NUUVIRA iyaakha 500 vaavo profeta Daniyeli aahimmya awe orwa wa Mesiya, nlaikha na Muluku Gabriyeli naahimukhumelela mwali mmosa iitthaniwa Maria, yoowo aari osuulu wa Mwene Davidi. Nlaikha Gabriyeli naahimuleela wira: “Mutteliweke murima, nyuwo mophentexiwa ni Muluku: Apwiya ari ni nyuwo”. (Luka 1:28) Masi, Maria aahoova. Exeeni yaamwiirinhe Gabriyeli omulavuliha Maria moota yoole?

Nlaikha naahimuhimeerya wira: “Maria, muhové: Muluku ohojanliyani. Vekekhai, munorupala, mmuyare mwana mwamulopwana, yowo onrowanyu onvaha nsina na Yesu. Apwiya Muluku anonvaha omwene wa Davidi, tithi awe.  . . . Nave omwene awe khummala-tho”. (Luka 1:30-33) Tthiri, iya saari Ihapari sooreera! Maria aarowa omuyara Mesiya, “osulu” yoole aalipeleliwa okhuma khalai!

Mwaakha waattharelana, Yesu aahiyariwa oBethelehemu. Nlaikha nimosa nahaaleela amakampusi yaari muttetthe yoole ohiyu niiraka so: “Muhòvé! Koruhenleni ehapari yorera, enrowa wahakalaliha valupale atthu othene. Olelo, muttetthe wa Davidi, moyareliwa Mòpoli, okhanle Kristu Pwiya”. (Luka 2:10, 11) Muhoolo mwaya, emusi ya Yesu yaahithaamela oNazarethi, weiwo aahuuwale awe.

Mwaakha wa 29 EC, okathi Mesiya aarowa awe ophiya ntoko vaahimmwale aya, owo aahipacerya orumeela ntoko profeta a Muluku, vaavo “arina [awe] iyakha miloko mirarú”. (Luka 3:23) Atthu anceene yaahikupali wira owo aarummwale ni Muluku. Nto awo yaanihimya wira: “Ònikhumelela hiyo profeta mulupale”. (Luka 7:16, 17) Masi exeeni Yesu aixuttiha awe?

Yesu aahiwiixuttiha atthu omphenta ni omulompa Muluku: Owo aahihimya wira: “Apwiya, Muluku ahu, t’Apwiya amosaru. Vano, mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene”. (Marko 12:29, 30) Owo aahihimya tho: “Mwakokhorele Apwiya, Muluku anyu: mwattittimiheke yawo pahi”. (Luka 4:8)

Yesu ahaatumererya atthu ophentana mukina ni mukhwaawe: Yesu aahimyale so: “Mwaphenteke akhw’inyu ntoko sinìphentanyu”. (Marko 12:31) Nave-tho, aahihimya wira: “Sothene sinosivelani wireliwa n’atthu akina, nyuwo-tho nwireleke seiyo akhw’inyu: tthiri, ti siso sinrumaya  ikano sa Moise ni sa maprofeta”.​—Matheyo 7:12

Mooluttuweliwa Yesu aanaahimeerya atthu akina Omwene wa Muluku: Owo aahimyale so: “Kihana olaleya Ehapari Yorera y’omwene wa Muluku mittetthe sikina-tho: p’itthu kirwenlyaka”. (Luka 4:43) Xeeni Omwene wa Muluku orya aya wootthuneya?

Nuulumo na Muluku ninxuttiha wira Omwene wa Muluku, eguvernu ya wiirimu enrowa olamulela elapo ela. Yesu, Mesiya, tothanliwe ni Muluku wira okhale Mwene. Profeta Daniyeli aahihimya wira wiirimu Muluku aarowa onvaha Mesiya “owerya n’uttittimihiwa n’umwene”. (Daniyeli 7:14) Omwene owo, onooruuha eParayiisu valaponi ni waareeliha arumeyi awe avahaka okumi ohinimala. Tthiri, iyo ihapari sootepexa oreera!