Yosefe ni Maria yaari oBethelehemu, nlelo yiira ahitthikenle oNazarethi. Vaavo Yesu aarina awe mahiku 8, aahinnuwihiwa, moovarihana ni Nlamulo Muluku aavanhe awe aIsarayeli. (Onamukuttho 12:2, 3) Nave nihiku nlo mwaana aanivahiwa nsina. Awo yaahinvaha nsina na Yesu, ntoko nlaikha Gabriyeli naahimmye aya.

Vano Yesu aarina mahiku 40. Opuro xeeni anamuyari awe yaamuroihale aya? Yaamuroihale oYerusalemu. Okhuma opuro yaari aya mpakha oYerusalemu saari ikiloomo vakhaani. Nlamulo naahimya wira nuuvira mahiku 40 oyariwe ene mwaana mwaamulopwana, maama awe aahaana ovaha mukuttho otemplo wira oreerihiwe.​—Onamukuttho 12:4-8.

Nto Maria aahipaka eyo. Owo aahivaha masiya manli. Eyo yaathoonyerya wira Yosefe ni Maria yaari atthu oohaawa. Nlamulo naahimya wira muthiyana aahaana onvaha mwaapwittipwitthi ni nsiya. Masi akhala wira khorina mwaapwittipwitthi, aahaana ovaha masiya manli aahiiso ipomba piili. Okhala wira Maria aari oohaawa, aavanhe masiya manli paahi.

Mutemplo, mulopwana oowuuluvala aahimwaattamela Yosefe ni Maria. Owo aari Simeyoni. Muluku aahimuleela Simeyoni wira ohinatthi okhwa, aamunweha Kristu aahiiso Mesiya, yoowo aaleiheriwe. Nihiku nle olakiheriwaka ni munepa wootteela, Simeyoni aahirowa otemplo weiwo amphwannye awe Yosefe ni Maria ni mwanaya. Simeyoni aahimukuxa mwaana ole mmatatani.

Omukunxe ene Yesu, Simeyoni aahimuxukhurela Muluku, oriki: “Pwiya, vano kihiyekeni miyo, murumeyi anyu, orowa [okhwa] ni murettele, ntoko sakihimenryanyu. Tthiri, maitho ak’ala àmona mopoli omurumihenlyanyu maloko othene. Owo ti warya onamwalela amalapo: owo t’ovuwa w’atthu a Isarayeli, nloko nanyu”.​—Luka 2:29-32.

Yosefe ni Maria yaahitikinihiwa vaavo yaiwa aya masu a Simeyoni. Nuumala-vo, Simeyoni aahaareeliha ni aahimuleela Maria wira mwanawe “oyareliwe wira akhale mwaha w’opweteya ni wo wopowa w’atthu anjene a Isarayeli”. Nave Maria aamuriipiwa murima, okhalaka ntoko ohommwale ni xoowa aahiiso ekatana.​—Luka 2:34.

Nihiku nne aahikhala mutthu mukina. Owo aari profeta, iihaniwa Ana a iyaakha 84. Ana khaaleva empa ya Muluku. Okathi ole, Ana aahirowa onweha Yosefe, Maria ni Yesu. Ana aahipacerya omuxukhurela Muluku ni olaleya voohimya sa Yesu ohoolo wa atthu otheene.

Tthiri Yosefe ni Maria, yaahihakalala wiiwa itthu iyo mutemplo mme! Mwekeekhai, itthu iyo sotheene saahaakupaliha wira mwanaya ti Yoowo Aaleiheriwe ni Muluku.