1-3. (a) Exeeni yaamoopiha Estheri okathi aarowa awe olavula ni iyawe? (b) Makoho xeeni anirowa ahu othokorerya voohimya sa Estheri?

ESTHERI aari oomaaleleya orowaka empa ya mwene oSusa. Yaari etthu yoovila opaka. Khula etthu yaari opuro ole, yaapakiwe wira ewoopiheke atthu yaaweha, eyo yaahela muhina ikoore, ilatarato sa inyoompe saarina mapupha, mareetthe, ni akharamu ohela muhina ixiri suulupale saatekiwe ni maluku, nipuro nne naari vasulu va Mwaako Zagros, yoowo aakhuneliwe ni eneevi ni vaaniweryaneya woona maasi ooreera a muro Choaspes. Itthu iye sotheene saapakeliwe wira simuupuxeryeke khula mutthu munnuwelo ni okhulupale wa mulopwana ole aarowa awe olavulana Estheri, yoowo aihimya okhala “mwene muulupale”. Nave-tho aari iyawe Estheri.

² Iyawe? Tthiri Asuwero aari mulopwana ahaaphwanela omuthela muthiyana muYuda oowaamini ntoko Estheri! * Asuwero khaatthara sooruma saatthara awe Abrahamu, yoowo voowiiyeviha aakhulenle yooruma ya Muluku ya weemya moonelo wa mwaarawe, Sara. (Maph. 21:12) Mwene ole khaasuwela etthu voohimya sa Muluku a Estheri Yehova wala Malamulo Awe. Asuwero aasuwela malamulo a oPersia paahi, yaawo yaahela muhina nlamulo naakhoottiha etthu yeele Estheri yaarowa awe opaka. Etthu exeeni? Nlamulo nne naahimya wira khula mutthu aarowa okumana ni mwene a oPersia ohiitthaniwe, aahaana wiiviwa. Estheri khaitthaniwe, masi owo aaphavela olavula ni mwene. Okathi aattamela awe nipuro nne, nto khiyooniwa ni mwene ori veehiceni vawe, khino Estheri oona wira vano aarowa wiiviwa.—Mmusome Estheri 4:11; 5:1.

³ Exeeni yaamwiirinhe Estheri opaka etthu ele yowoopiha? Exeeni ekhanle ahu oowiixutta ni muthiyana ola oowaamini? Wanipacerya, ninrowa othokorerya etthu yaamwiirinhe Estheri okhala pwiyamwene a oPersia.

4. Estheri aahuuwale sai, ni xeeni aakhala awe ni munnawe Mardokeyo?

⁴ Estheri aahikhweliwa anamuyari awe. Hiyo khannisuwela itthu  sinceene voohimya sa anamuyari a Estheri yaawo yanvahale nsina noowi Hadasa, nuulumo na eHeeberi nintaphulela wira “murta”, mwiri wooreera orina eflori yootteela. Nuumala anamuyari awe Estheri okhwa, mmusi awe mmosa ooreera murima Mardokeyo, aahimoonela othunku mwaana ole. Mardokeyo aari munnawe muulupale a etthoko ekina. Owo aahimukuxa Estheri khumurowana vatthokoni vawe anamuthokorerya ntoko mwanawe.—Esth. 2:5-7, 15.

5, 6. (a) Mardokeyo aamuhunwe sai Estheri? (b) Mardokeyo ni Estheri yaakhala sai oSusa?

⁵ Mardokeyo ni Estheri yaari aYuda oovariwa yaakhala epooma yuulupale ya oPersia, woonasa wene awo yaaninyokhiwa vanceene ni ohasuliwa mwaha wa etiini aya ni Malamulo yaatthara aya. Masi Estheri aari oowiiraana vanceene ni munnawe oriki wiixutta itthu sinceene voohimya sa Yehova, yoowo ori Muluku oomoriwa ikharari aawooponle atthu awe khalai ni aarowa owoopola-tho. (Onam. 26:44, 45) Tthiri Estheri ni Mardokeyo yaaniphentana ni ororomelana vanceene.

⁶ Mardokeyo aanivara muteko wa ekhulupale vatthokoni va mwene oSusa, ni aamakela okilaathi vamukhora ni arumeyi akina a mwene. (Esth. 2:19, 21; 3:3) Nnaamwi nihisuwelaka itthu sinceene siiraneyale okathi Estheri annuwa awe, nnoowerya woona wira owo aanikhapeleliwa saana ni munnawe ole ni atthu a vatthokoni vawe, owo aakhala nipuro nooreera okhopela wa muro, ohoolo wa empa ya mwene. Woonasa wene vaanimusivela orowa opuro waatumihiwa itthu oSusa, weiwo waatumihiwa itthu sa eweero, eparatha ni mireerelo sikina. Nto niireke Estheri aahitoko wuupuwelela wira itthu iye ohoolo saarowa okhala sawawe? Estheri khaasuwela itthu saarowa omwiiraneela ohoolo.

7. Exeeni yamwiirihale Vasthi ohiya okhala pwiyamwene, nto exeeni yaakhumelenle ohoolo waya?

⁷ Nihiku nimosa oSusa, anamunceene yaalavula sa ohiiwanana waakhumenle vatthokoni va mwene. Okathi wa efesta yuulupale, mwene Asuwero aahiwiitthana makhulupale awe wira alye ni owurya eviinyu, nave aahimwiitthana pwiyamwene ooreerexa, Vasthi;  yoowo aalya opuro mukina ni athiyana akhwaawe. Masi Vasthi aahikhootta orwa. Mwene aahoona wira aahiramusiwa, nto onanariwe ene, aahaakoha makhulupale awe wira amuhimeerye enamuna ya omuhukhumu Vasthi. Nto yaakhumelenle exeeni? Owo aahoomoliwa khuhikhala-tho pwiyamwene. Arumeyi a mwene yaahipacerya waavya imwali soohipaceriwa ni sooreera wira mwene othanle emwali yaarowa okhala pwiyamwene.—Esth. 1:1–2:4.

8. (a) Woonasa wene exeeni yaamwiiriha Mardokeyo okhala ooxankiheya okathi Estheri annuwa awe? (b) Ninrowa otthara sai miruku sa Biibiliya voohimya sa oreera wa werutthuni? (Nwehe-tho Miruku 31:30.)

⁸ Woonasa wene Mardokeyo aanihakalala omoona Estheri annuwaka, masi aanixankiheya-tho woona wira vano Estheri aahipacerya okhala muthiyana oophwaneliwa saana. Biibiliya onihimya wira: “Estheri uwo ari òrera sana ni òphwaneliwa”. (Esth. 2:7) Biibiliya onnihimya-tho wira mutthu ooreera ohaana okhalana ankhili ni wiiyeviha. Ohiira siiso, oreera wawe pooti okumiherya wiitthuna, wiixinnuwiha ni mikhalelo sikina soohiloka. (Musome Miruku 11:22.) Niireke eyo enniiraneya? Niireke oreera wa Estheri waahimukhaliherya, wala waamwiirinhe okhala oowiixinnuwiha? Eyo yamooneya ohoolo.

9. (a) Exeeni yaakhumelenle okathi arumeyi a mwene yamoonale aya Estheri okhala ooreera, ni exeeni yiiriha okhala voovila Estheri omuhiya Mardokeyo? (b) Exeeni yaamwiirinhe Mardokeyo weemya wira Estheri otheliweke ni mutthu ahaamwaamini Muluku? (Nwehe ekaaxa.)

⁹ Arumeyi a mwene yaanimoona oreera Estheri. Awo yaahimukuxa Estheri vatthokoni va Mardokeyo amurowanaka empa ya mwene, yeeyo yaari mpantta mukina wa muro. (Esth. 2:8) Tthiri yaari etthu yoovila ovalaana Estheri ni Mardokeyo okhala wira aakhala mwa mutthu ni mwanawe. Mardokeyo khaaphavela wira mwaana ole aamuhunwe awe, otheliwe ni mutthu ahaamukupali Muluku, hata aari mwene, masi etthu yaakhumelenle khaawerya okhoottiherya. * Tthiri Estheri aahiiwa saana miruku saavahiwa awe ni Mardokeyo ohinatthi okuxiwa ni arumeyi a mwene! Okathi aaroihiwa awe vatthokoni va mwene oSusa, okastelo, Estheri aahikhalana makoho manceene. Aarowa okhalaka sai?

10, 11. (a) Mwaha wa makhalelo oovirikana etthu xeeni khino yaakhanle omwiiraneela Estheri? (b) Mardokeyo oonihenrye sai oxanka wawe mwaha wa Estheri?

¹⁰ Nto vano Estheri aakhala opuro wootepexa ovirikana ni ole aalimalenle awe. Owo aari eriyari ya“aximwali anjene” yaawo yaathukumanyiwe akumihiwaka elapo yotheene ya Olamulela wa oPersia.  Soolema, ilavulelo ni mweettelo aya atthu awo,waari woovirikana vanci. Imwali iyo sotheene saahivahereriwa namuteko mmosa iireliwa Hegayi, ni saaniviriha eyaakha ntero siphwanelihiwaka ni woottihiwa makhura oowunkhela saana wira sikhale sooreera. (Esth. 2:8, 12) Woonasa wene makhalelo ale yaaniwiiriha axithiyana ale okhala oowiitthuna ni wooniherya oreera waya paahi, ohela muhina wiixinnuwiha ni ophavela waavikana akhwaaya. Nto Estheri oonela sai itthu iye?

¹¹ Khaavo-tho mutthu mukina valaponi aakhanle ooxankiheya ni Estheri onvikana Mardokeyo. Biibiliya onihimya wira khula nihiku owo aanivira vakhiviru va empa ya imwali iye wira osuwele ihaali sa Estheri. (Esth. 2:11) Tthiri, Mardokeyo aanitteeliwa murima ni khula etthu yaiwa awe ehimmwaka ni anamuteko ale yaavara mpaani mwa mwene wira itthu sotheene saanimweettela saana Estheri. Nthowa xeeni?

12, 13. (a) Exeeni yaamwiirinhe Estheri oreereliwa murima? (b) Exeeni yaamwiirinhe Mardokeyo otteeliwa murima mwaha wa Estheri ohihimya wira aari muYuda?

 ¹² Hegayi aahimureerela murima Estheri, khunvaha imwali 7 wira simurumeeleke ni aahivahiwa nipuro noolokexa mpaani mwa athiyana. Biibiliya onihimya so: “Estheri uwo ari òrerexa, vokuxa mirima s’atthu othene yamona”. (Esth. 2:9, 15) Niireke waari oreera owiitho waavara murima atthu ale? Nnaari, yookhala etthu ekina Estheri yaarina awe.

¹³ MwantakiheryohiyoninsomamBiibiliyaniwira:“Vano, Estheri khahimyale nloko nawe nnákhala elapo awe, okhala wira Mardokeyo ahimukhottiherya ohimya”. (Esth. 2:10) Mardokeyo aahimulakiherya mwali ole wira ohilaleye wira aari muYuda, nto owo aanisuwela tthiri wira atthu a oPersia yaanaathanya atthu a elapo awe. Nto eyo yaanimutteeliha murima vanceene Mardokeyo osuwela wira hata Estheri aari ottaiwene, nlelo aanooniherya okhala a miruku ni oowiiwelela!

14. Moota xeeni olelo amiravo akhanle aya oomutakiha Estheri?

 ¹⁴ Olelo, amiravo anoowerya waahakalaliha anamuyari aya wala atthu anaakhapelela. Pooti aryeene ottaiwene ni anamuyari aya, hata aryeene ni atthu ootakhala murima, oohiisumaaliha wala anipaka itthu sootakhala, awo annikhootta opahuliwa ni atthu awo ni annivarexexa ele enisuwela aya okhala ya exariya. Okathi onipaka aya eyo, ntoko Estheri, awo annimuhakalaliha Tiithi aya a wiirimu.—Musome Miruku 27:11.

15, 16. (a) Estheri aawenrye sai ophentiwa ni mwene? (b) Moota xeeni mirukunuxo saakhumelenle mweekumini mwa Estheri saarya aya soovila weettiherya?

¹⁵ Nuumala ophiya okathi wa Estheri oroihiwa wa mwene, owo aahivahiwa eparakha ya othanla khula etthu aaphavela awe, wira khino otepexe okhala ooreera. Mowiiyeviha, Estheri khaavekenle itthu sikina ovikana iye saavahiwe awe ni Hegayi. (Esth. 2:15) Woonasa wene owo aanisuwela wira oreera owiitho paahi khiwaarowa onvara murima mwene; masi mutthu oowiiyeviha ni aankhili taarowa onvara murima. Niireke owo aahuupuwela saana?

¹⁶ Biibiliya onaakhula so: “Mwené ahisiveliwa n’Estheri wavikana athiyana othene, khumurerela murima n’umphenta ovikana imwali sothene. Ahinwariha mmuruni ekhara y’opwiyamwene, khumukhaliha pwiyamwene nipuro na Vasthi”. (Esth. 2:17) Tthiri vaari voovila mwali oowiiyeviha muYuda weemererya makhalelo ale a niinano yaakhumelenle mweekumini mwawe; vano owo aahikhala pwiyamwene, eyo piiyo, mwaara a mulopwana ootepexa owerya a valaponi okathi ole! Niireke eparakha ele yaarina awe yaahimwiiriha opacerya wiixinnuwiha? Hata vakhaani!

17. (a) Mwa inamuna xeeni Estheri aavikaninhe awe omwiiwelela Mardokeyo yoowo aamuhuwale? (b) Moota xeeni ntakiheryo na Estheri niryaaya nootthuneya olelo-va?

¹⁷ Estheri aahivikaniha omwiiwelela Mardokeyo, yoowo aamuhuwale. Owo aahivikaniha ohilaleya wira aari muYuda. Ohiya-vo, okathi yoole Mardokeyo aasuwenle awe wira yaahikhala atthu yaaphavela omwiiva Asuwero, Estheri vowiiwelela aahimulopola mwene, vano atthu ene yaahooneliwa khuphukeliwa. (Esth. 2:20-23) Owo aanimwaamini Muluku awe, ooniheryaka wiiyeviha ni wiiwelela. Olelo-va atthu khaniphavela wiiwelela, nto nihaana omutakiha Estheri, nikhalaka oowiiwelela! Maana atthu arina waamini wa ekeekhai onnaasivela okhala oowiiwelela, ntoko Estheri.

18. (a) Exeeni yaamwiiriha Mardokeyo okhootta omuuramela Hamani? (Nwehe-tho enoota.) (b) Moota xeeni alopwana ni athiyana oororomeleya olelo anitakiha aya waamini wa Mardokeyo?

¹⁸ Mulopwana mmosa iireliwa Hamani aahiphwanya ekhulupale  vatthokoni va mwene Asuwero. Mwene aahimuthanla okhala mukhulupale oopacerya, nto eyo yaahimwiiriha Hamani okhala namavaha miruku muulupale a mwene khukhala a nenli moomweneni. Mwene aahikumiherya nlamulo wira khula mutthu aarowa omoona Hamani aahaana omuuramela. (Esth. 3:1-4) Nto nlamulo nno, naanikumiherya muxankiho wa Mardokeyo. Owo aaneemererya omwiiwelela mwene, masi khaaphavela onveeha Muluku. Tthiri, Hamani aari mutthu a nloko na Agagi. Eyo enooniherya wira Hamani aari mutthu a nloko na Agagi, mwene Aamaleki yoole aiviwe ni Samuweli, profeta a Muluku. (1 Sam. 15:33) Atthu a wAmalekhi yaari ootakhala murima khukhala awanani a Yehova ni aIsarayeli. Nloko notheene na Amalekhi naahikhoottiwa ni Muluku. * (Otum. 25:19) Nto vaaweryaneya sai muYuda oowaamini omuuramela mutthu a nloko na Amalekhi? Tthiri Mardokeyo khaarowa omuuramela. Owo aamweemela paahi. Olelo-va aakhala alopwana ni athiyana anileva ekumi aya mwaha wa malakiheryo ntoko ala: “Etthu yotepa otthuneya omwiwelela Muluku ovikana owiwelela atthu”.—Miteko 5:29.

19. Exeeni yaaphavela awe opaka Hamani, ni aapanke exeeni wira mwene omweemererye opaka ele yaaphavela awe?

¹⁹ Nto eyo yaanimunanara Hamani. Masi Hamani oona wira khivaaphiyerya omwiiva Mardokeyo paahi. Owo aaphavela owiiva atthu otheene a nloko na Mardokeyo! Hamani aahimpaka palano wira aYuda yooniweke okhala atthu ootakhala ni mwene a oPersia. Nnaamwi ahaaromonle nsina owo aahimya wira: ‘Nokhala nloko novirikana n’atthu atakaheriwe n’atthu òmwene anyu mulaponi mwanyu mothene’. Aahihimya-tho wira atthu awo khaniphavela wiiwelela malamulo a mwene; oriki yaari anammwareya oowoopiha. Owo aahiivahererya okumiha musurukhu wira aliviwe atthu yaarowa owookottha aYuda otheene yaakhala moomweneni. * Asuwero aahinvahererya Hamani munela a emwene wira aasinari khula edukumento yaaphavela awe olepa voohimya sa mwaha ole.—Esth. 3:5-10.

20, 21. a) Yaari sai aYuda ni Mardokeyo nuumala wiiwa ihapari sootakhala saalaleiwe ni Hamani Omwene wotheene wa oPersia? (b) Mardokeyo aavekale exeeni wa Estheri?

²⁰ Voohipisa anamitthaka yaahiwela ikhavalo saya arowaka olaleya ehaali ele khula opuro wa elapo ele, wira aYuda otheene yahaana wiiviwa. Nkahaya muupuwele ele yaakhumelenle, okathi aYuda  yaiwale aya ehaali ele, aryeene oYerusalemu amananihaka otthikela oteka muttetthe, yoowo wahaarina ixiri soorakama nuumala otthika weepotthani oBabilonia. Woonasa wene, nuumala wiiwa ihapari iye, Mardokeyo aahiwuupuwela atthu awo waahela muhina apatthani, ni amusi akina yaarina awe oSusa. Naananoru aahipera ikuwo sawe, khuwara mattapwatta, khuhela ettuurwa mmuruni mwawe, khupacerya okhuwela eriyari ya muttetthe ole. Nto, Hamani aahikilaathi ni mwene onawurya, voohiriipiwa murima mwaha wa maxakha ale yaakumihenrye awe eriyari ya aYuda ni apatthani aya oSusa.—Mmusome Estheri 3:12–4:1.

²¹ Mardokeyo aahoona wira aahaana opaka etthu wira owoopole aYuda. Masi aarowa opaka exeeni? Estheri aahiiwa muxankiho owo, nto khurumiha ikuwo wira Mardokeyo oware, masi owo aahikhootta. Woonasa wene Mardokeyo aahitikinihiwa etthu yaamwiirinhe Yehova, Muluku awe, weemya wira Estheri okuxiwe wira akhalihiwe pwiyamwene vatthokoni va mwene ahaamukupali Muluku. Vano, owo aahipacerya osuwela nthowa naya. Mardokeyo aahirumiha ihapari wa Estheri wira onvare metto mwene, “amuxonttelaka mwaha w’atthu awe”.—Esth. 4:4-8.

22. Exeeni yaamwiiriha Estheri woova orowa wa mwene yoowo aari iyawe? (Nwehe-tho enoota.)

²² Tthiri Estheri aahiriipiwa murima vanceene nuumala wiiwa ehaali ele. Nto eyo yaheehererya waamini wawe. Owo aanoova,  ntoko sinooniherya aya enamuna yaamwaakhunle awe Mardokeyo. Owo aahimuupuxerya nlamulo na mwene. Nenno naahimya wira orowa wa mwene ohinatthi wiitthaniwa mutthu owo aahaana wiiviwa. Masi mutthu owo anwerya woopowa, akhala wira mwene aammuthoonya ni ekopo awe ya eweero. Nto niireke Estheri aaniwehererya omoreliwa ikharari ni mwene, yoole aamoomonle Vasthi, mwaha wa okhootta orowa wa mwene nuumala wiitthaniwa? Estheri aahimuleela Mardokeyo wira mwene aahiviriha mweeri ntero ohimwiitthanne! Mwaha wa ohiitthaniwa wawe ni mwene, waanimwiiriha Estheri woonaka wira khaaphaveliwa-tho ni mwene. *—Esth. 4:9-11.

23. (a) Exeeni Mardokeyo yaahimmye awe wira olipihe waamini wa Estheri? (b) Xeeni varyaaya vooloka otthara ntakiheryo na Mardokeyo?

²³ Mardokeyo aahaakhula moowiilipiha wira olipihe waamini wa Estheri. Owo aahimuroromeliha wira aahitthune opaka etthu wira owoopole aYuda, awo yaamoopoliwa mwa enamuna ekina. Masi Estheri aarowa woopoliwa sai okathi olupatthiwa iwe waarowa aya otepaka? Hiyo ninnoona waamini wa Mardokeyo wira Yehova, khaarowa weemererya omalama-lihiwa atthu awe ni wira yooleiherya awe ehiiraneye. (Yox. 23:14) Nuumala-vo Mardokeyo aahimuhimeerya Estheri wira: Woonasa wene “nyuwo mothanleliwa opwiyamwene okathi ula, wira nwopole atthu!” (Esth. 4:12-14) Tthiri ti vooloka otthara ntakiheryo na Mardokeyo! Owo aahimuroromela moomalela Yehova, Muluku awe. Ankhi hiyo?—Mir. 3:5, 6.

24. Moota xeeni Estheri oonihenrye awe waamini ni olipa murima?

²⁴ Vano waahiphiya okathi wira Estheri opake yoothanla awe. Owo aahinvekela Mardokeyo wira aahimeerye atthu otheene a nloko nawe yaakhala elapo ele wira avirihe mahiku mararu ahilyaaka etthu, wuukiseryani aahihimya masu yooniherya waamini ni olipa wawe murima oriki: “wakhalá okhwa, kikhweke”. (Esth. 4:15-17) Woonasa wene owo aahilompa mooluttuweliwa mahiku ale mararu, ovikana ekumi awe yotheene. Nto naahiphiya nihiku nne. Tivonto aahiwara ikuwo sooreerexa saarina awe, saawariwa vatthokoni va mwene, khupaka sotheene saawerya awe wira ooniwe oreera ni mwene. Vano onarowa waari mwene.

25. Mutthokiherye ele yaakhumelenle okathi Estheri aarowa awe wa iyawe.

²⁵ Ntoko sihimmwale aya wanipacerya wa muru ola, Estheri aahirowa wa mwene. Hiyo pooti wuupuwelelaka enamuna Estheri aaxankale awe, opakaka mavekelo ooluttuweliwa mmuupuweloni ni vamurimani vawe. Owo aahikela vanivateni vaawerya awe omoona mwene Asuwero oryeene veehiceni vawe. Estheri woonasa wene aahiphavela oweha makhalelo a ethoni ya mwene, yoowo aarina ikharari sootherekeliwa saana ni ereru yootthaviwa. Vakhala wira Estheri aahilipelela okathi ole, nto owo aahoona opisa ophiya. Nto aahihiya olipelela, okhala wira mwene aahinweha Estheri. Ekeekhai wira Asuwero khaamwiitthanne Estheri, masi khanviruwenle. Ohiya-vo aahimuthoonya ni ekopo awe ya eweero!—Esth. 5:1, 2.

26. Xeeni maKristau a ekeekhai anitthuneya aya okhala oolipa murima ntoko Estheri, ni xeeni ohimmwaka wira mwaha ole khaamalenle vaavale?

²⁶ Mwene ole aaheemererya onwiriyana mwaarawe. Estheri aanimwaamini Muluku, khuleva ekumi awe wira owoopole atthu awe, nto oovaha ntakiheryo nooloka wa arumeyi otheene a Muluku. Olelo-va maKristau annivaha efaita matakiheryo awo. Yesu aahihimya wira atthareli awe yaarowa osuweliwa mwaha wa ophentana waya wa ekeekhai. (Mmusome Yohani 13:34, 35.) Wira nooniherye niphento moota owo, onivekela okhala atthu oolipa murima ntoko Estheri. Nnaamwi Estheri aawenrye owaakiherya atthu a Muluku nihiku nne, masi mwaha ole khaamanle vaavale. Aarowa omooniherya sai mwene wira namiruku awe muulupale, Hamani aari mutakhali aakumihenrye nlamulo nne? Estheri aarowa okhaliherya sai owoopola atthu a nloko nawe? Muru onittharelana onrowa waakhula makoho ala.