1, 2. (a) Maria uulumihiwe sai ni muletto? (b) Moota xeeni okathi ole waari aya wootthuneya wa Maria?

MARIA aahixanka okathi vapuwani vawe aaphiyale awe muletto. Muletto ole khaaphavela olavula ni anamuyari a Maria. Masi, aaphavela olavula ni Maria! Nto Maria aanisuwela wira muletto ole khahiyo ari muNazarethi. Maana epooma ele yaamukhaani, vaanikhweya omusuwela muletto. Tivonto muletto ole aari oovirikana ni atthu ale. Vano masu awe wa Maria yaari-tho eeletto, aahimyale so: ‘Mutteliweke murima, nyuwo mophentexiwa, Yehova ori ni nyuwo’.—Mmusome Luka 1:26-28.

² TisiisoBiibiliyaonimusuwelihaaweMaria,mwaanaaEli,aepooma ya oNazarethi, oGalileya. Ola waari okathi wootthuneya wa Maria. Aari muthiyana oowaakameliwa ni Yosefe, kalapintero yoowo aari mulopwana oohithaaciri, masi oowaamini. Nto pooti wira aahilokiherya muupuwelo awe othanlaka okumi woohiixaattiherya itthu, wira amukhaliherye iyawe Yosefe ni waahuwa anamwane aarowa awe waayara. Masi voohipisa, nuumala oxukuriwa aahivahiwa ni Muluku, muteko muulupale, eparakha yaarowa orukunuxa okumi awe.

3, 4. Wira nimusuwele Maria itthu xeeni sinivekeliwa ahu oliyala nto niphaveleke osuwela exeeni?

³ Anamunceene annitikhina mwaha woohiromoliwa nsina na Maria ipantte sinceene sa Biibiliya. Khonihimya itthu sinceene sa mahuweliwo, omutthu awe, ni khonihimya hata vakhaani makhalelo a erutthu awe. Masi, itthu sinihimmwa mBiibiliyani sinnooniherya itthu sinceene voohimya sa Maria.

⁴ Wira nimusuwele saana Maria, nihaana oliyala itthu soohikhalela sinilavuliwa ni itiini sinceene voohimya sa Maria. Nto nihaana oliyala ilatarato sinceene sa Maria siri muliivuruni, sipakiwe ni maluku maarmore, wala ni itthu sikina. Nihaana-tho oliyala sowiixuttiha soovila wiiwexexa ni soolema sa atthu aninvaha aya Maria masina ntoko ala: “Maria Maama Awe Muluku”; wala “Pwiyamwene a Wiirimu”. Nto niphavele osuwela ele Biibiliya eniixuttiha awe tthiri, voohimya sa Maria. Soolempwa sinninikhaliherya wiiwexexa waamini wa muthiyana ola ni moota woomutakihae.

5. (a) Exeeni eniixutta ahu enamuna Maria soonenle awe oxukuriwa wawe ni Gabriyeli? (b) Nniixutta xeeni mwa yowiiraneya ya Maria?

⁵ Maria khaaxukuriwe ni mutthu pure. Maana naari nlaikha  Gabriyeli. Okathi nlaikha nno naamwiitthanne aya Maria wira: “Mutteliweke murima, nyuwo mophentexiwa”. Maria “ahituthuwa”, khumukoha etthu yaataphulela aya masu ale oohilimaleleya. (Luka 1:28) Ophentexiwa ni pani? Maria khaalipelela othokoreriwa siisaale ni apinaatamu. Masi nlaikha nle naalavula sa ophentiwa ni Yehova Muluku. Etthu yeeyo Maria oonaa weokhala yootthuneya. Masi khoona wira aaniphwanela eparakha eyo. Namananiha okhalana wataana wooloka ni Muluku, khannirowa woonaka wira yooniphwanela eparakha eyo, masi ninrowa wiixutta etthu emosaru yaaxuttale awe mwali Maria. Wira Muluku onnaakhootta ale oowiisoona, masi onnaareerela murima oowiiyeviha.—Yak. 4:6.

6. Nlaikha nanvahale eparakha xeeni Maria?

⁶ Tthiri vaanireerela Maria okhala oowiiyeviha, maana nlaikha naahinvaha eparakha yuulupalexa. Nlaikha nno naahimuleela wira ammuyara mwaana aarowa waakhaliherya apinaatamu otheene. Gabriyeli aahimyale so: ‘Apwiya Muluku anonvaha omwene wa Davidi, tithi awe. Owo onimwettiha vohimala-tho nloko na Yakobe, nave omwene awe khummala-tho’. (Luka 1:32, 33) Tthiri Maria aahisuwela yoolaiherya ya Muluku wa Davidi yaapakiwe iyaakha 1.000 saavirale, wira mmosa mwa osuulu awe aarowa olamulelaka okathi wotheene. (2 Sam. 7:12, 13) Nto mwanawe aarowa okhala Mesiya, yoowo atthu a Muluku yaamulipelela aya iseekulu sinceene!

7. (a) Nikoho naapanke awe Maria nnooniherya exeeni voohimya sa yena? (b) Exeeni eniixutta aya amiravo a mahiku ala voohimya sa Maria?

⁷ Ohiya-vo, nlaikha naahimuleela wira mwaana owoaarowa okhala ‘Mwana a Muluku Mulupalexa’. Nto vaarowa oweryaneya sai muthiyana ola omuyara Mwaana a Muluku? Nave vaarowa oweryaneya sai Maria omuyara mwaana nlelo ahitheliwe? Maana uuriiwe ni Yosefe. Tivonto aakohale awe so: “Vanrowa wiraneya sai sihimyalyanyu, miyo kihimusuwelaka mulopwana?” (Luka 1:34) Moone wira Maria khuuleliwe muru ohimya wira khonarupe ni mulopwana. Masi hata vari siiso, aari muthiyana oowiisumaaliha. Mahiku ala, amiravo anceene waasivela orupihana woohiloka nto annaanyohola ale anikhootta. Tthiri olumwenku woovirikana. Masi Yehova khovirikanne. (Mal. 3:6) Ntoko mahiku a Maria, Yehova onnisiveliwa ni atthu arina mweettelo wowiisumaaliha.—Mmusome aHéberi 13:4.

8. Vanaamwi Maria aari mutthu oohimalela, aarowa owerya sai omuyara mwaana oomalela?

⁸ Nnaamwi Maria aari murumeyi oororomeleya a Muluku, khahiyo wira aari mutthu oomalela. Nto vaarowa oweryaneya sai omuyara  mutthu oomalela, ntoko Mwaana a Muluku? Nlaikha Gabriyeli naahimutthokiherya wira: “Eroho Yowarya enimokhuruwelani, owerya wa Muluku mulupalexa onimohuruwelani n’iruku aya. Tivó Mwana onrowanyu omuyara onokhala òwarya, onimwihaniwa Mwana a Muluku”. (Luka 1:35) Waarya onitaphulela “oratta”, “oloka”, ni “ethanleliwe muluku”. Okhala wene, apinaatamu annaaraviha anaaya itampi ni ohimalela. Nto mwaha wa yeeyo Yehova aarowa opaka mutikiniho a vameekhaaya. Owo aahithaamiha okumi wa Mwanawe wiirimu oroihaka mmirimani mwa Maria, nuumala-vo aahirumeela ikuru sawe soowerya, aahiiso munepa awe wootteela wira ‘omukhuneele’ ni omwaakiherya mwaana ole wira ohiravihiwe etampi. Masi niireke Maria aahikupali yoolaiherya ya nlaikha nle? Nto oonenle sai yooleiherya eyo?

9. (a) Xeeni atthu ahinimukupali Muluku vanaavila aya okupali etthu yaamwiiranenle Maria? (b) Gabriyeli aalipinhe sai waamini wa Maria?

⁹ Atthu ahinimukupali Muluku, waahela muhina asomi a eKristau Yoowootha, anihimya wira muthiyana ohinarupe ni mulopwana khivaniweryaneya oyara. Hata aryeene atthu oosomexa, khaniwerya wiiwexexa ekeekhai yootepexa okhweya. Ntoko saahimmye awe Gabriyeli: “Vekekhai, khivo etthu Muluku enojelawe”. (Luka. 1:37) Maria aahikupali masu a Gabriyeli, okhala wira aari mutthu owaamini. Masi khahiyo waari waamini pure. Ntoko mutthu onuupuwela vookhalela, Maria aaniphavela osuwelexa etthu yaarowa omukupaliha masu ale. Gabriyeli aari oolikane ene wira omukhaliherye Maria osuwelexa etthu yaarowa omukupaliha. Gabriyeli aahilavula sa Elizabeti, mmusi awe Maria yoowo aamusuwela awe okhuma khalai ntoko muthiyana ahaayara. Muluku aahipaka mutikiniho wira Elizabeti arupale!

10. Xeeni eparakha yaavahiwe awe Maria yaamwiiriha aya woova?

¹⁰ Nto Maria aarowa opaka exeeni? Owo aahikhalana muteko waatthuneya awe waakhwaniherya ni aahoona wira Muluku ammukhaliherya ntoko saatthokiheriwe awe ni Gabriyeli. Masi nihuupuweleke wira eparakha ele khiyaarowa omukumiherya woova hata mixankiho. Mwaha woowi aahuuriwa ni Yosefe. Niireke Yosefe aamweemya omuthela nuumala osuwela wira oorupala? Etthu ekina, pooti wira eparakha ele yaavahiwa awe yaari yowoopiha. Owo aarowa omukhapelela Mwaana yoowo aaphentexiwa vanceene ni Muluku, ovikana soopattuxiwa sotheene! Maria aahaana omukhapelela okhuma enamwane awe, elapo yeeyo yaari yoosareya atthu ootakhala. Aayo, waari muritti muulupale!

11, 12. (a) Arumeyi oororomeleya ni oolipa murima yoonihenrye sai woovelela muteko woovila yaavahiwe aya ni Muluku? (b) Exeeni Maria oonihenrye awe moota aakhunle awe nlaikha Gabriyeli?

 ¹¹ Biibiliya onnooniherya wira hata alopwana yaale yaari oolipa murima ni oowaamini, ikwaha sikina yahoovelela waakhela muteko woovila wa Muluku. Moise aahihimya wira khaawerya olavula saana, voophiyerya olavula ntoko namitthaka a Muluku. (Okhum. 4:10) Yeremiya aahihimya wira aari “mwanamwane”, mmiravo ahaarowa owerya ovara muteko ole Muluku aamurumale awe! (Yer. 1:6) Nave Yona aahitthyawa muteko aathanleliwe awe. (Yon. 1:3) Ankhi nto Maria?

¹² Masu awe oowiiyeviha ni oowiiwelela, annivaha ntakiheryo wa atthu otheene oowaamini. Owo aahimuleela Gabriyeli wira: ‘Miyo-va murumeyi a Yehova, yireyeke mwa miyo ntoko sihimmyanyu’. (Luka 1:38) Okhala wene, muthiyana murumeyi, aakhala epottha yoowiiyeviha, maana ekumi awe yaalipa ni pwiyawe. Owo taari moonelo wa Maria voohimya sa Pwiyawe, Yehova. Nave aanisuwela wira aalipa ni Yehova, maana Yehova onniroromeleya waale animuroromela, nto aarowa omureeliha okathi Maria aarowa awe ovaraka saana muteko ole woovila.—Esal. 18:26.

13. Akhala wira ninnoona ovila, wala oxankiha ovara ele Muluku ennivekela awe, ninrowa omutakiha sai Maria?

¹³ Ikwaha sikina, Muluku onninivekela opaka etthu yeeyo enoona ahu ovila aahiiso oxankiha. Masi Nuulumo nawe, ninnooniherya wira nihaana omuroromela wira onoonikhaliherya, ntoko Maria. (Mir. 3:5, 6) Niireke nnoowerya? Napaka eyo, onoonitthuvela ni olipiha waamini wahu.

14, 15. (a) Yehova aamureelihale sai Maria okathi aaronwe awe omuxukurya Elizabeti ni Zakariya? (b) Masu ari va Luka 1:46-55 anooniherya exeeni wa Maria?

¹⁴ Masu a nlaikha Gabriyeli voohimya sa Elizabeti, yaari ootthuneya saana wa Maria. Niireke aahikhala muthiyana valaponi aakhanle oomwiiwexexa saana Maria? Tivonto Maria aahivenya voowakuveya orowaka omwaako muttetthe wa oYudeya, eettaka mahiku mararu wala maxexe. Okathi aaphiyalya awe vapuwani va Elizabeti ni Zakariya, mulipa a mukuttho, Yehova aahimooniherya itthu sikina saarowa olipiha waamini wawe. Nuumala Maria omukhomasa Elizabeti, mwaana aari mmirimani mwa Elizabeti aaheeteteya voohakalala. Elizabeti aahisareya munepa wootteela nto khomwiitthana Maria okhala “ame aya Apwiya”. Muluku aahimooniherya Elizabeti  wira mwaana a Maria aarowa okhala Pwiya, wala Mesiya. Ohiya-vo, owo aahuupuxeriwa wira omuttottopele Maria mwaha wa wiiwelela wawe woororomeleya, oriki: “Moreriwa nyuwo, mana muhamini”. (Luka 1:39-45) Tthiri, itthu sotheene Yehova saamuleihenrye awe Maria sahiiraneya!

¹⁵ Nuumala-vo, Maria aahilavula, nto masu awe aakhapeleliwa saana mBiibiliyani. (Mmusome Luka 1:46-55.) Okhala wene awo tari moolumo ooteepexa orakama a Maria, alempwale mBiibiliyani, nave annooniherya itthu sinceene voohimya sa Maria. Anooniherya oxukhurela wawe, osiveliwa ni omuttottopela wawe Yehova mwaha wonvaha eparakha ele ya omuyara Mesiya. Nave masu awe, annooniherya  waamini wawe woolipa, vaavo onimuhimya awe Yehova wira onnaakhootta ale oowiisoona, ni oowerya, masi onnaareerela murima ale oowiiyeviha ni oohaawa animurumeela. Annooniherya-tho moota saasuwela awe itthu. Okontarela vanooneya wira, Maria aahiromola ikwaha 20, Soolempwa sa eHeeberi! *

16, 17. (a) Mweettelo xeeni nintthuneya ahu otakihaka yoowo wooniheriwe ni Maria ni mwanawe? (b) Sinniixuttiha exeeni itthu siiraneyale okathi Maria aamuxukurya awe Elizabeti?

¹⁶ Vannooneya wira Maria aanuupuwelela vanceene Nuulumo na Muluku. Nto owo aanivikaniha wiiyeviha, ophavelaka paahi olavula moovarihana ni Soolempwa ohiya opaka itthu suupuwela awe. Mwaana annuwa mmurimani mwawe, aarowa okhalana mukhalelo mmosaru oowi: “Mwixuttiho aka khuhiyó wawaka: onkhuma wa Muluku òkirumme”. (Yoh. 7:16) Ti vooreera wiikoha so: ‘Kiireke kinnooniherya nttittimiho nimosaru ni wiiwelela kiroromelaka Nuulumo na Muluku? Wala kiireke kintthara muupuwelo aka ni mwiixuttiho aka?’ Maria aahikhalana tthiri mweettelo wooloka.

¹⁷ Owehasa wene Maria aahikhala myeeri miraru ni Elizabeti, okhaliheriwaka ni olipihiwa vanceene. (Luka 1:56) Moolumo oolipiha ari mBiibiliyani voohimya sa oxukurya wa Maria, annuupuxerya mareeliho anikhala mwaha wa opatthani wooloka. Akhala wira apatthani ahu annimphenta Yehova Muluku, nto nnoolipa omunepani ni otepa omwaattamela Yehova. (Mir. 13:20) Vano waahiphiya okathi wira Maria otthikele owaani. Etthu xeeni Yosefe aarowa awe ohimya nuumala osuwela ehaali ele?

18. Maria aamulenle exeeni Yosefe, nto Yosefe oonenle sai?

¹⁸ Owehasa wene Maria khaalipelenle wira erukulu awe yooneye. Tthiri aahaana omuleela Yosefe ehaali ele. Woonasa wene, ohinatthi omuleela, Maria aaniikoha moota Yosefe mulopwana aamoova Muluku, saarowa awe woonela nuumala omuleela. Hata vari siiso, owo aahirowa omuleela sotheene saamukhumelenle. Ntoko sinuupuwela anyu, Yosefe aahixanka vaalupale. Yosefe aaphavela omukupali mwali ole aatepa awe omphenta, masi vaakhala ntoko wira Maria aarooraruwa. Biibiliya khonihimya etthu Yosefe uupuwelela awe. Masi onnihimya wira aahimpaka palano wira omwalane ni Maria okhala wira okathi ole, atthu yuuryana, yooniwa okhala ntoko atthu oothelana. Hata vari siiso, Yosefe khaaphavela omuulihiha muru Maria, tivonto aathanlale awe omwalana voohisuweliwa. (Math. 1:18, 19) Moohaaniherya,  Maria aahixanka mwaha woomoona mulopwana ole ooreera murima, ohaawaka mwaha wa etthu yuupuwela awe yoohikhala yeeyo. Masi Maria khaathananne mwaha woohikupaliwa ni Yosefe.

19. Yehova aamukhalihenrye sai Yosefe opaka yoothanla yookhalela?

¹⁹ Voomureerela murima, Yehova aahimukhaliherya Yosefe opaka yoothanla yookhalela. Moolohani, nlaikha na Muluku naahimuleela wira orupala wa Maria wiiraneyale mwa mutikiniho. Tthiri eyo yaahimuhakalaliha Yosefe! Vano Yosefe aahipaka ntoko Maria saapakale awe wuupaceryani, nto khutthara malakiheryo a Yehova. Nto aahimukuxa Maria khukhala mwaarawe ni opaka sotheene saawerya awe wira omukhapelele Mwaana a Muluku.—Math. 1:20-24.

20, 21. Ale athelanne ni anuupuwela othela ahaana wiixutta exeeni wa Maria ni Yosefe?

²⁰ Ale athelanne vamosa ni ale anuupuwela othelana, aahaana wiixutta etthu yooloka wa anamathelana ala amiravo yaawo yaakhanle iyaakha 2.000 sivinre. Okathi Yosefe anweha awe mwaarawe ole ovaraka miteko sa vatthokoni, aanihakalala vanceene osuwelaka wira aalakiheriwe ni nlaikha na Yehova. Yosefe aahiweha otthuneya waya omuroromela Yehova okathi woopaka soothanla soovila. (Esal. 37:5; Mir. 18:13) Tthiri owo aahivikaniha okhalana muupuwelelo wooloka ni oreera murima opakaka soothanla ntoko muru wa etthoko.

²¹ Masi etthu xeeni ekhanle ahu oohimya sa Maria weemererya wawe otheliwa ni Yosefe? Vanaamwi Yosefe wuupaceryani vanvinle wiiwexexa sotheene siiraneyale, Maria aahiwehererya wira Yosefe opake yoothanla yaaphavela awe, maana taarowa okhala muhooleli a etthoko. Tthiri, Maria aahiixutta opixa murima, etthu yootthuneya wa maKristau athiyana a vano. Wuukiseryani, yowiiraneya ele yaahimwiixuttiha etthu Yosefe ni Maria, otthuneya waya ovaanela wekeekhai ni ororomeleya.—Musome Miruku 15:22.