Mwaha woohimya wira Yesu oomola malaikha ootakhala orumeelaka owerya wa Satana, alipa-oolepa ni aFarisi yaaveeha owerya wa munepa wa Muluku. Nto yaari mpantta xeeni? Wa Satana aahiiso wa Muluku? Yesu aahimmye wira: “Mwaphatteyaka mwiri woloka, nave mihokorokho saya sinoloka; mwaphatteyaka mwiri wohiloka, hatá mihokorokho saya khasinloka. Tthiri, mwiri onsuwanyeya ni mihokorokho saya”.​—Matheyo 12:33.

Ti voololo ohimya wira Yesu oomola malaikha ootakhala okhaliheriwaka ni Satana. Mwaha Yesu Aalavunle awe Vamwaako, aahihimya wira mwiri wakhala wooloka oniima mihokorokho sooloka ohiya soohiloka. Nto yooniherya exeeni muhokorokho wa aFarisi, niire so, omootherya waya Yesu? Yooniherya wira muhokorokho aya waari woohiloka. Yesu aalenle wira: “Nyuwo, nloko na ivili! Muniwerya sai ohimya itthu sorera, nyuwo muri òtakhala murima? Tthiri eyano ennilavula itthu sisanrye mmirimani”.​—Matheyo 7:16, 17; 12:34.

Tthiri, itthu sinilavula ahu sinnooniherya etthu eri vamurimani vahu, nto eyo tenrowa oniiriha ophukeliwa. Tivonto Yesu aahimmye awe wira: “Miyo kinolèlani wira: nihiku na mulattu, atthu anokohiwa mwaha wa molumo othene ahina muteko anrowaya olavula. Vekekhai, Muluku onowòpolani walá onimotthukelani mwaha wa molumo anyu”.​—Matheyo 12:36, 37.

Nnaamwi Yesu aapanke itthu sootikiniha, aFarisi ni alipa-oolepa, yaaniphavela itthu sikina ariki: “Mwixuttihi, mpaké etthu yotikiniha, nòné”. Hata yaatonko onweha Yesu opakaka miiriirya aahiiso nnaari, awo yaari anamoona a itthu aapaka awe. Yesu aahaaleela makhulupale ale aaYuda wira: “Atthu ala, ari òtakhala ni ohimwiwelela Muluku, annivekela nthonyeryo: vano khanvahiwa nikina, nihikhanle nthonyeryo na Yona profeta”.​—Matheyo 12:38, 39.

Yesu khaakhumme ohaatthokihenrye moolumo awe. Nto aahaaleela wira: “Tthiri, ntoko Yona sikhanlyawe mahiku mararu n’ohiyu miraru mmirimani mw’ehopa yulupale, siso-tho Mwana a mutthu onokhala muhina mw’etthaya mahiku mararu n’ohiyu miraru”. Yona aahimiriwa ni ehopa yuulupale, khuumuliwa ntoko wira aaroohihimuxiwa. Yesu aahaaleela vahinatthi wira, nuumala owo okhwa aamuhihimuxiwa nihiku na neeraru. Vaavo eyo yiiraneyale aya, ahooleli aaYuda yaahikhootta “nthonyeryo na Yona”, mwaha wookhootta ottharuwa aahiiso orukunuxa murima aya. (Matheyo 27:63-66; 28:12-15) Awo yaari oovirikana ni “atthu òNínive” yaawo yaattharunwe nuumala Yona waalaleerya. Tthiri atthu a oNiinive yaahipwapwela nloko nne. Nave Yesu aahimmye wira ntakiheryo na pwiyamwene a oSaba naarowa waapwapwela.  Owo aaphavela owiriyana miruku sa Salomoni ni aahitikinihiwa. Vano Yesu aahihimya wira: “Vava òkhala-vo mutokwene onvikana Salomoni”.​—Matheyo 12:40-42.

Yesu aahihimya ovarihana waakhanle eriyari ya nloko nle nootakhala ni mulopwana ole aakumihiwe malaikha ootakhala. (Matheyo 12:45) Okhala wira khuupuwela itthu sooloka, nlaikha nne nootakhala naahimutthikela ni malaikha 7 ootepa otakhala. Moolikanasa, nloko na aIsarayeli naahireerihiwa ni olokiheriwa. Ntoko mulopwana ole aakumihiwe nlaikha nootakhala, nloko na Isarayeli naahaakhootta maprofeta a Muluku. Nto eyo yaahiwiiriha omukhootta Yesu yoowo aarina munepa wa Muluku. Eyo enooniherya wira mukhalelo womunepani wa nloko na Isarayeli waahitepa otakhala ovikana wanipacerya.

Vaavo Yesu aalavula awe, amamawe ni axinnawe yaahiphiya, yeemela waattamela muttitthi ole. Atthu akina yaamwaattamenle Yesu yaahimuleela wira: “Amam’inyu n’axinn’inyu ari vaté vale, amphavela wowehani”. Nuumala-vo, Yesu aahooniherya wataana aarina awe ni awiixutti awe, yaawo yaakhala ntoko axinnawe, axirokorawe ni amamawe. Ookolaka ntata nawe, Yesu aahihimya wira: “Amam’aka n’axinn’aka t’ale anìwa molumo a Muluku, khíyettela”. (Luka 8:20, 21) Nto aahooniherya wira wataana ni awiixutti awe waari wootepa otthuneya ovikana wataana ni amusi. Tthiri ti voohakalaliha okhalana wataana wooloka ni axinnihu oomunepani, otepexa wene, okathi atthu akina anaanyiherya aya aahiiso anvaanyiha aya miteko sahu sooloka.