Yesu aahiviriha okathi munceene olaleeryaka oGalileya, opuro yoowo atthu yeemererya aya itthu Yesu iixuttiha awe ovikana oYudeya. Okathi Yesu aari awe oYerusalemu, owo aahinvoniha mulopwana nihiku na Saabadu, nto “aYuda yanitepa ophavela omwiva”.​—Yohani 5:18; 7:1.

Vano yaahiphiya elimwe ya 32 EC ni naanaattamela Niira na Maxaxa. Niira nne naamaliha mahiku 7, nuumala-vo, aanipakiwa muthukumano muulupale nihiku na 8. Efesta ele yaathoonyerya omala wa okathi woolima. Vano atthu ale yaanihakalala vanceene ni omuxukhurela Muluku.

Axinnawe Yesu, eyo piiyo, Yakobo, Simoni, Yosefe ni Yuda yaahimutumererya Yesu yiiraka: “Nvenyé va, murowe oYudeya”. OYerusalemu waari opuro muulupale wa okokhorela. Okathi wa ifesta tthaaru sa vamwaakhani, atthu yaanisareya epooma ele. Axinnawe Yesu yaahimuleela wira: “Khavo onìra aphavelaka osuweliwa, khíyavara miteko sawe wiphini. Nyuwo, mwiraka itthu iya, mwireke mwisuwelihaka w’atthu othene”.​—Yohani 7:3, 4.

Axinnawe ale axexe “khiyámwanini” wira aari Mesiya. Hata vaari siiso, awo yaaphavela wira atthu ale yaari vafestani yawehe miteko sootikiniha sa Yesu. Okhala wira Yesu aahisuwela wira vaari vootakhala, aahaaleela wira: “Atthu a vathí-va khana mwaha wo wonyokhani: nto annikinyokha miyo, mana kinniwoniherya wira miteko saya ti sonanara. Murowaseke nyuwo, onìrani. Miyo nkinrowa onìran’iwo, okhala wira mahiku aka nlelo khamalenle”.​—Yohani 7:5-8.

Mahiku vakhaani nuumala axinnawe Yesu okhuma ni atthu akina, Yesu ni awiixutti awe yaahikhuma voohisuweliwa. Awo yaavinre ephiro yaarowa oSamariya, ohiya ovira ephiro yaalimaleliwe yaavira waattamela Muro Yordani. Okhala wira Yesu ni awiixutti awe yaaniphavela opuro woomaka oSamariya, awo yaahaaruma anamuhupi wira yalokiherye. Muttetthe mmosa Yesu ni awiixutti awe khiyaakheliwe saana, okhala wira Yesu aarowa oYerusalemu niira na aYuda. Yakobo ni Yohani yaahimukoha Yesu wira: “Pwiya, munnitthuna wira nirumé okhuruwa moro wirimu, wapwetexe atthu ale?” (Luka 9:54) Yesu aahaapwapwela, nto anavikaniha weetta mukwaha.

Ari ene mphironi, mulipa-oolepa aahimwiirela Yesu wira: “Mwixuttihi, miyo kinimottharani nipuro ti nipuro ninrowanyu”. Yesu aahimwaakhula wira: “Akhwatté àkhalana mittupha saya, axipalame a musulu àkhalana ipuro saya: masi Mwana a mutthu kharina nipuro n’omumula”. (Matheyo 8:19, 20) Yesu aahooniherya wira mulipa-oolepa ole, aamuhaawa vanceene akhala mutthareli awe. Masi okhala wira  aari oowiixinnuwiha, owo khaarowa weemererya omutthara Yesu. Khula mmosa a hiyo ohaana wiikoha so: ‘Kiireke kinnimutthara Yesu ni murima wotheene?ʼ

Omwaakhulaka mulopwana mukina, Yesu aamulenle so: “Mukitthareke”. Owo aahaakhula wira: “Pwiya, mukihiye kipajerye orowa wavitha atithi”. Osuwelaka makhalelo a mulopwana ole, Yesu aahimmye wira: “Mwahiye alipa-òkhwa yavithe alipa-òkhw’aya. Nyuwo murowé mwalaleye Omwene wa Muluku”. (Luka 9:59, 60) Woonasa wene, tiithi awe mulopwana ole, khaakhwiiye. Maana aakhwiiye, owo khaarowa okhala opuro ole ni Yesu. Tthiri mulopwana ole khiilokihenrye wira opwehe Omwene wa Muluku nipuro noopacerya mookumini mwawe.

Arowaka oYerusalemu, aahikhumelela mulopwana mukina, onvekela Yesu wira: “Kinimottharani, Pwiya. Nto mukihiye kipajerye toko orowa walaxerya amusi aka”. Yesu aahimwaakhula wira: “Ole ompajerya ovara muteko, òjela, khamphwanela Omwene wa Muluku”.​—Luka 9:61, 62.

Ale aniphavela okhala atthareli eekeekhai a Yesu, ahaana opweha Omwene opuro woopacerya. Akhala wira mutthu onlima orumeelaka etratoore khoniweha ohoolo, ihipa sa etratoore pooti okhutupuwa. Nave akhala wira onnivara ehipa onaweha ottuli, muteko awe pooti ohikelela ohoolo. Moolikanasa, khula mutthu oniweha ottuli wa olumwenku ola ni miteko saya, onimooceela otthara ephiro eniphwanyiha okumi woohimala.