Moohipisa nuumala ompenuxa murumeyi a mukhulupale aanakhotto, Yesu aahikhuma oKafarnawu orowaka oNayini, ikiloomo soowiiraka 32. Owo khaakhanle mekhawe. Awiixutti awe ni atthu akina yaari ni yena. Woonasa wene, okathi Yesu aattamenle awe oNayini, wira vahalaka wiila. Awo yaahaaphwanya aYuda anceene akunxe ene murutthu. Waari murutthu wa mmiravo aarowa osikhiwa ota wa epooma ele.

Masi mutthu aatempe oriipiwa murima, aari maama awe mmiravo ole aakhwiiye. Owo aari naamukhweli, nto vano mwanawe mmoseene aahikhwa. Vaavo iyawe aakhwiiye awe, aahanle ni mwanawe yoole paahi amphentexa awe. Nkahaya muupuwele moota aaxankale awe, maana aalipana mwanawe yoole paahi. Vano mmiravo ole aahikhwa. Ti pani aarowa ommaalihaka ni omukhaliherya naamukhweli ole?

Nuumala onweha, Yesu aahiiniwa murima ni omoonela othunku naamukhweli ole ahaareere oriipiwa murima. Nave Yesu aahilavula ni naamukhweli ole mwa enamuna yoolipiha ni enivaha nlipelelo, oriki: “Muhinlé!” Tthiri Yesu aahipaka etthu ekina. Owo aahaattamela ni aahivara nrepa aapwehiwe awe murutthu ole. (Luka 7:13, 14) Mukhalelo wa Yesu waahaatikiniha atthu ale mpakha weemela. Woonasa wene, atthu anceene yaaniikoha wira: ‘Etthu ela entaphulela exeeni, ni onrowa opaka exeeni?’

Ale yeetta ni Yesu yaahinweha opakaka miiriirya, ohela muhina waavoniha atthu. Nto atthu awo yoonenle sai? Woonasa wene, khiyaatonko onweha Yesu omuhihimunxe ene mutthu ookhwa. Nnaamwi khalai atthu akina yaahihimuxiwe mittetthe sikina, niireke Yesu ampaka eyo? (1 Mamwene 17:17-23; 2 Mamwene 4:32-37) Moohipisa, Yesu aahihimya wira: “Mmiravo! Ti miyo kinorumani: nvenyé!” (Luka 7:14) Exeeni yiiraneyale? Mmiravo ole aahikilaathi onapacerya olavula! Nto Yesu aahinvahererya maama awe yoowo aatikinihiwe ni ahaareere ohakalala. Maana vano khaarowa okhalaka mekhawe.

 Vaavo atthu ale yanwenhe aya mmiravo ole ori ene mukumi, awo yaahimuttottopela Namavaha a Okumi, eyo piiyo, Yehova, ariki: “Ònikhumelela hiyo profeta mulupale”. Atthu akina asuwelaka yootaphulela ya mwiiriirya wa Yesu, yaahihimya wira: “Muluku òxekurya nloko nawe”. (Luka 7:16) Ihapari iye saahimwareela mowaakuveya elapo yotheene mpakha oNazarethi, opuro Yesu aahuuwale awe, etthu yowiiraka ikiloomo 10. Nave saahiphiya mpantta onikhuma epheyo wa oYudeya.

Nlelo Yohani Mbatiza iira ori ene mukhatteya ni aaniphavela osuwela miteko sootikiniha Yesu aapaka awe. Awiixutti awe Yohani yaahimuleela miiriirya iyo. Yohani oonenle sai?