okathi w’ohepha, ti nihiku n’omala olumwenku. Alipa-òhepha, malaikhá orera”. (Matheyo 13:38, 39) Yesu aahaalikanyiha awiixutti awe ekeekhai ntoko etiriku. Masi Satana ahaakumiherya maKristau owootha, ntoko nthakathaka eriyari ya awiixuttihi a Yesu. Ntoko Yesu aahimmya awe, nuuvira iyaakha sinceene, yaahikhumelela maKristau owootha. Awosa yaahikumiherya sowiixuttiha soowoka ntoko amuluku araru, muupuwelo woowi aakhala atthu araru orweela wa Muluku mmosa paahi. MaKristau owootha yaahipacerya walompa amuluku ethiru ni wiirela  mpantta epoliitika. Masi, atthu vakhaani paahi ti yaavikaninhe otthara sowiixuttiha sa Yesu.

Yesu aahihimya wira wamphiya okathi waarowa aya wooneya waamini wekeekhai. Malaikha a Muluku, yaarowa waavalaanya atthu yaale yahaarowa okhalana waamini wekeekhai wira apwetexiwe. Nto vaarowa okhala vookhweya waasuwela ale arina waamini wekeekhai. Wanikisa waya, Satana munyokhani muulupale, aarowa onyaanyiwa. Tthiri, waamini wekeekhai waarowa oxintta!

Masi munrowa waasuwela sai ale arina waamini wekeekhai olelo-va? Ninrowa othokorerya nikoho nlo muru onittharelana.