OHIHIYA WAAKHALIHERYA
YOOSOMA 7
Ovilela
Yoolepa: “Khula nihiku, awo yaaniixuttiha ni olaleya voohihiyererya ihapari sooreera”. — Mit. 5:42.
Etthu Paulo Aapanke Awe
1. Nwehe EVIIDIYU, aahiiso musome Miteko 19:8-10. Nuumala-vo, mwaakhule makoho anittharelana:
Etthu Paulo Onniixuttiha Awe
2. Nihaana orumeela okathi ahu ni ikuru sahu, wiira niwehe mireerelo sinikhumelela okathi nintthikela ahu waaxukurya atthu, ni opacerya waasomiha Biibiliya.
Mmutakiheke Paulo
3. Mulokiheryeke eprokrama anyu, wiira mmuxukuryeke mutthu owo okathi onoona awe oreerela. Mwiikoheke so: ‘Okathi xeeni, woonasa wene kikhanle aka omphwanya mutthu ole? Opuro xeeni ni okathi xeeni onrowa aya omukhweela olavula ni miyo?’ Mweemereryeke omuxukurya mutthu owo, hata ohikhanle okathi wooreerela para nyuwo.
4. Mmukoheke mutthu owo nihiku mukhanle anyu oomuxukurya. Khula okathi munivaanela anyu ni mutthu, muhinatthi omulaxerya, muhaana ovarihana nihiku ni ewoora mukhanle anyu ootthika wiira nvaanele. Mwiimananihe wiira mukumane ni mutthu owo, okathi ni opuro nvarihanne anyu.
5. Mukhalaneke nlipelelo. Muhuupuweleke wiira mutthu owo khoniphavela, mwaha woowi ovila omphwanya vate aahiiso waatteliwa miteko. (1 aKor. 13:4, 7) Masi, mukhalaneke ephoole. Nnaamwi mpirisariki ovilela, murumeeleke okathi anyu mwa miruku. — 1 aKor. 9:26.
